14
Israe ŋicguru jaŋe Hâwec Bâbâroŋ fotâcnembiŋ
1 Eme Wofuŋzi Mose ʒiŋuc âzâcnewec:
2 “Go Israe ŋicguru jaŋe risierâ Migidoli ficsanaŋ â hâwec irec ŋondeŋko Pi‐Hahiroti hae maickehuc toma âterâ fonʒepieŋ.
3 Farao eki Israe ŋicguru jaŋere ʒiŋuc muocmu hâcne: ‘Mâreŋ burocnezi râreŋ bârâreŋ fokacte jaŋe kosa qac qâsoric ehuc juŋgopieŋ.’
4 Eme no Faraore maŋ bâzickepe kikeo kikeo eŋarezejec, ehame no Farao â momori gurufâc‐ticne jaŋerao tâpiri‐nanere fuŋne bataniŋkezepac. No hâcne Wofuŋ jukopac, jaŋe i mana taranʒepieŋ.” Eme jaŋe iŋuc embiŋ.
5 Ŋic ŋokac wiserâ rambiŋ, Aigita ŋicwofuŋ biŋe iŋuc âzâcnepie manarâ e jahacne mecne, ŋicfâcne jaŋe mecne fâfârerâ ʒiŋuc mumbiŋ: “Nâŋâc wemocte mutuc erâ Israe ŋic jaŋe kiŋaŋ qanârembiŋkonec râec‐jopapene rambiŋ?”
6 Iŋuc murâ ʒika keretac‐ticne mume wareme momorifâcne rocjopawec.
7 Keretac bâwosâec‐jopakicne 600 erâ keretac gâcne gâcne Aigita mâreŋko bajumbiŋ sâc i mâmâc rofârewec wâc. Keretac fainao ine ru sâc momori ŋic bâwosâec‐jopakicne râec‐jopame ŋembiŋ.
8 Eme Israe ŋicguru jaŋe momori hawari birio rahapie Wofuŋzi Aigita ŋicwofuŋ Farao maŋne bâzickeme bâjâpec‐jopa rawec.
9 Aigita ŋic, Farao becâsicfâcne â keretac wiac â becâsicko rara ŋic â momori, iŋuczi bâjâpec‐jopa raku Baali‐Zefoŋ ʒiŋucnao, Pi‐Hahiroti haeo waha ŋehapie bâfuac‐jopambiŋ.
10 Eme Faraozi bâqiŋ‐jopahame Israe ŋicguru jaŋe ʒâŋe fipie rame honec‐joparâ mi ʒiŋuc mananʒepieŋ i: Aigita ŋic jaŋe nâpo jâpec enârezo wareŋgopieŋ. Iŋuc manarâ mâretec hâwic‐jopawec. Eme Israe ŋicguru jaŋe Wofuŋ wira wâwâsic ecnembiŋ.
11 Ehuc Mose ʒiŋuc âzâcnembiŋ: “Aigita mâreŋko ʒâŋeruŋ gie mi fokac me, irec ʒira mâreŋ burocnao hâmonaŋte hota‐nâretecne wareŋgopeneŋ? Go weniŋuc enârehuc Aigita mâreŋkonec jowac‐nâpo waremeŋ?
12 Nâŋe ocna Aigita mâreŋko ʒiŋuc mi gazambeŋ me, ‘Go behec‐nâpotec nâŋe sifu Aigita ŋic kiŋaŋ qajarenʒepeneŋ?’ Nâŋe Aigita ŋic jaŋere kiŋaŋ qahuc junʒapeŋ muzac afecke‐nârezac, ʒi ine mâreŋ burocnao hâmo sipiric enaŋmu ekac.”
13 Eme Mosezi ŋic ŋokac jazawec: “Ŋoŋe mi hâwic‐ŋopaoc, qiŋ herâ domaniŋ. Erâ Wofuŋzi miŋecgac bafic‐ŋopaocmu i honenʒepieŋ. Aigita ŋic miŋecgac honec‐jopaŋgopieŋ jaŋe mocwâc mi honec‐jopa‐jâmbâŋkeniŋmu hâcne.
14 Ŋoŋe mâc domahapie Wofuŋ e ŋoŋere âkehoc ʒika qaocmu.”
15 Eme Wofuŋzi Mose ʒiŋuc âzâcnewec: “Go wemocte wira wâwâsic enarekic? Go Israe ŋic jaŋe jazatecne fahare ranʒepieŋ.
16 Go ine gunuge bâfeŋnerâ mege hâweckopec sicnetec hâweczi tâcneme Israe ŋicguru jaŋe mâreŋ kereŋnao fotâcne ranʒepieŋ.
17 Eme noni Aigita ŋic jaŋere maŋ bâzickepe jaŋe bâjâpec‐ŋopahapie Wofuŋ qâreŋ‐nane Farao â momorifâc‐ticne, keretac‐ticne erâ becâsicko rara ŋicfâc‐ticne jaŋerao bataniŋkezepac.
18 Eme no Farao â keretac‐ticne erâ momori â becâsicko rara ŋicfâc‐ticne jaŋerao Wofuŋ qâreŋ‐nane bataniŋkepe Aigita jaŋe, no hâcne Wofuŋ jukopac, i mana taranʒepieŋ.”
19 Eme Wofuŋte aŋelo Israe ŋic bânie‐jareweczi rârierâ râpefuŋ‐jeŋicko domawec. Ehame karorac ɋâfoŋnezi iŋuc jaha mai‐jeŋickonec rârierâ râpefuŋ‐jeŋicko domawec.
20 Ehuc Aigita ŋic â Israe ŋic ŋondeŋ‐jeŋicko aka iŋucne erâ domawec. Ehuc ŋifecne dapâc ewec, â ŋifecne tamaewec, irec ŋic jaŋe ŋafeo hohonec me bâbâfuac mi ehapie hae furewec.
21 Ehame Mose e hâwec faio meticne sicnewec. Wofuŋ eki ine mume ʒoaŋ wewefunaonec mâŋâŋ sâkozi ŋafe ʒora qahuc hâwec qâkereŋkewec.
22 Eme opâzi ŋifec â ŋifec sanaŋkerâ sac iŋucne domaha Israe ŋic jaŋe duŋmâreŋ kereŋnao fotâcnembiŋ.
23 Ehame Aigita ŋic jaŋe fâro erâ bâjâpec‐jopahuc iŋuc jaha fotâcnezo murâ Faraore becâsic sasawa mecne, keretac mecne erâ becâsicko rara ŋic mâmâc hâwec ʒâʒâŋiŋko ra fisimbiŋ.
24 Eme hae fufurecte ruc bapa dameŋko Wofuŋzi ʒocbâruŋ â karorac maŋnao juhuc Aigita ŋic jaŋeraopec ʒâŋe fime rame honec‐joparâ maŋmutuc bacjopawec.
25 Ehuc mume keretac‐jeŋicte ʒafeŋgâŋne ŋetarame ʒuhuckerâ raniŋte eipiembiŋ. Iŋuc fuame Aigita ŋic jaŋe mumbiŋ: “Israe ŋic behec‐joparâ wiserâ ranaŋ me! Wofuŋ e jahac bafic‐jopakac i! I Aigita ŋic nâŋâc nâpoocte iŋuc ekac.”
26 Eme Wofuŋzi Mose ʒiŋuc âzâcnewec: “Go mege mocwâc hâwec faio sicnetec hâweczi risierâ Aigita ŋic, keretac â becâsicko rara ŋic hâcne qâuruc‐jopazejec.”
27 Eme Mose e meticne hâwec faio mocwâc sicnewec. Eme hae fureme Aigita ŋic jaŋe hâwec risie wareweckopec wisezo ehapie hâweczi fofo‐ticnao risiehuc qofac‐jopawec. Iŋuc fuame Wofuŋzi Aigita ŋic hâwec ʒâʒâŋiŋko bâsirowec‐jopawec hâcne.
28 Eme hâweczi risierâ keretac mecne, becâsicko rara ŋic mecne, Faraore momori sasawa hâcne Israe ŋic bâjâpec‐joparâ hâwecko humbiŋ jaŋe ʒeŋgoma qâuruc‐jopa‐fâreme hâmo miziembiŋ.
29 Israe ŋicguru jaŋe ine hâweczi ŋifec â ŋifec sanaŋkerâ sac iŋucne domaha hâwec ʒâʒâŋiŋko mâreŋ kereŋnao rahuc fotâcnembiŋ.
30 Iŋuc fuame Wofuŋzi ʒoaŋ ira Israe ŋic ŋokac jaŋe Aigita ŋic jaŋere meonec batarac‐jopawec, ehame Aigita ŋic qâŋɋâŋ‐jeŋic hâwec sirizi qârâriec‐jopame moŋgeŋko fe fohapie Israe ŋic jaŋe honec‐jopambiŋ.
31 Erâ Wofuŋzi tâpiri sâko‐ticnere fuŋne Aigita ŋic jaŋerao bataniŋkewec i Israe ŋic jaŋe mâmâc hone tarambiŋ. Ehuc Wofuŋ araŋ bacnehuc manasiŋkembiŋ â kiŋaŋŋic‐ticne Mose e wâc manasiŋkembiŋ.