16
Anutuzi nânâ qowi bâfua‐jarewec
1 Juku Elim beherâ rambiŋ. Raku Israe kikefuŋ jaŋe ʒeŋgoma mâreŋ burocne moc, ʒâŋene Sini ira fisimbiŋ. Sini mâreŋ i ine Elim â Sinai ŋondeŋ‐jekicko fokac. Jaŋe Aigita mâreŋ beherâ ra juku mosa namba tu irec gie bapa 15 ira hâcne fisimbiŋ.
2 Eme Israe kikefuŋ mâmâc sâko jaŋe mâreŋ burocnao Mose â Aroŋ mu kâroŋ ejactembiŋ.
3 Ehuc ʒiŋuc muhuc jasambiŋ: “Nâŋe Aigita mâreŋko qowi â poroŋ mâretec fonâreme nâ gapec ehuc jumbeŋ dameŋ ira Wofuŋte mezi nâpome hâmonʒapeŋ me! Ŋohe ine kikefuŋ ʒi nâŋe hâmo‐fârenaŋte mâreŋ burocnao jowac‐nâpopire warembeŋ hâcne.”
4 Eme Wofuŋzi Mose âzâcnewec: “Noni mupe poroŋ sambâŋkonec hoe iŋucne ŋoŋerao wahaocmu, eme ŋic jaŋe ʒoaŋne ʒoaŋne ra ʒoaŋte sâc ro nusec enʒepieŋ. Iŋuc ehapie nore micsâcko juŋgopieŋ me mâcne, irec fuŋne honezepac.
5 Eme ʒoaŋ namba 6 ira ro nusec eniŋmu i rike bâmoc epie ʒoaŋ sâc roeŋgopieŋ irec sâc sirickehuc ʒoaŋ jajahecte sâc ezejec.”
6 Iŋuc mume Mose â Aroŋ jahe Israe ŋicguru ʒeŋgoma ʒiŋuc jazapic: “Wofuŋzi Aigita mâreŋkonec batarac‐ŋopame wahambiŋ irec fuŋne i hae owâeme hone taranʒepieŋ.
7 Erâ hae fureme, Wofuŋ mu kâroŋ ecnepie manawec i sifu mana urue‐ŋareme Wofuŋ ʒai ʒonʒoŋ‐ticnere fuŋne honenʒepieŋ wâc. Nâhe mac ʒi ine wemo wiacte maŋgâŋ dâŋ munâcteŋgopieŋ?”
8 Eme Mosezi muwec: “Wofuŋ e mu kâroŋ ecnepie manawecte hae owâeme qowi ŋareocmu â furicte poroŋ ŋareme nâ gapec eniŋmu. Nâhe iŋucnezi wemo enacmu? Ŋoŋe nâhe mâcne, Wofuŋ mu kâroŋ ecneŋgopieŋ hâcne.”
9 Erâ Mosezi Aroŋ âzâcnewec: “Go Israe kikefuŋ mâmâc sâko kecʒiŋuc jazac, ‘Ŋoŋe Wofuŋte maio ware fuaniŋ, e mukâroŋ‐ŋeŋic manawec hâcne.’ ”
10 Eme Aroŋ e Israe kikefuŋ mâmâc sâko dâŋ jazahame jaŋe mâreŋ burocnaopec ʒâŋe fipie rame mi Wofuŋ tatamac‐ticne karorac maŋko fuame honenʒepieŋ i!
11 Iŋuc fuame Wofuŋzi Mose ʒiŋuc âzâcnerâ muwec:
12 “No Israe ŋicguru jaŋere kâroŋ qaqa manapac, irec go jazac, ‘Owâ ririŋko qowi nâniŋmu â furicte poroŋ nâ gapec eniŋmu, iŋuc ehuc no Wofuŋ Anutu‐ŋeŋic jukopac i mana taranʒepieŋ.’ ”
13 Eme hae owâeme koneŋ qâŋhec fisirâ tomao herâ fusucmambiŋ, eme hae fureme titikuczi toma râreckehuc fowec.
14 Erâ titikuc kereŋkeme mâreŋko hândâŋ piic piic padi tinac ŋerawec.
15 Eme Israe ŋicguru jaŋe honerâ jaŋackoaŋ ʒiŋuc mu wioc embiŋ: “Ʒi wemo wiac mo?” Jaŋe wiac irec fuŋne kâuc bambiŋ hâcne. Iŋuc epie Mosezi ʒiŋuc jazawec: “I nânâ hâcne, Wofuŋzi nâniŋte ŋarejec.
16 Wofuŋzi irec dâŋ ʒiŋuc mutâcne‐ŋarewec: ‘Ŋoŋe ru sâc nânâ i sâcŋeŋic ro nusec enʒepieŋ. Boze‐ŋeŋicko ŋic ŋokac naru motec ŋec foc eeŋgopieŋ jaŋere ʒare manahuc ru sâc amae wâŋ wâŋ iŋuc ronʒepieŋ.’ ”
17 Eme Israe ŋicguru jaŋe iŋuc hâcne embiŋ, gâcnezi afecne, gâcnezi bocjaha iŋuc rofârembiŋ.
18 Eme sâcticne honeniŋte amaeo râepie hume ʒiŋuc fuawec: Bocjaha nuseweczi mâririhec mi ewec â afecne nuseweczi nânâ wâc mi basawec, jaŋe sasawa hobu‐jeŋicte sâc ro nusec embiŋ hâcne.
19 Eme Mosezi jazawec: “Ŋic moczi tomâc furictere biŋe moc mi râeme fozejec.”
20 Jaŋe ine Mosere dâŋ mana rereŋ mi embiŋ. Ehuc gâcnezi tiwâne ʒoaŋ mocte biŋe râepie foha umbeŋ fuame âsu fiwec, eme Mosezi aaric mana‐jarewec.
21 Jaŋe furic sâc hobu‐jeŋicte sâc ro nusec ejumbieŋ, ʒoaŋ wefurâ sanaŋkeme ine opâ efâre jujec.
22 Ʒoaŋ namba 6 ira ine ʒoaŋ gâcnao rombiŋ irec sâc ʒuhuckerâ ru sâc amae jajahec ro nusec embiŋ. Iŋuc epie soŋaŋ sasawa jaŋe Moserao rarâ âzâcnembiŋ.
23 Âzâcnepie muwec: “Wofuŋ e irec hâcne ʒiŋuc muwec: ‘Tomâcko sabata hombaŋ, Wofuŋte tiri sabata hâcne. Ŋoŋe ʒegoc rikezo murâ ʒegoc rikeniŋ me kuʒio rikezo murâ rikeniŋ, iŋuc epie tiwâne ŋeme tomâckore biŋe râepie fozejec.’ ”
24 Eme jaŋe Mosezi jazawec irec sâcko ehuc furictere biŋe râepie forâ âsu mi fiwec erâ umbeŋ wiac ira wâc mi fuawec.
25 Eme Mosezi muwec: “Miŋecgac nânʒepieŋ, miŋecgac Wofuŋte sabata hombaŋ hâcne. Ŋoŋe miŋecgac gieo moc mi bâfuaniŋmu.
26 Ŋoŋe ʒoaŋ gie bapa 6 sâcne ro nusec eniŋmu, ʒoaŋ namba 7, sabata hâcne, ira ine moc mi fuarâ foocmu.”
27 Gâcne jaŋe ine mana‐bipiehuc ʒoaŋ namba 7 ira sifu ro nusec eniŋte rarâ basambiŋ.
28 Eme Wofuŋzi Mose ʒiŋuc âzâcnewec: “Ŋoŋe dâŋnane â sâcmutâc‐nane qatarahuc juwarembiŋ i wezimucko moc mana rereŋ eniŋmu?
29 Manaŋgopieŋ, Wofuŋ no hâcne sabata bâfua‐ŋarepo, irec ʒoaŋ namba 6 ira ʒoaŋ jajahecte sâc nânâ râe‐ŋarekopac. Irec ʒoaŋ namba 7 ira ŋic sasawa ŋoŋe boze‐ŋeŋicko ŋefârehapie ŋic moczi boze‐ticne beherâ gieo moc mi razejec.”
30 Eme ŋic ŋokac jaŋe iŋuc ehuc ʒoaŋ namba 7 ira sabata hombaŋ ŋembiŋ.
31 Eme Israe kikefuŋ jaŋe nânâ irec ʒâŋe “mana” mumbiŋ. I padi qaŋqaŋ iŋucne, erâ nâpie baŋac aŋac iŋucne ewec.
32 Eme Mosezi muwec: “Wofuŋzi mumupaŋ dâŋ muwec i kecʒiŋuc: ‘Ŋoŋe nânâ i amae mocte sâc ɋâricfâc‐ŋeŋic jaŋere erâ râepie fozejec. Eme jaŋe, no Aigita mâreŋkonec jowac‐ŋopa waharâ mâreŋ burocnao nânâ weniŋuc gumec‐ŋopapo i honenʒepieŋ.’ ”
33 Eme Mosezi Aroŋ âzâcnewec: “Go rowaŋ kiruŋ moc rorâ ira amae mocjahare sâc ‘mana’ hoŋketec hume ɋâricfâc‐ŋeŋic jaŋere erâ Wofuŋte maio râepie domazejec.”
34 Eme Aroŋ e Wofuŋzi Mose âzâcnewec irec sâcko ehuc sâcmutâc dâŋte katapa maŋfuŋnao râeme domawec.
35 Israe ŋicguru jaŋe ine “mana” nâhuc juhapie jara 40 tarame mâreŋ moc ŋic jumbiŋko ira fisimbiŋ. Ine hâcne, “mana” nâhuc juku Kanaaŋ mâreŋ qaŋeŋnao fisimbiŋ.
36 Amae 10 râepie oto kâcɋene mocjahare sâc ewec.