17
Mosezi haroŋaŋ qame opâ wahawec
(Ʒar 20:1–13)
1 Israe kikefuŋ mâmâc sâko jaŋe Wofuŋte micte Sini mâreŋ burocne beherâ juju fofo raku Refidimko fisirâ toma âterâ boze bafârembiŋ. Ehuc ŋic ŋokac jaŋe opâ basambiŋ.
2 Irec Mose dâŋ mucnehuc ʒiŋuc mumbiŋ: “Opâ nâretec nanaŋ me!” Eme Mosezi jazawec: “Ŋoŋe wemocte no dâŋ munareŋgopieŋ? Wemocte Wofuŋ esâickeŋgopieŋ?”
3 Ŋic jaŋe ine opâre hâmorâ Mose mu kâroŋ ecnehuc mumbiŋ: “Go wemocte nâŋe nâŋâcne mecne, naru motecfâc‐nâŋec jaŋe mecne â lama bulimakaofâc‐nâŋec nâŋe mâmâc ʒira opâre hâmo sipiric efârenaŋte Aigita mâreŋkonec jowac‐nâpo waremeŋ?”
4 Iŋuc mupie Mosezi Wofuŋ wira wâwâsic ecnehuc muwec: “No ŋicguru ʒi weniŋuc ejarepemu? Jaŋe qânâzi hehâmocnuzo eŋgopieŋ ine.”
5 Wofuŋzi Mose âzâcnewec: “Go Israe soŋaŋ micne gâcne rocjopatec ŋicguru bânie‐jareniŋ, ehuc gunuge Nilu opâ qameŋ i hâcne barâ razemec.
6 Manakic, no ocna, Horebe tiki fuŋnao haroŋaŋ faio maigao domazepac. Eme go haroŋaŋ qatec opâ wahame ŋic ŋokac jaŋe sâcne nâniŋmu.” Eme Mose e Israe soŋaŋ micne jaŋere ʒâŋe faio iŋuc hâcne ewec.
7 Erâ hae mâreŋ irec ʒâŋe “Masa” (eesâic) â “Meriba” (dâŋ mumu) muwec, ine Israe ŋic jaŋe mu kâroŋ ehuc Wofuŋ dâŋ ʒiŋuc muhuc esâickembiŋ irec: “Wofuŋ e ŋondeŋ‐nâŋecko jukac me mâcne?”
Amaleke ŋic jaŋehec qaqac embiŋ
8 Refidim mâreŋko juhapie Amaleke ŋic jaŋe warepie Israe ŋic jaŋehec qaqac embiŋ.
9 Eme Mosezi Josua âzâcnewec: “Go ŋic rowosâec‐jopatec ra Amaleke ŋic jopanʒepieŋ. No tomâcko tiki botâŋnao ferâ Anuture gunu badomapemu.”
10 Josua e Mosezi âzâcnewec irec sâcko ehuc momori jaŋehec Amaleke ŋic jopaniŋte rambiŋ. Ehame Mose â Aroŋ erâ Huru jaŋe ine tiki botâŋnao ferâ domambiŋ.
11 Eme Mose mejahec‐ticne bâfeŋneme sâc Israe ŋic jaŋe sanaŋkembiŋ, mene wahame sâc ine Amaleke ŋic jaŋe sanaŋkembiŋ.
12 Eme Mose e mene baŋaŋkeme qânâ moc rorâ domawecko hecnepire waha ŋewec. Ehame Aroŋ â Huru jahe mejahec‐ticne dopec‐jofahuc domapic, moc ŋifec â moc ŋifec; iŋuc ehapire mejahec‐ticne sanaŋkerâ domaha ʒoaŋ huwec.
13 Iŋuc epie Josua e Amaleke ŋicwofuŋ â momorifâcne ʒika tinacbiric jopawec.
14 Eme Wofuŋzi Mose kecʒiŋuc âzâcnewec: “Go wiac irec manasuhuc juniŋte papiao qâreŋkerâ Josua âzâcne qâmoc ezemec, no sambâŋ rurumaŋnao Amaleke ŋic jaŋere ʒâŋe biŋe hetâ qâtâtiepe omae‐jâmbâŋkeocmu.”
15 Mose eki ine alata moc barâ ʒâŋene “Wofuŋzi filak‐nane ekac” iŋuc muwec.
16 Erâ muwec: “Wofuŋte filak i meŋeŋicko râepie fooc! Wofuŋzi hâcne Amaleke ŋic jaŋehec mimiŋzi ɋâric ʒika gie bahuc juocmu.”