23
Mumutiŋ gie bahuc ŋic wiac sâckoa ejarezo irec sâcmutâc
1 “Go micko âkec mi ezemec. Go ŋic sâqoc qaqocne hehesic‐ticnere mi bafickehuc eebapa‐ticnere fuŋne mutaniŋkezemec.
2 Go ŋic guru sâko jaŋe sâqocne bazo mupie mi qâtec‐jopazemec, erâ dâŋficko ŋic guru sâko jaŋere hata hehesicne âtehuc dâŋ tiŋne mi muhasickezemec.
3 Me ŋic fekicne mocte dâŋ fuame fuŋne‐ticne mi hesoŋkezemec.
4 “Kisâgere bulimakao me doŋgi qâsorierâ juha bâfuacmuo ine runerao bârisie‐jâmbâŋkezemec.
5 Qaisocguekac ere doŋgi e mafa‐ticnezi kidapeme foha hone qâoma mi ehuc fahareocte bafickezemec.
6 “Go ŋic waha qaqanezi dâŋgie bahuc juhame dâŋticne mi muhasickezemec.
7 Go ŋic qorickehuc dâŋko rârâe i mi ezemec, erâ ŋic kiŋ bahac tâmiric hâmoocte mi mutaracnezemec, no ŋic kiŋ bahachec mi akickepemu irec.
8 Go micmuacte furi mi rozemec, micmuacte furizi dâŋ mumu ŋic ʒâŋe sâoc ejareekac â kiŋ tâmiric jueŋgopieŋ jaŋere dâŋ muhasickeekac.
9 “Ŋic jabane moc mi bomackenʒepieŋ, ŋoŋe ŋaŋac Aigita mâreŋko jaba jumbiŋte jaba jujure fuŋne manaeŋgopieŋ hâcne.
Sabata jara hombaŋ irec sâcmutâc
10 “Go giegao nânâ wiac sara mama erâ fârine qa roro ehuc juhaŋte jara 6 tarazejec.
11 Jara namba 7 ira ine mâc behetec foha hapetac gurufâcge jaŋe ro nâc epie tiwâne fome kâte qowi jaŋe nâfârenʒepieŋ. Waiŋ giegere â oliwa giegere sâc ijaha ezemec.
12 “Go ʒoaŋ gie bapa 6 giege bahuc juzemec, ʒoaŋ namba 7 ira ine ŋemanazemec, i doŋgi bulimakaofâcge jaŋe ŋemananiŋte â kiŋaŋ narugere ŋokâ â ŋic jabane ficgao jueŋgopieŋ jaŋe wâc âke mâteŋ‐jopaocte iŋuc ezemec.
13 Dâŋ ŋazapo i sasawa aimuŋ bajuhuc junʒepieŋ. Nemu gâcne jaŋere ʒâŋe mu bâuac mi enʒepieŋ, erâ ʒâŋe wiac iŋucne micŋeŋickonec moc mi wahazejec.
Hombaŋ jahec â moc ŋeniŋte mutâcne‐jarekicne
(Wah 34:18–26; Sâc 16:1–17)
14 “Jara mocte maŋnao nore hombaŋ ŋepie arec jahec â moc ezejec.
15 Ŋoŋe goreŋ sowa hombaŋ ŋenʒepieŋ, ine noni muŋarepo irec sâcko goreŋ sowa juhapie ʒoaŋ 7 tarazejec, erâ dameŋ bakicne, mosa April ira iŋuc enʒepieŋ; ŋoŋe mosa ira hâcne Aigita mâreŋkonec wahambiŋ. Irec moczi nore maio metariŋ mi fisizejec.
16 Hombaŋ moc ine nânâ bâbâsu hombaŋ ŋenʒepieŋ, gieo nânâ sara mama embiŋ irec fârine bâbâni rorore hombaŋ hâcne. Erâ qa roro hombaŋ ŋenʒepieŋ wâc. Ira hâcne gie‐ŋeŋicte fârine gieonec ro qâzuc eeŋgopieŋ.
17 Ŋic sasawa ŋoŋe jara mocte maŋnao Wofuŋ Anuture maio arec jahec â moc fuanʒepieŋ.
18 “Qowi bâzi‐nanere soc i poroŋ goreŋhec mi rikezemec, erâ tiwâ bâzi‐nanere wokemaŋ irec tiwâne foha hae mi furezejec.
19 “Gieonec nânâ bâbâsu biaŋne jâmbâŋ i Wofuŋ Anutugere ufuŋko bafezemec. Go lama motec neŋgocnere susuhec mi rikezemec.
Wofuŋte aŋelozi Israe ŋic bânie‐jareocte mukicne
20 “Manakic, no aŋelo moc sorepe bânie‐garehuc hatao roroŋ sasapec egarerâ hae mâreŋ bâʒâwe‐garepo ira râecguzejec.
21 Go ere maio aimuŋ juhuc dâŋticne mana rereŋ ezemec. Go mi râŋgeŋkecnezemec, e ʒâŋe‐nane maŋkerâ bajukacte qaqatara‐ŋeŋic mi bâtâmire‐ŋareocmu.
22 “Ŋoŋe dâŋticne mana rereŋ ejâmbâŋkehuc no dâŋ mukopac sâc efâreniŋmuo ine no râsifâc‐ŋeŋic jaŋe râsi ejarepemu â kisâfâc‐ŋeŋic jaŋe fific guguriŋ ejarepemu.
23 “Aŋelo‐nanezi bânie‐garehuc Amori ŋic â Hitiŋic â Periʒi ŋic â Kanaaŋ ŋic â Hiwiŋic â Jebusi ŋic jaŋere mâreŋko râecguhame no jaŋe bâsirowec‐jopapemu.
24 Go jaŋere nemu wiac fodape‐jarerâ araŋ mi bajarezemec, â eebapa‐jeŋicte sâcko wiac moc mi ezemec, aricne, go ɋâŋ qâqâtâc‐jeŋic hetâc qâtâtiehuc qânâ wâtuŋ‐jeŋic i wâc henʒaŋ qanʒaŋne‐fârezemec.
25 Ŋoŋe Wofuŋ Anutu‐ŋeŋic no kiŋaŋ qanarenʒepieŋ, eme no poroŋ â opâ‐ŋeŋic jambuŋkehuc ŋondeŋ‐ŋeŋickonec huc ʒâic‐ŋeŋic bârâriepemu.
26 Ŋokac moczi moc kogoc hâmocne roro me hufiŋne juju mâsi iŋucne mâreŋ‐ŋeŋicko moc mi fuaocmu. Noni hâcne juju‐ŋeŋicte dameŋ mutâcnepe feriŋ wahariŋ mi ezejec.
27 No wiac bipinehec mupe bânie‐ŋareme ŋic gurune gurune bâfuac‐jopaniŋmu sâc jaŋe maŋ bâsifuc ejarepemu â râsifâc‐ŋeŋic sasawa jaŋe ejarepe râpec‐ŋopaniŋmu.
28 Erâ no bitu gâpâc mupe fuarâ bânie‐ŋarehuc Hiwiŋic â Kanaaŋ ŋic â Hitiŋic ŋoŋere maionec jâpec‐jopame wisenʒepieŋ.
29 No jara mocjaha irec maŋnao ŋoŋeraonec jâpec‐jopape mi wiseniŋmu, iŋuc epe mâreŋzi tuhu foha qowi mimicnezi sawe mâririackerâ râsi eŋarenʒipiŋte.
30 No dameŋ sâc âketâc âketâc jâpec‐jopahuc juhape ŋoŋe sawe mâririackerâ mâreŋ raucke‐fârerâ junʒepieŋ.
31 Eme no mâreŋ‐ŋeŋicte ma i Hâwec Bâbâroŋkonec fuŋkerâ raku Filisa ŋic jaŋere hâwecko râepe mickezejec, erâ wâc mâreŋ burocnaonec fuŋkerâ raku Eufrata opâo tarazejec, no mâreŋ rune jaŋe ŋoŋere meo râec‐jopape jâpec‐jopapie ŋoŋeraonec wisenʒepieŋ hâcne.
32 Ŋoŋe jaŋehec me nemufâc‐jeŋic jaŋehec ʒâʒâfic moc mi enʒepieŋ.
33 Jaŋe ŋoŋere mâreŋko ʒuhuckerâ mi junʒepieŋ, ira juku sâqocnere mu qafeŋ eŋarepie behecnunʒipiŋte; ŋoŋe nemufâc‐jeŋic kiŋaŋ qajareniŋmuo ine izi wiwitic‐ŋeŋic jâmbâŋ eocmu hâcne.”