24
Ʒâʒâfic fuawec
1 Eme Wofuŋzi Mose kecʒiŋuc âzâcnewec: “Go Aroŋ â Nadaba â Abihu erâ Israe micne bapa 70 jaŋehec Wofuŋ norao wefuzemec, erâ taic domahuc fodape‐narenʒepieŋ.
2 Ehame Mose go bucge no maicnuhaŋ jaŋe bembeŋko mi warenʒepieŋ, â ŋic ŋokac jaŋe ine gohec moc mi wefu‐jâmbâŋkenʒepieŋ.”
3 Iŋuc mume Mose e jaŋerao fuarâ Wofuŋte dâŋ â mumutâc jaza‐fârewec. Eme ŋic ŋokac jaŋe musereckehuc mumbiŋ: “Wofuŋzi dâŋ muwec i sasawa efârenaŋmu.”
4 Eme Mose e Wofuŋte dâŋ sasawa qâreŋke‐fârewec. Erâ furic uupicte faharerâ tiki fuŋnao alata moc bawec, ehuc Israe ŋicguru 12 irec sâc qânâ wâtuŋ 12 jaha âkendâŋnewec.
5 Iŋuc erâ Israe ŋic socɋâri jaŋe jaza sorec eme qowi bâzi rikembiŋ â bulimakao hezurâ wama bubiaŋ bâzi rikembiŋ wâc.
6 Eme Mose e soc gâcne rorâ râqâcko hoŋkeme huwec â gâcne ine alata faio tiewec.
7 Iŋuc erâ ʒâʒâficte papia rorâ ŋic ŋokac wose‐jarewec, eme jaŋe mumbiŋ: “Wofuŋzi dâŋ muwec i sasawa mana rereŋ efârenʒepeneŋ.”
8 Iŋuc mupie Mosezi soc rorâ ŋic tie‐jarerâ muwec: “Dâŋ mukicne sasawa irec sâcko Wofuŋzi ŋoŋehec ʒâʒâfic ewec irec soc ʒine hâcne.”
9 Eme Mose â Aroŋ â Nadaba â Abihu erâ Israe micne bapa 70 jaŋe tikio fembiŋ.
10 Ferâ Israe ŋic jaŋere Anutu kecʒiŋuc honembiŋ: Kike‐ticnere ââtesiŋ i qânâ furi sâko â sambâŋ hawari iŋucne tatamac jâmbâŋ.
11 Eme e meticnezi Israe ŋic kâcɋene mi jopawec, aricne, jaŋe Anuture maio domahuc nânâ opâ nâmbiŋ.
Mosezi Sinai tikio fewec
12 Wofuŋzi Mose âzâcnewec: “Go norao tikio wefurâ woŋec juc, eme no ŋic jaŋe jaza qazuc ecmurâ sâcmutâc dâŋ â Sâcmutâc Sanaŋ qorac tapao qâreŋkepo i garezepac.”
13 Eme Mose e kiŋaŋŋic‐ticne Josua ehec ʒawierâ Anuture tikio fepic.
14 Micne bapa jaŋe ine ʒiŋuc jazawec: “Ŋoŋe ʒira woŋec ŋehapie risie‐ŋarezeperec. Manaŋgopieŋ, Aroŋ â Huru jahe ŋoŋehec jukopirec, irec moc e dâŋ moc bajukacko jaherao razejec.”
15 Eme Mose e tikio feme karoraczi tiki foŋkewec.
16 Ehame Wofuŋte tatamaczi Sinai tiki botâŋnao waha ŋesanaŋkewec. Eme karoraczi tiki foŋkerâ foha ʒoaŋ 6 tarawec, ʒoaŋ 7 ira ine Wofuŋzi karorac maŋkonec Mose wiracnewec.
17 Wofuŋte tatamac fuawec i Israe ŋicguru jaŋere ʒâŋe faio ʒoc iŋucne tiki botâŋnao fuawec.
18 Eme Mose e karorac maŋko raʒirâ tikio fewec. Ferâ juhame ŋafe ʒoaŋ 40 tarawec.