27
Qowi bâzi ririkere alata
(Wah 38:1–7)
1 “Go alata jâmiŋjâczi bazemec, ʒoricne‐ticnere sâc 5 kubi otecne‐ticnere sâc 5 kubi jaha, sâckoa fozejec hâcne, erâ hâŋne‐ticnere sâc kubi 3.
2 Faic gurucne 4 ira ʒuŋene 4 fasaerâ râezemec, eme ʒuŋenezi alatahec qâfâsâezejec. Eme alata aeŋ bâbâroŋzi foŋkezemec.
3 Wokemaŋ wiac alatao bohotame ʒure bataniŋ ezo â ʒafe‐ticne hezuzo irec kuʒi pake wiac barâ sapac â titie râqâc â sarac â ʒocrâqâc wiac mâmâc bazemec, erâ wiac sasawa i aeŋ bâbâroŋzi bafârezemec.
4 Erâ go sapa‐ticne moc aeŋ bâbâroŋzia bazemec â sapare gurucne 4 ira aeŋ bâbâroŋzi reŋ raraʒi 4 jaha barâ basanaŋkezemec.
5 Eme sapa i alatare qaŋeŋne rurumaŋnao âke hotahuc alata ombâŋnao wefu mickezejec.
6 Erâ alatare reŋ i jâmiŋzia fasaerâ aeŋ bâbâroŋzi ɋorockezemec.
7 Eme reŋ i reŋ raraʒinao esoriepie raʒizejec, eme reŋ i alata ŋifec â ŋifec fohame reŋke ranʒepieŋ.
8 Eme go alata hâcbuc mâcne, tikio gaza gowatuc ekicne irec sâcko katapazi maŋnehec bazemec.
Tiri bozere hae ʒoŋa
(Wah 38:9–20)
9 “Go tiri boze hae ʒoŋa‐ticne bazemec wâc. Juwic mâreŋkopec ira qoruc fâfâsâc ɋetickepie waha domazejec, ŋifec ʒoric‐ticnere sâc kubi 100.
10 Wâtuŋ‐ticne 20 â wâtuŋte râqâc 20 jaha aeŋ bâbâroŋzi bazo, erâ heheawic â qârârâc‐ticne i siliwazi bazo.
11 Faic mâreŋkopec iŋuc jaha qoruc ʒoricne jaha domazejec, ʒoricne‐ticnere sâc kubi 100 jaha; erâ wâtuŋ 20 â râqâc‐ticne 20 jaha aeŋ bâbâroŋzi bazo, qârârâc‐ticne ine siliwazi bazo.
12 Â otecne‐ticne ʒoaŋ huhunaopec ira ine qoruc moc ʒoricne‐ticnere sâc kubi 50 izi waha domazejec, wâtuŋ‐ticne ine 10, erâ wâtuŋte râqâc 10 jaha wâc râezo.
13 Hae ʒoŋare otecne ʒoaŋ wewefunaopec izi kubi 50 jaha ezejec.
14 Motâc ŋifecnere qoruc i kubi 15 â wâtuŋ‐ticne 3 â wâtuŋte râqâc 3 jaha wâc, iŋuc hâcne fuazejec.
15 Â motâc ŋifecnere qoruc i kubi 15 jaha, erâ wâtuŋ‐ticne 3 â wâtuŋte râqâc 3 jaha wâc ŋezejec.
16 Sacmotâc sâko irec qoruc kubi 20 irec sâc, erâ qoruc i qoruc fâfâsâc keŋkeŋne, âmuc âmucne â bâbâroŋ erâ eri qâreŋ‐ticnehec bazo. Wâtuŋ‐ticne 4 â wâtuŋte râqâc 4 jaha râezo.
17 Wâtuŋ sasawa sac râreckehuc domaniŋmu jaŋe siliwazi ɋoroc‐jopazo, â heheawic‐jeŋic i siliwazia â râqâc‐jeŋic ine aeŋ bâbâroŋzi bazo.
18 Hae ʒoŋa ʒoricne‐ticnere sâc kubi 100 â otecne‐ticnere sâc kubi 50 â hâŋne‐ticne ine kubi 5, iŋuc fuazejec. Erâ qoruc fâfâsâc barâ ɋetickepie waha domazejec â wâtuŋ râqâc‐jeŋic ine aeŋ bâbâroŋzi bazo.
19 Tiri bozere wâcwiac sasawa taha giere bajuniŋmu i mecne erâ hae ʒoŋare wâtuŋte fâzâ mecne i iŋuc jaha aeŋ bâbâroŋzia bafârezo.
Lambe sosoŋaŋ irec dâŋ
(Tah 24:1–4)
20 “Eme go Israe ŋicguru mujaretec tatamacte wokemaŋ ɋaɋacne baware‐garenʒepieŋ, i lambe qazepie sâcne ʒaocte iŋuc enʒepieŋ.
21 Eme tutumaŋ qoruc bozeo, ââketâc sahacnao hâcne, ira Aroŋ â ŋokâfâcne jaŋe hae ŋafeme fuŋkerâ lambe i Wofuŋte maio soŋaŋkehuc juhapie hae furezejec. Mâsi i Israe ŋicguru mimiŋzi ɋâric basanaŋkerâ bajupie hata sanaŋ‐jeŋic ezejec.