28
Taha bapa jaŋere gie ŋaqi wiac bapare dâŋ
(Wah 39:1–31)
1 “Eme go hahacge Aroŋ â ŋokâfâcne jaŋe Israe ŋicguru jaŋeraonec rowosâec‐jopatec maŋfuŋgaoa juhuc nore taha bapa erâ junʒepieŋ, Aroŋ â ŋokâfâcne Nadaba â Abihu â Eleaʒa erâ ltama jaŋe hâcne.
2 Eme go hahacge Aroŋ e ʒâŋe biŋehec â eri tatamachec juocte tiri ŋaqi‐ticne moc bazemec.
3 Eme maŋ mamana tahac‐jopape mamana sarichec juŋgopieŋ ŋic iŋucne jaŋe jazatec Aroŋ giere mufirieniŋte ŋaqi‐ticne ɋâtâpie nore taha bapa juzejec.
4 Ŋaqi wiac kecʒiŋuc ɋâtânʒepieŋ: Amecte qâ â qoqonaŋ ŋaqi â ŋaqi goŋgoŋhec erâ ŋaqi maŋne qaŋeŋnehec â duticne â umbika moc; wiac i hâcne hahacge Aroŋ â ŋokâfâcne ɋâtâ‐jarepie nore taha bapa erâ junʒepieŋ.
5 “Ŋaqi wiac i baniŋte gol â qoruc furi sâko keŋkeŋne âmuc âmucne â bâbâroŋ erâ qoruc fâfâsâc iŋuc ronʒepieŋ.
6 Qoqonaŋ ŋaqi i golzi â qoruc keŋkeŋne â âmuc âmucne â bâbâroŋ furi sâko â qoruc fâfâsâc biaŋne fukicne izi banʒepieŋ.
7 I tofane ŋifec â ŋifec ɋaweo ʒuhucke itic enʒepieŋ.
8 Erâ bâmbândeŋ‐ticne i wiac izia, gol â qoruc keŋkeŋne â âmuc âmucne â bâbâroŋ â fâfâsâc izi ba akic enʒepieŋ.
9 Erâ go qânâ furi sâko jajahec rorâ ira Israe ŋic guru 12 jaŋere ʒâŋe heutuckehuc qâreŋkezemec,
10 qânâ moc ira ʒâŋe 6 â qânâ moc ira ʒâŋe 6 jaha, ehuc fuambiŋ sâc heutuckehuc qâreŋkezemec.
11 Golzi wiac bapa ŋic e wiac furi sâkoo ʒâŋe heutuckeekac iŋuc hâcne Israe ŋic guru 12 jaŋere ʒâŋe heutuckehuc qânâ jajahecko qâreŋkezemec, ehuc râqâc kâwinehec golzia barâ maŋnao qânâ i râetec ŋezejec.
12 Iŋuc erâ qânâ jajahec i ɋawe ŋifec â ŋifec qoqonaŋ ŋaqi tofanezi ʒuʒuhuc‐jekicko Israe ŋic guru 12 jaŋere manasuhuc basanaŋkezemec. Eme Aroŋ e qânâ izi ɋawenao foha Wofuŋte maio jume Wofuŋzi jaŋere manasuhuc juzejec.
13 Eme go râqâc kâwinehec golzi bazemec.
14 Erâ kâpâcwâru jajahec gol ɋaɋacnezi bazemec, erâ i muc wiac mizeeŋgopieŋ iŋuc tinac mizerâ muc mizekicne kâpâcwâru i râqâcko basanaŋkezemec.
15 “Izi amecte qâ, dâŋ mumutarare ma hâcne moc ba akic ezemec; ehuc qoqonaŋ ŋaqi iŋucne gol â qoruc furi sâko keŋkeŋne â âmuc âmucne â bâbâroŋ â fâfâsâcne izi bazemec.
16 Ʒoricne â otecne‐ticne sâc mocjaha, 9 inses hâcne eha maine â râpene mâmâc bacjofazemec.
17 Eme qâ faio qânâ biri 4 birickezemec. Biri namba wâŋ ira qânâ furi sâko ʒiŋuc râezemec: Saradiu i qânâ bâbâroŋ, Topazi i qânâ âmuc âmucne â karapuŋke i qânâ ârâŋ ɋâri.
18 Biri namba 2 ira ine qânâ furi sâko kecʒiŋuc birickezemec: Emerali i qânâ ârâŋ ɋâɋâri, Safiri i qânâ keŋkeŋne â Daemaŋ i qânâ ɋaɋac taeŋne kiruŋ tinac.
19 Biri namba 3 ira qânâ ʒiŋuczi fozejec: Jaziŋti i qânâ bâbâroŋ soc tinac, Akata i qânâ buge iŋucne â Ametis i qânâ qondaŋ horiki tinac.
20 Biri namba 4 ine qânâ ʒiŋuc birickezemec: Berili i qânâ bâbâŋeŋ, Onisi i qânâ bâbâroŋ moc, â Jasipe i qânâ birâ birâ. Erâ qânâ i sasawa jaŋere râqâc golzi bafârezo.
21 Qânâ 12 hâcne ʒâŋe‐jeŋichec birickezo, â ʒâŋe ine Israe ŋokâfâc‐ticne jaŋere ʒâŋe heutuckehuc qâreŋkepie ŋic guru 12 jaŋere ma fozejec.
22 Amecte qâ irec masecne ine gol ɋaɋacnezi muc mizekicne tinac bazemec,
23 erâ hoŋeŋeŋ‐ticne jajahec golzia barâ qâ qaŋeŋne ŋifec â ŋifec ira basanaŋkezemec.
24 Muc jajahec golzi bakicne i ine qâ qaŋeŋnao hoŋeŋeŋ jajahec basanaŋ‐jofakicnao esoriezemec.
25 Iŋuc erâ gol tofa jahecne ine baferâ qoqonaŋ ŋaqire qânâ râqâcko basanaŋkezemec, ehame qoqonaŋ ŋaqire faio fozepirec.
26 Izi hoŋeŋeŋ jajahec golzi barâ qâ maŋnere qaŋeŋne juwicpec ŋifec â ŋifec qoqonaŋ ŋaqiopec ira bohotazemec.
27 Erâ gol hoŋeŋeŋ jajahec mocwâc ʒuhuckehuc barâ qoqonaŋ ŋaqi ʒuʒuhuc‐jekicko, qâ fokackoa bohotazemec.
28 Eme qâre hoŋeŋeŋ i qorucmuc keŋkeŋnezi qoqonaŋ ŋaqire hoŋeŋeŋ bohotakicne ira basanaŋkepie qâzi qoqonaŋ ŋaqionec mi ŋetarazejec.
29 Eme Aroŋ e tiri ufuŋko raʒiocmu sâc Israe ŋokâfâcne jaŋere ʒâŋe qâo fohapie amecnao bajuhuc Wofuŋte maio jaŋere manasuhuc juzejec.
30 Qâ ira ine dâŋ mumutarare ma jajahec, Urim â Tunim, fuŋne babataniŋ â mumutiŋte ma hâcne, i ŋihec‐jofatec Aroŋ e Wofuŋte maio fuaocmu sâc amec‐ticnao fohuc juzepirec. Aroŋ e iŋuc ehuc Israe ŋicguru jaŋere erâ mumutara ma i Wofuŋte maio amecnao foha juzejec.
31 “Eme qoqonaŋ ŋaqi irec juwicnao ŋaqi ʒoricne moc qoruc keŋkeŋnezi bazemec.
32 Ehuc qizeczi raʒiocte faic ʒâʒâŋiŋko hawecnehec bahuc qaŋeŋne mâmâc ɋâtâzo; erâ tâcnezacte momori jaŋere aeŋ ŋaqio hawecne fokac irec sâc bahuc ɋâtâzo.
33 Eme ŋaqi qaŋeŋne juwicne jâchândâŋ qâqâtâc qoruc keŋkeŋne â âmuc âmucne â bâbâroŋ izi ba akic ehuc ɋâtâzemec. Erâ ŋondeŋko huhuc rârec rârec golzi goŋgoŋ biricke razemec.
34 Ine ŋaqi ʒoricne irec qaŋeŋne waha domakacko goŋgoŋ â jâchândâŋ ŋondeŋko huhuc doma raocte iŋuc enʒepieŋ.
35 Aroŋ e ŋaqi i hâcne rojuhuc tiri gie bazejec, erâ Wofuŋte maio fuaocte tiri ufuŋko raʒic wefuc eocmu sâc goŋgoŋzi dâŋeme mananʒepieŋ, goŋgoŋ tâmiric juhuc hâmozacte.
36 “Erâ go gol ɋaɋacnezi masapu moc barâ irec faio dâŋ ʒiŋuc heutuckehuc qâreŋkezemec: ‘Wofuŋte erâ bâtirikicne’.
37 Eme masapu i muc keŋkeŋnezi basanaŋkerâ maikura fainao bândeŋnetec mai fozejec.
38 Aroŋte maio fozejec hâcne, ehame Israe ŋicguru jaŋe tiri taha wiac i me i bâtirihuc kiŋ bahac bâfuaeŋgopieŋ i Aroŋzi de âsic efârezejec. Ine hâcne Wofuŋzi Israe ŋicguru jaŋere maname biaŋkeocte masapuzi Aroŋte maio fohuc juzejec.
39 “Eme ŋaqi maŋne ine qoruc hahameŋnezi qâqâreŋ bazemec, erâ du moc qoruc hahameŋnezia â umbika moc erinehec ba akic ezemec.
40 “Aroŋ ŋokâfâcne jaŋere ŋaqi maŋne â umbika erâ du ʒoricne batec huririnehec â hone aŋac eene ezejec.
41 Iŋuc erâ hahacge Aroŋ â ŋokâfâcne hejaretec hume wokemaŋ rua‐jarezemec, ehuc giere mufiriec‐joparâ jambuŋ‐jopatec taha bapa junarenʒepieŋ.
42 Eme mimi‐jeŋic sâockeniŋte qoruc fâfâsâczi kike ŋaqi bajarezemec wâc, bifuŋ‐jeŋickonec waha dieŋko qazejec.
43 Eme Aroŋ â ŋokâfâcne jaŋe tutumaŋ qoruc bozeo raʒiniŋmu sâc me tiri gie baniŋte alata maickeniŋmu sâc kiŋ bâfuarâ hâmonʒipiŋte wiac i hâcne rojunʒepieŋ. Sâcmutâc izi Aroŋ e jahacne â ɋâricfâc‐ticne hata sanaŋ‐jeŋic ezejec.