30
Hosâc âsu ririkere alata
(Wah 37:25–28)
1 “Eme go jâmiŋjâczi hosâc âsu ririkere alata moc bazemec.
2 Ʒoricne‐ticnere sâc kubi mocjaha â otecne‐ticnere sâc kubi mocjaha jaha, sâc mocjaha hâcne ezejec. Hâŋne‐ticnere sâc ine kubi jajahec bazemec, ʒuŋene ine alatahec qâfâsâezejec.
3 Erâ alata faine mecne sâpene mecne ʒuŋene mecne i mâmâc gol ɋaɋacnezi ɋorockezemec, erâ mecqaŋeŋne moc golzia barâ rârec rârec qatec fozejec.
4 Eme reŋ raraʒi jajahec golzia barâ ŋifec â ŋifec mecqaŋeŋne juwicnao basanaŋkezemec, i alata reŋkezore reŋticne ira hâcne esoriepie raʒizejec.
5 Reŋticne i jâmiŋzia fasaerâ golzi jaha foŋkezemec.
6 Eme go ââketâc qoruczi qorac tapa katapa sâockehuc waha domaekac, â qorac katapare tapanezi Sâcmutâc Sanaŋ fomackeekac, erâ gohec bâbâfuac enacmu ŋondeŋne ira hâcne alata hetec ŋezejec.
7 Eme Aroŋ e alata irec fainao hosâc âsu rikezejec, furic sâc lambe wiac bâpiaŋkehuc iŋuc hâcne ezejec.
8 Erâ wâc owâc sâc lambe wiac qazehuc rikezejec. Izi mimiŋzi ɋâric Wofuŋte maio hosâc âsu ririke fohuc juzejec.
9 Ŋoŋe alata irec faio hosâc âsu jawane me qowi me taha bâzi mi rikenʒepieŋ, erâ soczi taha ira wâc mi hoŋkenʒepieŋ.
10 Eme Aroŋ e jara mocte maŋnao arec mocjaha alata ʒuŋene domakacko kiwiric rorore taha gie bazejec, ine sâqocne tâtâmire taha irec soczi jara mocte maŋnao arec mocjaha sâqocne bâbâtâmirere gie i mimiŋzi ɋâric bahuc juzejec. Alata izi Wofuŋte maio wiac furu dindiŋ ekac hâcne.”
Sahac taha rârâere dâŋ
11 Wofuŋzi Mose kecʒiŋuc âzâcnewec:
12 “Go Israe ŋicguru wose qâreŋ ejarecmu dameŋ ira ŋic sasawa sahac taha‐jeŋic Wofuŋ qikiŋnecnenʒepieŋ, eme wose qâreŋ ejarehapie ŋondeŋ‐jeŋicko huc hâmoc wiac moc mi fuarâ fozejec.
13 Ehame wose qâreŋ ejarekicne jaŋe sasawa furuficte moneŋte sâc mukicne irec sâc moneŋ seke nâfocne râenʒepieŋ, (seke wâŋ izi gera 20 ekac) i Wofuŋte taha hâcne.
14 Jara‐jeŋic 20‐o domarâ fekac â wose qâreŋ ejarekicne sasawa jaŋe hâcne taha i râenʒepieŋ.
15 Moneŋ mafaheczi sâc baferâ rârâe me hapetaczi sâc bawaharâ rârâe i misac, jaŋe sasawa seke nâfocne Wofuŋte taha râepie sahac taha‐jeŋic ezejec.
16 Go Israe ŋicguru jaŋeraonec sahac taha moneŋ iŋuc rotec izi tutumaŋ qoruc bozeo gie bapa irec biŋe ezejec. Ŋoŋe iŋuc ehuc ŋaŋac juju‐ŋeŋicte kiwiric roŋgopieŋ tinac eocmu, ehuc wâc Wofuŋzi Israe ŋicguru ŋoŋehec juocte manasucneniŋmu.”
Ʒuʒure râqâc irec dâŋ
17 Erâ Wofuŋzi Mose ʒiŋuc âzâcnewec:
18 “Go aeŋ bâbâroŋzi wiac ʒuʒure râqâc kikenehec barâ tutumaŋ qoruc boze â alata ŋondeŋ‐jekicko hetec ŋeha opâ qatec huzejec.
19 Eme Aroŋ â ŋokâfâcne jaŋe ira hâcne me kike‐jeŋic ʒurenʒepieŋ.
20 Ine tutumaŋ qoruc bozeo fehuc me Wofuŋ bâzi rikecneniŋte alata maickehuc tiri gie bazo murâ hâmonʒipiŋte iŋuc hâcne enʒepieŋ.
21 Hâmonʒipiŋte me kike‐jeŋic ʒurenʒepieŋ. Eme Aroŋ â ɋâricfâc‐ticne jaŋe mimiŋzi ɋâric mâsi i hâcne basanaŋkerâ bajupie eebapa sanaŋ‐jeŋic ezejec.”
22 Erâ Wofuŋzi ʒuhuckerâ Mose ʒiŋuc âzâcnewec:
23 “Go wiac furi sâko â âsunehec kecʒiŋuc rozemec: Moneŋ 500 seke irec sâc wokemaŋ âsu biaŋ, erâ moneŋ 250 seke irec sâc musijâc sahacne, erâ moneŋ 250 seke jaha irec sâc sopâc ââsu,
24 erâ moneŋ 500 seke irec sâc woworaŋ ââsu jâc irec sâfâ, erâ oliwa wokemaŋ fifia râqâc moc irec sâc; seke ine furuficte moneŋte sâc mukicne irec sâc ezejec.
25 Go wiac i sasawa, wokemaŋ bapazi weniŋuc eme wokemaŋ fuaekac iŋuc hâcne ehuc bâsifucketec tiri wokemaŋ fuazejec.
26 Eme wokemaŋ izi tutumaŋ qoruc boze â qorac tapa katapa ruacnezemec.
27 Erâ tebo â fainao wiac ŋerakac sasawa, erâ lambe dodoma â wiac‐ticne â hosâc âsu ririke alata,
28 erâ bâzi ririke alata â wâcwiac‐ticne sasawa erâ ʒuʒure râqâc kikenehec i mâmâc ruacne‐fârezemec.
29 Go iŋuc ehuc bâtiritecne wiac sasawa tirine efârezejec. Eme moczi moc wiac i ba bâuac eocmu e tirificte biŋe ezejec.
30 Erâ Aroŋ â ŋokâfâcne mâmâc wokemaŋ rua‐jarehuc tiri bacjopatec nore taha bapafâc erâ junʒepieŋ.
31 Israe ŋicguru jaŋe ine ʒiŋuc jazazemec: ‘Ŋoŋe mimiŋzi ɋâric wokemaŋ irec manapie nore tiri rurua wokemaŋ ezejec.
32 Wokemaŋ i ŋic omane moc mi rua‐jarenʒepieŋ, erâ ŋoŋe wokemaŋ iŋucne wâc bâsifuckerâ mi bâfuanʒepieŋ; wokemaŋ i tirine erâ ŋoŋe wâc manapie tirine jaha ezejec.
33 Moc e wokemaŋ iŋucnea bâsifuckerâ bâfuaocmu me irec nâfocne rorâ ŋic furune moc râcneocmu e ŋic âgofâc‐ticne jaŋere ŋondeŋkonec bârâriehuc qâhâmonʒepieŋ.’ ”
34 Erâ Wofuŋ e Mose ʒiŋuc âzâcnewec: “Go wiac âsu biaŋ sâckoa kecʒiŋuc rozemec: Jâcsâŋiŋ fuŋne fuŋne (waha kufaŋ, usu â qârâpâ) erâ wiac âsu biaŋ ɋaɋacne moc.
35 Rorâ hosâc âsu ririkere wiac bapazi eekac irec sâc jaha ehuc bâsifuckezemec, erâ hâwec ʒuhucketecne ɋaɋacne â tirine ezejec.
36 Eme gâcne piic piic banʒaŋnerâ tutumaŋ qoruc bozeo qorac tapa katapa ŋekacko ira bahefârâ râetec ŋehame ira hâcne fua‐garezepac. Wiac irec manapie tirine jâmbâŋ ezejec.
37 Eme hosâc âsu ririkere wiac bâsifuckecmu irec sâcko jâmbâŋ ŋaŋacne biŋe moc mi banʒepieŋ, ŋoŋe irec manapie Wofuŋte biŋe bâtirikicne ezejec.
38 Moc e wiac irec âsu mana aŋac eocte e jahacne biŋe bâfuaocmu e ŋic âgofâc‐ticne jaŋere ŋondeŋkonec bârâriehuc qâhâmonʒepieŋ.”