31
Bezalele â Oholiabe giedâŋ mujactekicne
(Wah 35:30—36:1)
1 Wofuŋzi Mose kecʒiŋuc âzâcnewec:
2 “Manakic, no Juda guruonec ŋic moc ʒâŋene Bezalele, Huru ŋokâ‐ticne Uri ere ŋokâ hâcne e rowosâepo.
3 Erâ Anutu nore Mâro mecne, maŋfânâŋ mecne, maŋfâri â mamana tara mecne i tahackepe maŋnao fusucmarâ foha metâ bapa ŋic erâ jukac.
4 Erâ i ʒiŋucte epo: Ŋic e mana gufuc erâ wiac fuŋne fuŋne gol â siliwa â aeŋ bâbâroŋzi ba akic ezejec.
5 Erâ qânâ wiac furi sâko i râqâc kâwinehecko râezore fasaezejec â jâc wiac wâc fasaerâ meqâreŋ fuŋne fuŋne bazejec.
6 Erâ manakic, no Daŋte guruonec ŋic moc ʒâŋene Ahisamac ere ŋokâ Oholiabe eki Bezalele bafickeocte râcnepo; erâ metâ bapa ŋic sasawa jaŋe wiac mugarepo i ba akic efâreniŋte maŋfânâŋ qikiŋne‐jarepo. Wiac kecʒiŋuc:
7 Tutumaŋ qoruc boze, qorac katapa â tapane, qoruc bozere wâcwiac;
8 tebo â wâcwiac‐ticne, lambe dodoma gol ɋaɋacnezi bakicne â wâcwiac‐ticne;
9 hosâc âsu ririke alata, erâ bâzi ririke alata â wâcwiac‐ticne; ʒuʒure râqâc kikenehec;
10 taha bapa Aroŋ ere gie ŋaqi hone aŋac eene â tiri ŋaqi‐ticne, erâ ŋokâfâcne jaŋere gie ŋaqi;
11 rurua wokemaŋ â tirificte hosâc âsu ririkere wiac. Ine hâcne mugarepo irec sâcko jâmbâŋ wiac sasawa ba akic efârenʒepieŋ.”
Sabata hombaŋte dâŋ jaha
12 Erâ Wofuŋzi Mose ʒiŋuc âzâcnewec:
13 “Go Israe ŋicguru jazazemec, ‘Ŋoŋe hombaŋ‐nane ŋefârenʒepieŋ, hombaŋ i ŋoŋehec ʒâʒâfic epo irec ma, erâ i mimiŋzi ɋâric forahuc juzejec. No Wofuŋ jukopaczi tiri bacŋopakopac, iŋuc mana‐fârenʒepieŋ.
14 Ŋoŋe hombaŋ‐nanere manapie tirine eha ŋenʒepieŋ. Moc e hombaŋ sipirickeme qâhâmozo, â moc e hombaŋko gie baocmu e wâc iŋuc jaha ŋic âgofâc‐ticne jaŋere ŋondeŋkonec bârâriehuc qâhâmozo.
15 Gie bapa 6 ira gie bazore mukicne, gie bapa namba 7 izi ine Wofuŋte hombaŋ sâko, irec moc e sabata hombaŋko gie baocmu e qâhâmonʒepieŋ.
16 Irec Israe ŋicguru jaŋe mimiŋzi ɋâric hombaŋ ŋepie hata sanaŋ‐jeŋic eha hombaŋ i hâcne ŋehuc junʒepieŋ.
17 Wofuŋ noni hâcne ʒoaŋ gie bapa 6 sambâŋ â mâreŋ bâfuac‐jofapo, erâ ʒoaŋ namba 7 ira ine ŋemanahuc âke mâteŋnuwec, irec hombaŋ i Israe ŋicguru ŋoŋehec ʒâʒâfic epo irec ma erâ nac ʒora fosanaŋkezejec.’ ”
18 Eme Wofuŋ e Mosehec Sinai tikio dâŋ muc manac epire tarame Sâcmutâc Sanaŋte tafe râcnewec. Tafe i qânâzi fasaekicne â Anuture mezi qâreŋkekicne.