36
1 “Eme ʒi Bezalele â Oholiabe erâ ŋic meafec gâcne gie iŋucne baniŋte Wofuŋzi maŋɋârâŋ â mamana tahac‐jopame furufic bapare fuŋne manaŋgopieŋ jaŋe sasawa Wofuŋzi mutâcnewec irec sâcko jâmbâŋ bafârenʒepieŋ.”
Ŋic ŋokac jaŋe taha wiac bocjaha bafisimbiŋ
2 Eme Mose e Bezalele â Oholiabe erâ ŋic meafec sasawa Wofuŋzi metâ bapare mamana tahac‐jopawec â maŋjeŋiczi gie i ware baniŋte qacfahac ejarewec jaŋe hefârec‐jopawec.
3 Erâ Mose e Israe ŋic ŋokac jaŋe furufic bapare taha wiac bafisimbiŋ i jare‐fârewec, ehame ŋic ŋokac jaŋe furic sâc buafec jaha taha gâcne ʒuhuckerâ bafisihuc jumbiŋ.
4 Irec metâ bapa furuficte gie bambiŋ jaŋe sasawa gie‐jeŋic bahuc jumbiŋ i beherâ
5 Moserao fisirâ mumbiŋ, “Ŋic ŋokac jaŋe wiac bafisiŋgopieŋ i Wofuŋzi gie banaŋte muwec irec sâc sirickekac.”
6 Iŋuc mupie Mosezi dâŋ ʒiŋuc râeme teuŋ sâcke‐fârewec: “Ŋic me ŋokac moczi furuficte taha wiac ʒuhuckerâ mocwâc mi bafisinʒepieŋ.” Iŋuc muhuc ŋic ŋokac wiac ʒuhuckerâ bafisinʒipiŋte aka hejarewec hâcne,
7 i wiac bafisikicne izi giere sâc sirickewecte.
Tiri boze bambiŋ irec dâŋ
(Wah 26:1–37)
8 Eme gie bambiŋ jaŋeraonec ŋic meafec sasawa jaŋe tiri boze i qoruc furi sâko fâfâsâc â keŋkeŋne â bâbâroŋ â âmuc âmucne 10 izi bambiŋ, ehuc qoruc i qâreŋnehec fupie kerubim hawari fuawec. I Bezalelezi iŋuc bawec.
9 Qoruc moc i ʒoricne‐ticnere sâc kubi 28 â otecne‐ticnere sâc kubi 4, iŋuc bapie sâcjeŋic mocjaha efârewec.
10 Eme e qoruc 5 jaŋe moc buc ʒuhuc‐jopawec â 5 jaŋe iŋuc jaha moc buc ʒuhuc‐jopawec.
11 Erâ e qoruc qaŋeŋnao jâmbâŋ qoruc furi sâko keŋkeŋnezi ʒâʒâficke muc barâ râewec â qoruc mocte qaŋeŋnao jâmbâŋ iŋuc jaha ewec.
12 Qoruc mocte ʒâʒâfickere muc 50 â qoruc mocte qaŋeŋnao ʒâʒâfickere muc 50 jaha basanaŋkewec. Iŋuc eme ʒâʒâfickere muc i qoruc ŋifec â ŋifec sâckoa forawec.
13 Erâ heheawic 50 golzi barâ izi qoruc heawic‐jofame tiri boze mocjaha fuawec.
14 Erâ bupure qoruc 11 i noniŋ kanʒaŋnezi bawec.
15 Qoruc buc buc ʒoricne‐jeŋicte sâc kubi 30 â otecne‐jeŋicte sâc kubi 4, qoruc 11 sâcjeŋic mocjaha hâcne.
16 E qoruc 5 moc buc ʒâfic‐jopawec â qoruc 6 jaŋe iŋuc jaha moc buc ʒâfic‐jopawec.
17 Erâ ʒâʒâfickere muc 50 i qoruc tataranere qaŋeŋnao râe rawec erâ ʒâʒâfickere muc 50 jaha i qoruc mocte qaŋeŋnao iŋuc jaha râe rawec.
18 Erâ qoruc ʒuhucke itic eme mocjaha eocte aeŋ bâbâroŋzi heheawic 50 bawec.
19 Erâ qoruc boze bupune i lama ŋicnere sahac peŋ bâbâroŋzi rikekicne â noniŋ sahacne izi bawec.
20 I tarame tiri bozere katapa hâŋ ââeckene jâmiŋzi fasaewec.
21 Katapa ʒoricnere sâc kubi 10 â otecnere sâc kubi moc â nâfocne sasawa.
22 Katapa sasawa bareŋ‐jeŋic jajahec jajahec, i ʒuʒuhuc eniŋte tiri bozere katapa iŋuc sasawa bawec.
23 Tiri bozere katapa ine kecʒiŋuc bafârewec: Sâpene juwic mâreŋkopec irec biŋe 20,
24 erâ katapa 20 irec juwic tofanao siliwazi râqâc 40 bawec; katapa mocte bareŋne jajahec irec râqâc jajahec â katapa mocte bareŋne jajahec irec râqâc jajahec, iŋuczi iŋuc.
25 Erâ tiri bozere sâpene faic mâreŋkopec irec katapa 20
26 â siliwazi râqâc‐ticne 40 jaha, katapa mocte râqâc jajahec â katapa mocte râqâc jajahec jaha.
27 Tiri boze râpene, ʒoaŋ huhunaopec hâcne, irec katapa 6 fasaewec.
28 Erâ fic gurucne râpenao irec wâtuŋ jajahec fasaewec.
29 Eme wâtuŋ i juwic rârâwiŋ domahuc feku faic hoŋeŋeŋ micne fowecko iitic epic; gurucne jajahec irec wâtuŋ jajahec iŋuc hâcne bawec.
30 Katapa 8 i siliwazi râqâchec hâcne, mocte râqâc jajahec mocte jajahec, iŋuc râe rame 16 ewec.
31 Eme jâmiŋzi babasanaŋ fasaewec, ine tiri bozere neŋgoc ŋifec 5,
32 â tiri bozere neŋgoc ŋifec 5, â râpene ʒoaŋ huhunaopec irec biŋe 5 jaha.
33 Eme babasanaŋ ʒâʒâŋiŋko fowec izi katapa ombâŋnao ŋifeckonec ware raku ŋifecko fisiwec.
34 Eme katapa sasawa golzi ɋorockewec, erâ babasanaŋte raraʒi, hoŋeŋeŋ hâcne i golzia bawec, â babasanaŋ i wâc iŋuc jaha golzi ɋorockewec.
35 Qoruc ââketâc ine qoruc furi sâko keŋkeŋne â âmuc âmucne â bâbâroŋ â fâfâsâc izi bawec, ehuc qâreŋnehec fume kerubiŋ hawari fuawec.
36 Erâ wâtuŋ‐ticne 4 jâmiŋzi fasaerâ golzi ɋorockewec; wâtuŋ heheawic‐ticne golzia bakicne â râqâc‐ticne ine siliwa rike sueŋkekicnezi bawec.
37 Qoruc boze motâcte qoruc i qoruc furi sâko keŋkeŋne â âmuc âmucne â bâbâroŋ â fâfâsâc izi bawec wâc, ehuc geroŋkewec.
38 Erâ wâtuŋ‐ticne 5 i heheawic‐ticnehec bawec. Wâtuŋ utune â otecne i golzi ɋorockewec â râqâcne ine aeŋ bâbâroŋzi wâc bawec.