37
Qorac tapa katapa bawec
(Wah 25:10–22)
1 Eme Bezalele e qorac tapa katapa jâmiŋzi fasaerâ bawec, ine ʒoric‐ticnere sâc kubi jajahec â nâfocne, otecne‐ticnere sâc kubi moc â nâfocne â hâŋne‐ticnere sâc kubi moc â nâfocne jaha, iŋuc bawec.
2 Erâ maŋne â sahacne i gol ɋaɋacnezi ɋorockewec, erâ qaŋeŋne moc rârec rârec i golzia bâjomirehuc bawec.
3 Guruc‐ticne 4 irec reŋ raraʒi 4 jaha golzi bawec, ine ŋifecte biŋe jajahec â ŋifecte biŋe jajahec jaha.
4 Erâ jâmiŋzi reŋ jajahec fasaerâ golzi foŋkewec wâc.
5 Eme katapa reŋkeniŋte reŋ i katapa ŋifec â ŋifec reŋ raraʒi basanaŋkekicnao esorieme raʒiwec.
6 Iŋuc erâ katapa tapane i gol ɋaɋacnezia ba akic ewec; ʒoricnere sâc kubi jajahec â nâfocne â otecnere sâc kubi moc â nâfocne.
7 Erâ kerubim hawari jajahec gol hedapirekicnezi basaric‐jofawec, ehuc tapa qaŋeŋ jahecnao bâjomirec‐jofame ŋepic.
8 Kerubim hawari moc i qaŋeŋne ŋifec â kerubim hawari moc i qaŋeŋne ŋifec; kerubim hawari i katapa tapa faio ŋifec â ŋifec bâjomirec‐jofawec hâcne.
9 Kerubim jahe mamaic erâ ŋehuc fakec‐jekic bâfeŋnepire faicpec qaratierâ domahuc tapane qofackewec, ehame ʒâŋe mai‐jekic tapaopec enduŋkepic.
Poroŋ furu mukicne irec tebo bawec
(Wah 25:23–30)
10 Eme jâmiŋzi tebo fasaewec wâc, ine ʒoricne‐ticnere sâc kubi jajahec, otecne‐ticnere sâc kubi mocjaha â hâŋne‐ticnere sâc kubi moc â nâfocne.
11 Erâ gol ɋaɋacnezi ɋorockerâ rârec rârec mecqaŋeŋne golzia bâjomirewec.
12 Erâ qaŋeŋne moc metapere sâc i golzia ba akic erâ rârec rârec râe‐fârewec.
13 Izi ine gol sueŋkekicnezi reŋ raraʒi 4 barâ kikene 4 irec nopacnao basanaŋkewec.
14 Reŋ esoriepie raʒime tebo reŋkeniŋte reŋ raraʒi i qaŋeŋnere heririŋko mickewec.
15 Eme tebo reŋkeniŋte reŋ i jâmiŋzi fasaerâ golzi foŋkewec.
16 Wiac teboo ŋeŋe i gol ɋaɋacnezi bawec, kecʒiŋuc: Oto, amae, râqâc â ʒopo eme ira hâcne taha bâzire wiac hume râe jumbieŋ.
Lambe dodoma bawec
(Wah 25:31–40)
17 Eme lambe dodoma i gol ɋaɋacnezia wâc bawec. Lambe dodomare kikene â wâtuŋne i gol hedapirekicnezi bawec, eme râqâc â ʒariŋ ɋoŋnehec izi dodomahec qâfâsâerâ mocjaha ewec.
18 Wâtuŋnere ombâŋkonec ine sohocne 6 râwiŋnerâ domambiŋ. Ŋifec sohocne jahec â moc â ŋifec sohocne jahec â moc jaha.
19 Erâ wawec kaoŋne ɋoŋnehec iŋucne ʒariŋ ɋoŋne jahec â moc sohocne ŋifec â ŋifec domawec; lambe dodomare wâtuŋkonec sohocne 6 râwiŋnerâ domambiŋ ira iŋuc hâcne doma‐fârembiŋ.
20 Erâ lambe dodomare wâtuŋko wawec kaoŋne ɋoŋnehec iŋucne ʒariŋ ɋoŋne 4 bakicne.
21 Ine ʒiŋuc domawec: Ʒariŋ ɋoŋnehec moc sohoc fuŋne irec juwicnao, moc sohoc birine namba 2 irec juwicnao, iŋuczi iŋuc doma rawec.
22 Sohocne â ʒariŋ ɋoŋnehec i qâfâsâerâ mocjaha efârewec, wiac i sasawa gol ɋaɋacne hedapirekicnezi bakicne hâcne.
23 Erâ e lambe 7 â lambere qoruc bâbâtâc â râqâc‐ticne i gol ɋaɋacnezia bafârewec.
24 Gol ɋaɋacne ŋemâc‐ticne 100 izi lambe dodoma â wâcwiac‐ticne sasawa basaricke‐fârewec.
Hosâc âsu ririkere alata bawec
(Wah 30:1–5)
25 Hosâc ririkere alata i jâmiŋzi ʒiŋuc bawec: Ʒoricnere sâc kubi mocjaha â otecnere sâc kubi mocjaha jaha, sâckoa bawec hâcne; hâŋne‐ticnere sâc kubi jajahec â ʒuŋene ine alatahec qâfâsâeme mocjaha ewec.
26 Eme faine â sâpene rârec rârec â ʒuŋene i gol ɋaɋacnezia ɋorocke‐fârewec â mecqaŋeŋne moc i golzia barâ rârec rârec râe‐fârewec.
27 Mecqaŋeŋne juwicnao ŋifec â ŋifec ine reŋ raraʒi golzi bakicne râec‐jofawec, i reŋkeniŋte reŋ ira esoriepe raʒiocte.
28 Reŋ ine jâmiŋzi fasaerâ golzi foŋkewec.
Wiac âsu biaŋ bawec
29 Erâ tiri rurua wokemaŋ â hosâc âsu ririkere wiac ɋaɋacne i âsu biaŋ wiac bapa jaŋere sâcko bawec.