38
Qowi bâzi ririkere alata bawec
(Wah 27:1–8)
1 Erâ jâmiŋzi qowi bâzi ririkere alata fasaewec i ʒoricne‐ticnere sâc kubi 5 â otecne‐ticnere sâc kubi 5 jaha, sâcjekic mocjaha hâcne; hâŋne ine kubi 3, iŋuc bawec.
2 Erâ gurucne 4 irec ʒuŋene 4 jaha fasaeme domawec, erâ alatahec qâfâsâerâ domaha aeŋ bâbâroŋzi ɋorockewec.
3 Izi alatare wâcwiac sasawa kecʒiŋuc bawec: Kuʒi, sapac, titie râqâc, sarac â ʒocrâqâc; wiac i sasawa aeŋ bâbâroŋzi bafârewec.
4 Erâ alatare sapa moc i aeŋ bâbâroŋzia bawec, eme sapa izi alatare qaŋeŋne rurumaŋnao âke hotahuc wefu alata ombâŋnao mickewec.
5 Erâ sapa gurucne 4 ira aeŋ bâbâroŋzi reŋ raraʒi 4 jaha bahuc basanaŋkewec, i reŋ ira esoriepie raʒiocte.
6 Reŋ ine jâmiŋzi fasaerâ aeŋ bâbâroŋzia ɋorockewec.
7 Eme alata reŋkeniŋte reŋ i raraʒi‐ticnao esorieme raʒiwec. Alata ine katapazi maŋnehec bawec.
Ʒuʒure râqâc bawec
(Wah 30:18)
8 Wiac ʒuʒure râqâc â kikene ine aeŋ bâbâroŋzi basarickewec, ine ŋokac tutumaŋ qoruc boze motâcko kiŋaŋ gie bahuc jumbiŋ jaŋere hawari wiac rorâ izi bawec.
Tiri bozere hae ʒoŋa bawec
(Wah 37:9–29)
9 Erâ ie tiri boze hae ʒoŋa‐ticne bawec. Juwic mâreŋkopec ira qoruc sâko fâfâsâc i ɋetickewec, qoruc ʒoricnere sâc kubi 100.
10 Qoructe wâtuŋ ine 20 â wâtuŋte râqâc aeŋ bâbâroŋzi bakicne i 20 jaha, wâtuŋte heheawic â qârârâc‐ticne ine siliwazi bawec.
11 Faic mâreŋkopec ira qoruc iŋucnea, sâcticne kubi 100 ɋetickewec, â wâtuŋ‐ticne 20 â wâtuŋte râqâc aeŋ bâbâroŋzi bakicne 20 jaha. Heheawic â qârârâc‐ticne ine siliwazia bawec.
12 Ʒoaŋ huhunaopec irec qoruc ine sâcticne kubi 50 â wâtuŋ‐ticne 10 â wâtuŋte râqâc 10 jaha, iŋuc râewec, heheawic â râqâc‐ticne i siliwazi bawec.
13 Ʒoaŋ wewefunaopec mamai hâcne, irec qoruc i kubi 50 jaha.
14 Motâc ŋifecnere qoruc i kubi 15 â wâtuŋ‐ticne 3 â wâtuŋte râqâc 3 jaha.
15 Motâc ŋifecnere sâc ijaha ewec. Iŋuc eme qoruc ŋifec â ŋifec sâcticne kubi 15 â wâtuŋ‐ticne 3, 3 â wâtuŋte râqâc 3, 3 iŋuc doma rawec.
16 Qoruc hae ʒoŋa rârec rârec râe rakicne i qoruc fâfâsâc sasawa.
17 Wâtuŋte râqâc sasawa aeŋ bâbâroŋzi bakicne, heheawic â qârârâc ine siliwazi bafârekicne. Wâtuŋ botâŋne sasawa siliwazi ɋorockekicne â hae ʒoŋare wâtuŋ qârârâc‐ticne i siliwazia bafârekicne.
18 Hae ʒoŋa motâcte qoruc i qoruc fâfâsâc â âmuc âmucne â bâbâroŋzi geroŋkekicne; qoruc ʒoricne‐ticne kubi 20 â otecne‐ticne kubi 5, erâ hae ʒoŋare qoruchec sâc mocjaha ewec.
19 Wâtuŋ‐ticne 4 â wâtuŋte râqâc aeŋ bâbâroŋzi bakicne 4 jaha, heheawic ine siliwazi bakicne â botâŋne i siliwazi ɋorockekicne â qârârâc‐jeŋic i siliwazia bakicne.
20 Tiri boze â hae ʒoŋare fâzâ rârec rârec râe rakicne i aeŋ bâbâroŋzi bafârekicne.
Tiri boze bapare wiac irec ʒare
21 Ʒi ine tiri boze, sâcmutâc dâŋte tiri boze hâcne, irec wiac sasawa ʒare â sâcticne Mosezi mutâcne‐jarewec irec sâcko wosembiŋ. Ine Lewire garikiŋfâc jaŋe Aroŋte ŋokâ, taha bapa Itama eki hâcne soŋaŋ‐jopaha wosembiŋ.
22 Juda guruonec ŋic ʒâŋene Bezalele, Huru ŋokâ‐ticne Uri ere ŋokâ hâcne, eki Wofuŋzi Mose dâŋ mutâcnecnewec irec sâcko wiac efârewec.
23 Ehame Daŋ guruonec ŋic ʒâŋene Oholiabe Ahisamacte ŋokâ hâcne, e aeŋ wiac bapa â ficbapa â qoruc keŋkeŋne â âmuc âmucne â bâbâroŋ â fâfâsâc irec faio geroŋ bapa juweczi bafickewec.
24 Tiri boze bapare gol râekicne sasawa irec ŋemâc i 2 tauseŋ 930, erâ i furuficte ŋemâc fowec irec sâc.
25 Â kikefuŋte ŋic wose qâreŋ ejarekicnezi siliwa râembiŋ irec ŋemâc i 10 tauseŋ 70, erâ i furuficte ŋemâc fowec irec sâc jaha.
26 Ine kecʒiŋuc ehuc râembiŋ: Ŋic jara‐jeŋic 21 bazukicne jaŋe wose qâreŋ ejarepie ʒare‐jeŋic 603 tauseŋ 550 fuawec; ehame furuficte ŋemâc fowec irec sâc buc buc moneŋ râeniŋte mujarekicne i râembiŋ.
27 Siliwa ŋemâc 10 tauseŋ izi ine furuficte katapa sasawa â ââketâc irec râqâc wiac rike sueŋkehuc bambiŋ, ŋemâc 100 izi râqâc moc, ŋemâc 100 izi râqâc moc, iŋuczi iŋuc bame râqâc 100 fuawec.
28 Siliwa nâfocne ŋemâc 70 fowec izi ine heheawic bawec â wâtuŋ ɋorockewec, erâ wâtuŋte qârârâc i siliwa izia bawec wâc.
29 Aeŋ bâbâroŋ tahare biŋe râekicne irec ŋemâc ine 7 tauseŋ 90.
30 Izi tutumaŋ qoruc bozere motâcte wâtuŋ irec râqâc mecne, alata mecne, alata sapa‐ticne mecne, alatare wâcwiac mecne,
31 hae ʒoŋare wâtuŋte râqâc mecne, hae ʒoŋare motâcte wâtuŋ irec râqâc mecne erâ tiri bozere fâzâ â hae ʒoŋa rârec rârec fâzâ râe rakicne i sasawa bafârewec.