10
1 Israe e waiŋ qizec fâri rarau hândâŋne qaekac
irec sâc juwec.
E fua sawec ewec sâc alata wiac bocjaha bawec;
mâreŋ‐ticnao wiac fua biaŋ ewec sâc
nemure qânâ wâtuŋ âkendâŋne rawec.
2 Maŋjeŋicko eeatuc fokac,
irec ʒi kiŋ bahac‐jeŋic âsickeniŋmu.
Wofuŋzi alata‐jeŋic heropieocmu
â qânâ wâtuŋ‐jeŋic qazuocmu.
3 Jaŋe biac ʒiŋuc muŋgopieŋ:
“Nâŋe Wofuŋ araŋ mi bacnembeŋte
ŋicwofuŋ tâmiric juŋgopeneŋ.
Me ŋicwofuŋ moc jurâ muzac
weniŋuc erâ sâcne bafic‐nâpozac?”
4 Jaŋe dameŋ sâc dâŋ mueŋgopieŋ i fâri tâmiric,
â ʒâʒâfic ehuc dâŋ mupaŋkeeŋgopieŋ i racne jaha;
irec mumutiŋ dâŋjeŋic i gieo
hofâ sâqocne fuaekac irec sâc ekac.
5 Samaria ŋecjucfâc‐ticne jaŋe Betaweŋ haeo
bulimakao nemu‐jeŋic ŋewec irec mana mezac eeŋgopieŋ,
ŋicfâc‐ticne jaŋe irec erâ mu mamakuc eeŋgopieŋ,
â taha bapafâcne jaŋe eri qaraweŋ‐ticne jâoc rokicnere
kio huse eeŋgopieŋ.
6 Ɋâŋ qâqâtâc e jahacne Asiria mâreŋko bararâ
ŋicwofuŋ sâko tahackeniŋmu.
Eme Eferaim e mimi‐ticne manaocmu,
â Israe e ɋâŋ qâqâtâc‐ticnere erâ qurutuaocmu.
7 Samariare ŋicwofuŋ e jâc dâkâne opâ faio ratâmireekac
irec sâc sirowezejec.
8 Israe jaŋe Betaweŋ tikio nemu araŋ bajarehuc sâqorembiŋ
tiki i jaŋe sipirickeniŋmu,
eme alata‐jeŋicte faio fâpâ uupic â sopâc fuazejec.
Ehame ŋic jaŋe tiki ʒiŋuc jazaniŋmu:
“Ŋoŋe waha ŋefac‐nâponiŋ,”
â mâreŋ facne jaŋere muniŋmu:
“Ŋoŋe fai‐nâŋecko waharâ bârârâŋ‐nâponiŋ!”
9 Israe ŋic jaŋe Gibea haeo ira fuŋkerâ sâqocne bahuc juwefumbiŋ;
jaŋe ira hâcne râsi enarembiŋ.
Irec ŋic hehesicne jaŋere erâ Gibea haeo
ʒikazi rocjopame mi sâckeocmu me?
10 No maŋnanezi manakopac
irec sâcko okacne bazu‐jarepemu;
kiŋ bahac bâutuckehuc bâfuambiŋte bâtiŋ‐jopape
ŋicne ŋicne jaŋe qâturerâ râsi ejarenʒepieŋ.
11 Eferaim e, bulimakao giere fuŋne qazucnekicnezi
padi afeckerâ âte mârâŋkeekac iŋucne.
No upe‐ticne sanaŋne honerâ kioŋ râecnepo,
ehuc Eferaim ecnepe gie bawec;
Juda e ine mâreŋ hehefâuc gie baha
Jakobozi mâreŋ babanʒaŋ gie bazejec.
12 Ŋoŋe tiŋne jujure ukic tienʒepieŋ,
izi maŋjauŋte fârine fuame ro nusec enʒepieŋ.
Wofuŋ wira basac eecnere dameŋ fokacte
gie ɋâricne he sarac enʒepieŋ,
eme fisirâ mume tiŋne juju i hoe iŋucne waha‐ŋarezejec.
13 Ŋoŋe mâreŋ hefâuckehuc hehesicte ukicne râeeŋgopieŋ,
eme fârine fufua dameŋko eebapa sindaŋne bâfuaeŋgopieŋ,
â burecte hândâŋ nâeŋgopieŋ.
Ŋoŋe keretac wiac‐ŋeŋic â ʒikaŋicfâc‐ŋeŋic guru sâko
jaŋerao roweckehuc jumbiŋ.
14 Irec ŋicfâc‐ŋeŋic jaŋere ŋondeŋko ʒika fuazejec,
â ficsanaŋ‐ŋeŋic ima bafârenʒepieŋ,
ine ŋicwofuŋ Salamaŋzi ʒika qahuc
Betarabe hae ima bawec irec sâcko.
Dameŋ ira neŋgoc â naru motecfâc‐jeŋic
jaŋe mâmâc henʒaŋ qanʒaŋ‐jopakicne.
15 O Israe kikefuŋ, ŋoŋe sindaŋ‐ŋeŋic repicnere
iŋuc hâcne fua‐ŋarezejec.
Israe ŋicwofuŋ e hae fufurecte
biac omae‐jâmbâŋkeocmu.