9
Israe e Wofuŋtao mi roweckehuc juwecte okacne fisicnewec
1 O Israe, go qâpuc wiacte sasec gie bahuc Anutu râpeckemeŋte
â padi bâbâmârâŋ tomao ira sasec giere furi rozore egarewecte
bubiaŋ mi manazemec,
â ŋicne ŋicne jaŋe iŋucne kiwac qawac mi ezemec.
2 Padi â waiŋ rowaŋ izi gume basanaŋ mi egareocmu,
ehame waiŋ ɋâricnezi sâqore‐gareocmu wâc.
3 Ŋoŋe Wofuŋte mâreŋko mi junʒepieŋ, aricne;
Eferaim go Aigita mâreŋko risiezemec,
erâ Asiria mâreŋko nânâ wâwânâŋhec nâhuc juzemec.
4 Ŋoŋe Wofuŋ waiŋ mi tahackeniŋmu,
ehuc taha bâzi ririke‐ŋeŋiczi bubiaŋ wâc mi qacneniŋmu.
Nânâ poroŋ‐ŋeŋic i ŋic makuc baeŋgopieŋ
jaŋere nânâ poroŋ iŋucne,
irec nâniŋmu sâc maŋŋeŋic wâwânâŋhec efâreocmu;
poroŋ‐ŋeŋic i hobure biŋe sawa,
Wofuŋte ufuŋko ine mi bafezo.
5 Eme ŋoŋe tutumaŋ hombaŋko,
â jara sâc Wofuŋte hombaŋ ŋeeŋgopieŋ
ira wemo ezo muŋgopieŋ?
6 Manaŋgopieŋ, ŋoŋe Asiria mâreŋko ranʒepieŋ,
Aigita mâreŋzi bâturec‐ŋopazejec,
â Memfisi haeo ducŋopazo.
Siliwa wiac‐ŋeŋic furi sâko i sopâc fuarâ bârârâŋnezejec,
â qoruc boze‐ŋeŋicko fâpâ uupic fuarâ fozejec.
7 Go kiŋ bahacge â qaqaisocge hâhâwicne fokacte
bâbâtiŋ dameŋ â okac babazu dameŋ maicgukac hâcne.
Israezi ʒiŋuc muhuc owackeekac:
“Porofete e ŋic mutucne â mamana ŋic e ŋic maŋsifuchec.”
8 Eferaim ŋic jaŋe porofete qoruc boze‐ticnao ruc bacneeŋgopieŋ,
ehuc hata‐ticnao wiwitic râecneeŋgopieŋ,
â Anutu‐ticnere ufuŋko râsi ecneeŋgopieŋ wâc.
9 Jaŋe mârâc jaha Gibea haeo embiŋ
irec sâc jaha ehuc sâqocnere nombâŋko huutuckembiŋ,
irec Wofuŋ e hehesic‐jeŋicte manasuhuc
sâqocne‐jeŋicte okacne bazu‐jareocmu.
10 No Israe ŋic jaŋe, mâreŋ sawa sâpâtâckonec
waiŋ hândâŋne bâfuaeŋgopeneŋ
irec sâcko bâfuac‐jopapo,
â mamacfâc‐jeŋic jaŋe jâmbo hândâŋne bâbâni fuaekac irec sâc.
Jaŋe Baali‐Peoro tikio fisirâ
Baali nemure biŋe ehuc sâqore‐jâmbâŋkembiŋ,
erâ joroc‐jeŋichec sâc mocjaha ehuc mamakâc embiŋ.
11 Eferaim e ʒâŋe biŋe‐ticnezi wipe iŋucne ratâmirekac;
naru motec kikiwec‐jopa me roroc‐jopa i arictac efârekac.
12 Me naru motecfâc‐jeŋic hone kitaŋ ejarepie
sokaniŋmuo ine noni jowac rofârepemu,
eme ŋic arictac eniŋmu.
Jei, no behec‐jopape
jaŋe jaŋackoaŋ weniŋuc eniŋmu!
13 No ʒiŋuc honekopac: Eferaim e ɋâricfâc‐ticne râec‐jopame
rambaŋ juhapie wosaŋeŋ bapa ŋic jaŋe bâfuac‐jopahuc muruc‐jopaniŋmu.
14 O Wofuŋ, go wiac moc ejarec!
Wemo wiac mo ejarecmu?
Go ŋokacfâc‐jeŋic hufiŋne bacjopatec
moŋjeŋic ʒickezejec!
15 Giligali haeo hehesic‐jeŋic guru fufusuc fokac,
eme no ira hâcne fuŋkerâ qaisoc‐jopapo.
No eebapa‐jeŋic repicnere erâ
ficnaneonec jâpec‐jopape wisenʒepieŋ,
no maŋjauŋ mocwâc mi ejarepemu;
fekicnefâc‐jeŋic jaŋe qaqatara ŋic sasawa.
16 Eferaim ŋic jaŋe jopakicne,
gâtâ‐jeŋic i kereŋkekicne fokac,
jaŋe fârine mocwâc mi bâfuanʒepieŋ.
Me sifu bâfuaniŋmuo ine
no joroc motec biaŋfâc‐jeŋic qâhâmoc‐jopapemu.
17 Jaŋe dâŋticne mana rereŋ mi embiŋte
Anutu‐nanezi behec‐jopaocmu,
eme ŋicne ŋicne jaŋere ŋondeŋko
qac qâsoric ehuc junʒepieŋ.