4
Wofuŋzi Israe kikefuŋ dâŋgieo râec‐jopakac
1 O Israe kikefuŋ, ŋoŋe Wofuŋte dâŋ mananiŋ!
Maŋjauŋ â siocmâc juju â Anutu mamana tara
i mâreŋko mi fokacte
Wofuŋzi mâreŋte ŋecjucfâc jaŋe dâŋgieo râec‐jopakac.
2 Jaŋe sâwecdâŋ mueŋgopieŋ, burec eeŋgopieŋ,
ŋic qâhâmoc‐jopaeŋgopieŋ, fiuc roeŋgopieŋ,
boe sau eeŋgopieŋ, wiac i ɋârâŋkeha
soc ruruac ehuc kiŋ hotâckeeŋgopieŋ.
3 Irec hâcne mâreŋzi makuc bakac,
â fainao ŋec juc eeŋgopieŋzi hâmo betaŋ efâreeŋgopieŋ;
erâ kâte qowi mecne, sawa wipe mecne,
erâ wâc hâwec qowi jaŋe mâmâc sipirickeeŋgopieŋ.
4 Iŋuc fuahame ŋic moczi âgo‐ticne dâŋgieo mi râezejec,
â moczi âgone dâŋ mi mucnezejec;
o taha bapa, gore dâŋ ine noni mutarapemu.
5 Go ʒoaŋko fâfâcguzejec,
ehame porofete e ŋafeo gohec mâmâc fâfâc‐ŋofazejec;
eme neŋgoc egarekac e imackepemu.
6 Ŋicfâc‐nane jaŋe mamana tara mi fojarewecte sipiric‐jopakicne,
go ine mamana tara qikiŋnemeŋte no behecgupe
taha bapa mi junarezemec.
Go Anutugere mumutâc dâŋ irec nikecguwecte
no ŋokâfâcge jaŋere wâc nikecnuocmu.
7 Taha bapa jaŋe fehuc fua sawec embiŋ,
irec sâc jaha hehesic bocjaha ehuc bunaneo bambiŋ,
irec no ʒâŋe biŋe‐jeŋic bârisiepe
mimi qaqanehec ezejec.
8 Ŋicfâc‐nane jaŋe kiŋte taha bâzi râepie ro nâc eeŋgopieŋ,
ehuc ŋic jaŋe kiŋ bâfuahuc taha bocjaha bafisiniŋte ejareekac.
9 Irec ŋic jaŋe wiac fua‐jareocmu
sâc ijaha taha bapa fua‐jarezejec;
no juju‐jeŋic bâtiŋnehuc
eebapa‐jeŋicte okacne bazu‐jarepemu.
10 Jaŋe nânâ nâpie mi gapec‐jopazejec,
â sasec gie bahuc mi sawenʒepieŋ,
i sasec gie baniŋte Wofuŋ no râpecnumbiŋ hâcne.
11 Waiŋ raŋɋane me ɋâricne nâpie
maŋsifuc ejareekac.
12 Ŋicfâc‐nane jaŋe wiac jâczi bakicne i mu indiŋ ecneeŋgopieŋ,
ehame gunu‐jeŋiczi mufua‐jareekac.
Sasec giere mamanasuzi maŋsifuc bâfua‐jarewec,
eme sâqocne baniŋte Anutu‐jeŋic râpeckembiŋ.
13 Tiki botâŋko taha bâzi,
â mâreŋ facnao hosâc âsu biaŋ rikeeŋgopieŋ;
ine boriŋ, jâmiŋ â niwijâczi mumuc biaŋne qaha
jâc jaŋere fuŋnao iŋuc eeŋgopieŋ.
Irec otâfâc‐ŋeŋic jaŋe sasec gie baniŋmu,
â joŋaofâc‐ŋeŋic jaŋe sau gie baniŋmu.
14 Eme otâfâc‐ŋeŋic sasec gie baniŋmu,
me joŋaofâc‐ŋeŋic sau gie baniŋmu
no mi bâtiŋ‐jopapemu;
i jaŋe jaŋac wâc qâsorierâ sasec ŋokac jaŋehec juhuc
sasec ŋokac mucjopakicne jaŋehec taha bâzi rikeeŋgopieŋte.
Iŋuc fuame ŋic ŋokac jaŋe mutuc ehuc sipirickeeŋgopieŋ.
15 Israe, go sasec gie bahaŋtecne
Judaŋiczi kiŋ bahac mi bâfuazejec.
Ŋoŋe Giligali haeo mi ranʒepieŋ,
me Betaweŋ nemu ufuŋko wâc mi fenʒepieŋ,
ehuc Wofuŋ jujune erao ɋetickehuc
dâŋ i me i mi mupaŋkenʒepieŋ.
16 Israe e bulimakao râŋgeŋne iŋucne râŋgeŋkewec,
iŋuc eme Wofuŋzi wemocko manacneme
lama iŋucne mâreŋ qaratiekicnao nânâ nâhuc juocmu.
17 Eferaim e nemu jabane jaŋerao ʒuhuckewec,
irec e behepie juoc!
18 Jaŋe opâ sanaŋ nâpie maŋjeŋic sifuckeme
sasec gie baeŋgopieŋ,
ehuc wiac miminehec irec manapie feha
ʒâŋe biŋe‐jeŋic bawahaeŋgopieŋ.
19 Maŋsifucte mâŋâŋzi foŋjoparâ ficne suec‐jopawec,
irec alatafâc‐jeŋic jaŋere erâ qurutuaniŋmu.