7
Israe ŋic jaŋe Wofuŋ râpeckehuc hehesic bâfuambiŋ
1 No ŋicfâc‐nane bafic‐jopahuc Israe bâpiaŋkehape
Eferaimte sâqocne â Samariare hehesic i fua taniŋkeekac.
Jaŋe eeatuc bâfuaeŋgopieŋ,
fiuc rorozi ficko ferâ wiac fiuckeeŋgopieŋ,
â ŋic sindaŋne jaŋe hae ʒoŋao ŋic wiac kâŋgâc jowac roeŋgopieŋ.
2 Eme no hehesic‐jeŋic sasaware mi nikecnuekac
i jaŋe mi mana taraeŋgopieŋ;
eebapa‐jeŋic sâqocne izi orâŋ‐jopaekac,
ehuc nore maio fua taniŋkeekac.
3 Jaŋe hehesic‐jeŋiczi ŋicwofuŋ bubiaŋ qacneeŋgopieŋ,
â eeatuc epie ŋic fekicne jaŋe honepie biaŋkeekac.
4 Jaŋe boe sau ŋic sasawa,
jaŋe poroŋ nombâŋko râeniŋte ʒoc ruqepie
buse ʒaekac iŋucne,
i poroŋ bapazi poroŋte gie gâcne bahuc juhapie
ʒoc e jahac ʒahuc foekac.
5 Ŋic fekicne jaŋe ŋicwofuŋ‐nâŋec hombaŋ‐ticnao
waiŋ opâ ʒaʒacne gumepie maŋsifuc ecneekac,
ehame mu ruruc ecneeŋgopieŋ
ŋic i jaŋe meoric qajareekac.
6 Eatuczi maŋjeŋicko ʒoc iŋucne ʒaekac,
kimbeŋ‐jeŋiczi ŋafe ʒora mâc ʒâpârâckeekac,
hae fureme ine ʒocbâruŋ iŋucne uŋ herâ ʒaekac.
7 Jaŋe sasawa poroŋ nombâŋko ʒoc ʒaekac iŋucne,
jaŋe guriŋ bapafâc‐jeŋic ʒâseŋ‐jopaeŋgopieŋ.
Ŋicwofuŋfâc‐jeŋic jaŋe rândiŋkerâ waha jopa‐fârewec,
ehame jaŋeraonec moczi no wira wâwâsic moc mi enarewec.
8 Eferaim e ŋicguru gâcne jaŋehec sisifuc embiŋ,
e nânâ poroŋ rikehuc mi hetikiekicne iŋucne.
9 E mi manahuc ŋic jabane jaŋe tâpiri‐ticne sipirickeeŋgopieŋ,
â mi manahame biac jaŋɋâŋ âeckekac.
10 Israe pepec penaroŋ‐jeŋiczi fuŋne‐jeŋic bataniŋke‐bipieha
jaŋe sifu Wofuŋ Anutu‐jeŋictao mi risieŋgopieŋ,
â irec erâ wira basac wâc mi ecneŋgopieŋ.
11 Eferaim ŋic jaŋe hapâ iŋucne,
rucgereŋ â maŋfânâŋ tâmiric hâcne;
jaŋe ŋifec Aigita wira wâwâsic ecneeŋgopieŋ,
â ŋifec ine Asiria mâreŋko babaficte raeŋgopieŋ.
12 Eme rapie sâc ufic‐nane râe‐jarepe jowaniŋmu,
no sawa wipe iŋucne muruc‐jopape wahaniŋmu,
no kikefuŋfâc‐jeŋic mufua‐jarekicne
irec sâcko bâtiŋ‐jopapemu.
13 Jei, jaŋe wemocte behecnumbiŋ?
Jaŋe qaqatara bâfuahuc râpecnumbiŋte
sisipiriczi fai‐jeŋicko fezejec!
Jaŋe burec enareeŋgopieŋte
wemocko moc batarac‐jopapemu.
14 Jaŋe fofo‐jeŋicko fohuc kio owa kosa eeŋgopieŋ,
â maŋzi mu huacbuc eenare ine mi eeŋgopieŋ.
Jaŋe padi jacgoŋ â waiŋ fua‐jareocte
sahac‐jeŋic hezuhuc no fenareeŋgopieŋ.
15 No hâcne tâpiri bâfua‐jarepo,
jaŋe ine râsi enareniŋte manasueŋgopieŋ.
16 Jaŋe Baali nemu erao ra qohotaeŋgopieŋ,
jaŋe tepe neŋgoc urucne iŋucne.
Fekicnefâc‐jeŋic jaŋe pepecdâŋ boc eeŋgopieŋte
ʒikare nânâ enʒepieŋ.
Iŋuc fuame Aigita mâreŋko mu gâgâwi ejareniŋmu.