6
1 “Ajoc, nâŋâc Wofuŋtao risienaŋ,
eki hâcne kisuc qâsuc‐nâpoweczi mocwâc bâpiaŋ‐nâpoocmu,
e nâpoweczi mocwâc ʒure foŋ enâreocmu.
2 E ʒoaŋ jajahec tarame ɋiɋicne bacnâpoocmu,
ʒoaŋ jahec â moc eha bafaharec‐nâpome
ere maio junʒepeneŋ.
3 Nâŋâc mana taranʒepeneŋ,
Wofuŋ mana taranaŋte henʒiriŋnenʒepeneŋ.
E furic qânikiŋ iŋucne fua‐jâmbâŋkeocmu
e hoe sâko iŋucne fai‐nâŋecko wahaocmu,
qa roro dameŋ maickezo eha
hoe fisirâ mâreŋ bâgunuckeekac irec sâc fisi‐nâreocmu.”
4 O Eferaim, go weniŋuc egarezepac,
â Juda, go wâc weniŋuc egarezepac?
Maŋjauŋ‐ŋeŋic i furic barâ omaeekac iŋucne,
â titikuczi waharâ furictea kereŋkeekac irec sâc.
5 No irec hâcne porofete jaŋe doc enarehapie
henʒaŋ qanʒaŋ‐jopaekopac,
â micdâŋ‐nanezi qâhâmoc‐jopaekopac;
ehame bâbâtiŋ‐nanezi i tatamac iŋucne fuazejec.
6 No taha bâzire mâcne, maŋjauŋte enareekac,
qowi bâzi ririkere mâcne,
Anutu no mana taracnuniŋte enareekac hâcne.
7 Jaŋe Adam haeo ʒâʒâfic‐nane hetâcnembiŋ,
ehuc ira hâcne râpecnumbiŋ.
8 Gileade hae i ŋic sindaŋne jaŋere hae,
soczi bâbie‐fârekicne.
9 Fiuc roro jaŋe hatao ŋic meo fârec ejareeŋgopieŋ,
irec sâc jaha taha bapa jaŋe eeŋgopieŋ,
ehuc Sikem haere hatao ŋic qâhâmoc‐jopaeŋgopieŋ,
jaŋe jâmbomac wiac hehesicne ebac eeŋgopieŋ.
10 No Israe tiri ufuŋko wiac mamakâcne honeekopac,
ira Eferaimzi qâpuc wiac dapecneekac,
â Israezi wâwânâŋ sâko bâfuaekac.
11 O Juda, gore qa roro dameŋ i bakicne fokac wâc.