15
Moabi ŋic jaŋere okacdâŋ
1 Ojai, Arimoabi hae i ŋafe mocjahao ima samaki bapie omaewec i!
Ojai, Kirimoabi hae i ŋafe mocjahao ima samaki bapie omaewec!
2 Diboŋ hae rune jaŋe kio wâwâsic eniŋte
bâzi ririkere tikio feŋgopieŋ;
Moabi rune jaŋe Nebo tikio â Medeba
ira kio wâuŋa eŋgopieŋ.
Qizec‐jeŋic ropie utu pârâc sasawa fuawec,
â mecʒâwâ‐jeŋic i hefârekicne jaha.
3 Mateŋ qonaŋkerâ hae hata‐jeŋicko jueŋgopieŋ;
ficbupu‐jeŋicko mecne, furi bapa tomao mecne
busâqoc fuame ʒeŋgoma kisâko kioŋgopieŋ.
4 Hesiboŋ â Eleale haeo kio owa epie
fânâŋne rakume Jahazi haeo manaŋgopieŋ;
irec Moabi momorifâcne jaŋe jâjâwâckepie maŋjeŋic gâckekac.
5 Maŋnanezi Moabire erâ kio owa ekac,
fekicnefâc‐ticne jaŋe wise raku Zoari,
Egela hae namba 3 ira fisiŋgopieŋ.
Ojai, Luhiti tiki hata i kiohuc feŋgopieŋ;
ojai, Horonaim hata rahuc ima qaqa fuawec
irec kio owa eŋgopieŋ hâcne.
6 Ojai, Nimirim haere opâzi
ʒicke kereŋ eme mâreŋ burocne fuakac;
eme sopâczi hâmo ɋaŋac ekac
â monʒaŋ wiac ururuckekac
erâ kecɋaŋ geune i omaekac.
7 Irec nânâ mafa â huhure wiac fojarewec
i ame susuckerâ Kakikic opâ fotâcnembiŋ.
8 Ojai, kio owazi Moabi mâreŋ râreckehuc fokac,
â ki uu‐jeŋicte fânâŋzi raku Egelaim â Bere‐Elim hae ira fisikac.
9 Jei, Dimoŋte opâ i soczi fusucmakac,
eme no sifu mupe Dimoŋ wiac moc ʒuhuckerâ fuacneocmu i kecʒiŋuc:
Moabi wisekicnefâc‐ticne
â mâreŋ irec ŋic uucne
jaŋe laioŋ moc fua‐jareocmu hâcne.