16
1 Mâreŋ ŋicwofuŋte lama amec‐jopa ranʒepieŋ,
ehuc Sela hae mâreŋkonec tuhu mâreŋ fotâcne raku
Zioŋte otâ ere tikio fisinʒepieŋ.
2 Moabi otâfâcne jaŋe wipezi fururuc qahuc kosa rac warec eeŋgopieŋ,
me sareŋkonec jâpec‐jopakicne irec sâcko
Aronoŋ opâ fotâcneeŋgopieŋko siŋsaŋ qarâ juniŋmu.
3 “Go dâŋ mu biric enârehuc mumutiŋ gie bac;
mumucge mutecne ʒoaŋ ɋaɋacko ŋafe iŋucne ezejec;
eha jopa jâpec ejarekicne jaŋe soŋjopazemec,
â wisehuc juŋgopieŋ jaŋe mi mac mufuac‐jopazemec.
4 Moabi mâreŋkonec wisekicne
jaŋe ŋondeŋ‐ŋeŋicko jaba juniŋte mana‐jarenʒepieŋ,
â ima qaqa ere erâ huec sanaŋ ejarenʒepieŋ.
Eme guguriŋfâc‐jeŋic jaŋe omaepie ima bapa tarame
ŋicbomboŋ ejarehuc jumbiŋzi mâreŋ beherâ ratâmireniŋmu.
5 Eme maŋjauŋte ŋesiŋko eri ŋeŋe moc fuarâ
Dawidire qoruc bozeo ŋeha
fainao mumutara ŋic ŋeocmu
e siocmâc juhuc mumutiŋte henʒiriŋnehuc
tiŋne juju fuarâ foocte ʒoɋac bâfuaocmu.”
6 Nâŋe Moabi sahac fefe‐ticne hâhâwicne jâmbâŋ
irec biŋe manambeŋ,
maŋfefe, sâke bâbâc, pepec penaroŋ
â jawadâŋ‐ticne irec biŋe hâcne.
7 Irec Moabi jaŋe jaŋaczia kio owa eec eniŋ,
jaŋe ʒeŋgoma kio owa eniŋ.
Ehuc Kiri‐Heresi haeonec nânâ poroŋ waiŋ hândâŋnehec
irec mu heŋɋâŋ ehuc busâqoc mananiŋ!
8 Eme Hesiboŋte jufu gie, Sibema irec waiŋ gie i hâmo ɋaŋac ewec;
tieŋ taeŋne haŋ barâ raku Jazereo mecne,
mâreŋ burocnao mecne fisiwec,
â qaŋeŋne qaratierâ hâwec fotâcnewec
i ŋicne ŋicne fekicnefâc‐jeŋic jaŋe âte tâcnembiŋ.
9 No irec hâcne Jazere ŋic jaŋehec
Sibema waiŋ fuŋqizecnere ki mamakuc ekopac,
â Hesiboŋ â Eleale hae ŋohe ʒâŋeuc‐nanezi rua‐ŋactekopac,
i fâri fufua â qa roro dameŋko
râsi jaŋere saoreŋ fuawec irec.
10 Eme jufu gieo ʒeri â bubiaŋ i omaewec,
â waiŋ gieo ʒeri gae â semuja mocwâc mi heeŋgopieŋ;
waiŋ bapa ŋic jaŋe waiŋ hândâŋne
oto sâkoo mocwâc mi âte pisickeeŋgopieŋ,
â qa roro ŋic jaŋere ʒeri fânâŋ i bâniniŋkekicne.
11 Irec maŋnanezi Moabire erâ
mimi ŋokac iŋucne ki mamakuc ekac;
â bunane Kiri‐Heresi ere erâ sâqorekac.
12 Eme Moabi jaŋe tikio ferâ taha bapa gie samarierâ baniŋmuo me nemu ufuŋko raʒirâ nunumu gie baniŋmuo ine sifu bâipieniŋmu.
13 Wofuŋzi mârâc jaha Moabire dâŋ muwec ine hâcne.
14 Miŋecgac ine Wofuŋzi kecʒiŋuc mukac: “Jara jahec â moc, gie motec jaŋere jara dameŋ iŋucne, i tarame Moabire tâpiri â ŋicfâc‐ticne guru sâko jaŋere ʒare waha‐jâmbâŋkeme ŋic ʒanʒaŋne â betaŋkekicne sawa juniŋmu!”