17
Damasko haere okacdâŋ
1 Manaŋgopieŋ, Damasko i hae fâri mocwâc mi ŋeŋe
ʒaŋkerâ sesuctac fuarâ foocmu.
2 Hae piticfâc‐ticne gâcne ŋerakac
i wâc sesuctac jaha fosanaŋkehuc qowi hae eocmu,
ehame jaŋe ira juhapie
moczi moc mi jâpec‐jopaocmu.
3 Eferaim huec sanaŋ‐jeŋic i omae‐jareocmu
â Damasko rune ŋicwofuŋ juju‐jeŋic iŋuc jaha;
eme Israe ŋic jaŋere tâpiri wahawec
irec sâc jaha Aram ŋic ʒanʒaŋne jaŋere wahaocmu,
Anutu Tâpiri Ɋuŋɋasaŋ Wofuŋ ere dâŋ iŋuc.
Israe ŋic jaŋere mumutara dâŋ
4 Eme dameŋ ira Jakobore ʒâŋe biŋe qaʒueocmu,
â sahac opâ‐ticne kereŋkeme siec sawa eocmu.
5 Qa roro ŋic e padi kikene
meticnezi bâturerâ fârine hetâcneekac
irec sâc fuaocmu;
me ŋic moczi Refaim wâcko
padi kikene ro nusec eocmu
irec sâc jaha fuaocmu.
6 Fârine bâtirikicne ʒâhec ro nusec ee
ine afecne mac;
oliwa jâc itiriŋkepie
fârine gâcne sâko waha‐fâreme
jâc botâŋnao hândâŋne 2 me 3 â tieŋnao 4 me 5
irec sâc sawa mac ŋeocmu;
Wofuŋ, Israere Anutu ere dâŋ iŋuc.
7 Dameŋ ira mâreŋŋic jaŋe bâbâfua‐jeŋic ʒâŋitahuc Israere Tiri rune erao ʒâŋe finiŋmu.
8 Jaŋe alata wiac, jaŋe jaŋacne meɋâreŋ hâcne, i mocwâc honepie fârine mi eocmu, â mejeŋiczi metâ wiac bambiŋ, Asera irec ɋâŋ qâqâtâc â ʒoaŋ nemure wâtuŋ ira wâc ʒâŋe mi finiŋmu.
9 Dameŋ ira hae sanaŋ‐jeŋic sesuctac foraniŋmu i Hiwiŋic â Amori ŋic jaŋe hae‐jeŋic Israe ŋic jaŋere erâ behepie sesuctac forambiŋ irec sâc; mâreŋ niniŋ siarereŋ foocmu hâcne.
10 I ʒiŋucte: Go bâbâpiaŋge Anutu ere nikecguwec,
ehuc qânâ sanaŋ â tâpirige irec wâc mi manasumeŋ;
irec ʒariŋ gie biaŋne bazo murâ bac,
â mâreŋ furunaonec ukicne rorâ râezo murâ râec.
11 Eme saracmu ʒoaŋ ijaha bâsokacmu mecne
â ukicne râekic i furictea ecnetec âri qaocmu mecne
erâ sifu ʒârâ hâriŋ â ʒâic busâqoc mi tatarane fuaocmu
dameŋ ira fârine basacmu.
12 Jei, ŋic gurune gurune jaŋere kike quruŋ
i hâweczi fânâŋkeekac irec sâc fuakac;
â ŋicne ŋicne ojowa‐jeŋic
i opâ rumizi fânâŋkeekac irec sâc.
13 Ŋicne ŋicne ojowa‐jeŋic i opâ sâko bocjaha
fânâŋkeeŋgopieŋ irec sâc fuakac;
Wofuŋzi ine dâŋ mujareme taicko wiseniŋmu,
mâŋâŋzi tikio jawa wiac bawiseekac irec sâc,
â ʒâʒâkiriŋ mâŋâŋzi rufe ficne sueme feekac iŋucne.
14 Opoŋ, owâ ririŋte wiac hâhâwicne fuakac,
hae mi fure taniŋkeha biac omaeŋgopieŋ.
Wiac‐nâŋec kâŋgâc nâwoc rohuc ʒika qaeŋgopieŋ
jaŋe okacne iŋuc fua‐jareocmu,
â fiuc serereŋ enâreeŋgopieŋ
jaŋe katucne ijaha fua‐jareocmu.