20
Asiria ŋic jaŋe Aigita â Etiopia mâreŋ rauc‐jofaniŋmu
1 Asiria ŋicwofuŋ Saragoŋzi momori jaŋere micne sâko soreme Asidode haeo fisirâ somâckerâ ro rauc ewec.
2 Dameŋ ira Wofuŋzi Jesaja, Amozire ŋokâ hâcne, dâŋ ʒiŋuc âzâcnewec: “Ajoc, go qorucge qatarac â kikehuhuge heunuckec!” Eme iŋuc erâ qoruc tâmiric â kikehuhu tâmiric mâc juwec.
3 Eme Wofuŋzi ʒiŋuc muwec: “Kiŋaŋŋic‐nane Jesaja e jara 3 qoruc â kikehuhu tâmiric mâc juwec, izi Aigita â Etiopia mâreŋ jahere ma â sowi ewec.
4 Irec sâcko Asiria ŋicwofuŋzi Aigita ŋic ʒikao rocjopakicne â Etiopia ŋic kâpâcwârure biŋe mucjopakicne jaŋe bacjopa raocmu, socɋâri mecne ŋic ŋokac qizecne mecne, qoruc â kikehuhu tâmiric biuctac jâmbâŋ; i Aigita ŋic jaŋerao mimi fuaocte iŋuc eocmu.
5 Eme Etiopia mâreŋte ʒâŋe fifi jumbiŋ â Aigita mâreŋte manapie fefene ewec jaŋe mâreŋ i jahere erâ bipic tara‐jareme mimieniŋmu.
6 Eme hâwecmecko ʒira juraŋgopieŋzi dameŋ ira kecʒiŋuc muniŋmu: ‘Ojai, Asiria ŋicwofuŋte meonec batarac‐nâponiŋte jâcsanaŋfâc‐nâŋec mujarehuc ra mu wâwâsic ejarembeŋ jaŋe wiac iŋucne fua‐jarewecko nâŋâckoaŋ weniŋuc erâ sâcne wisenaŋmu?’ ”