21
Hâwec mâreŋ burocnere okacdâŋ
1 Ʒâʒâkiriŋ mâŋâŋ hâhâwicne juwic mâreŋkonec ware fisiekac
irec sâcko mâreŋ burocnaonec,
â mâreŋ sâqocnaonec wiac moc fisikac.
2 Ʒâŋe‐nane bâtâcneme wiac hâhâwicne kecʒiŋuc honepo:
Soroŋ qaqazi soroŋ qaocmu
â ima qaqazi ima qaocmu.
Elam, go ware fec, Media go somâ râec!
Babe haere erâ harac huacbuc ee i bâniniŋke‐fârezepac.
3 Irec buʒâic enarekac i ŋokac gozi kicjopame ʒâic manaeŋgopieŋ irec sâc;
no wiac i hone manac erâ maŋnane gâckeme bipic‐nane tarakac.
4 Maŋnane fâfârekac, bipic‐nane tarame weaŋkekopac;
no mârâc jaha owâ ririŋte manape biaŋke jujec
miŋecgac ine manape hâhâwicne ekac.
5 Tiwâ ʒepe bâmockeeŋgopieŋ,
fofo rumackeeŋgopieŋ,
nânâ opâ nâeŋgopieŋ.
Ajoc, ŋic fekicne ŋoŋe faharerâ
maro saŋ jâwec ruacneniŋ!
6 Wofuŋ e ʒiŋuc nazawec hâcne:
“Go ra ruc bapa ŋic âzâcnetec domahuc
wiac honeocmu sâc mufuazejec.
7 Ehuc ŋic jajaheczi becâsic jajahecko ŋehuc hehendeŋ wareŋgopieŋ,
me doŋgi birinehec me kamele birinehec,
iŋuc honec‐joparâ hazec râe‐jâmbâŋkezejec.”
8 Eme honec‐jopaweczi ʒiŋuc muhuc owackewec:
“O Wofuŋ, no ruc bapa ficko ʒoaŋ ʒora domaekopac
â dodoma‐naneo domahuc ŋafe sâc ʒâŋe fihuc juekopac.
9 Erâ manaŋgopieŋ, becâsicko ŋic jajahec
jajaheczi hehendeŋ ware fisiŋgopieŋ.”
Iŋuc murâ muwec: “Babe hae sâko tâtiewec,
tâtie‐jâmbâŋkewec hâcne;
ehame nemufâc‐ticne jaŋere ɋâŋ qâqâtâc i mâreŋko
henʒaŋ qanʒaŋ‐jopa‐fârekicne.”
10 O ŋicfâc‐nane sipiric‐ŋopakicne â âtenʒaŋ‐ŋopakicne,
Anutu Tâpiri Ɋuŋɋasaŋ Wofuŋ, Israere Anutu
eraonec dâŋ manapo i hâcne mufua‐ŋarekopac.
Edom mâreŋte okacdâŋ
11 Seiri mâreŋkonec ŋic moczi ʒiŋuc wira‐narekac:
“Ruc bapa ŋic, ŋafe bembeŋne me ʒoricne fokac?
Ruc bapa ŋic, ŋafe biac taraocmu me?”
12 Ruc bapa ŋiczi muwec:
“Hae i furezo ekac;
erâ dapâc fokac jaha.
Ŋoŋe wiac irec me irec manazo murâ mocwâc risie ware wionʒepieŋ.”
Arabia mâreŋte okacdâŋ
13 Dedaŋ ŋic, Arabia mâreŋ fotâcnehuc jueŋgopieŋ
ŋoŋe hae ŋafeme kâte qâhâcko waha guŋ fonʒepieŋ.
14 O Tema mâreŋ rune,
ŋoŋe opâre hâmoŋgopieŋ
jaŋe opâ gumec‐jopanʒepieŋ,
â wisehuc juŋgopieŋ
jaŋe nânâ jare gumec enʒepieŋ.
15 Jaŋe ʒikare wiseŋgopieŋ,
sâqe unuckekicne â tepe âpârekicne
â ʒikare tâpiri wânʒâŋ irec wiseŋgopieŋ hâcne.
16 Irec Wofuŋ e ʒiŋuc nazawec: “Jara moc, kiŋaŋ qaqa jaŋere jara dameŋ iŋucne, i tarazo eha Kedara ŋic ɋuŋɋasaŋ‐jeŋic sasawa omaeocmu.
17 Eme Kedara ŋicguru tepeŋicfâc‐jeŋic nâfocne juniŋmu jaŋere ʒare i afecne mac.” Wofuŋ, Israere Anutu eki iŋuc muwec hâcne.