22
Findaŋdâŋ mamana wâneŋ irec okacdâŋ
1 Ŋoŋe weniŋuc eŋareme ficbupuo fefârembiŋ,
2 hae‐ŋeŋic ojowa â fânâŋ sâkozi fusucmaekac
â ficsanaŋ‐ŋeŋicko ʒeri sâko foekac ŋoŋe.
Qâhâmoc‐jopakicnefâc‐ŋeŋic
jaŋe sâqezi mi âke hâmoc‐jopawec
â ʒikao mi jopakicne.
3 Micnefâcge jaŋe sasawa wise‐fârembiŋ,
jaŋe tepe moc mi qâtâcnehapie kâpâcwâru bacjopakicne,
â momorifâcge jaŋe ʒoricko wise‐bipiehapie
rocjoparâ niŋgiŋ‐jopa‐fârembiŋ.
4 Irec ʒiŋuc mukopac: “Norao mi fipie wareoc,
no ki kâcɋene kiozo ekopac;
ŋoŋe ŋicfâc‐nane sipiric‐jopakicne
irec mu bâmiriŋ enareniŋte ʒoɋac mi eniŋ!”
5 Wofuŋ, Anutu Tâpiri Ɋuŋɋasaŋ Wofuŋ eki hâcne mume
ʒoaŋ mocko findaŋdâŋ mamana wâneŋ ira
bipic tatara â ima qaqa
â maŋ bâsifuc‐ticnehec fuaocmu;
ehame qânâsac herickeocmu
â tikiopec owa sâko fuaocmu.
6 Eme Elamŋic jaŋe
tepe motec‐jeŋic biac hâniŋko râepie hume
keretac â becâsichec warehuc juŋgopieŋ,
â Kiriŋic jaŋe maro‐jeŋic sicnepie hukac.
7 Irec ʒiŋuc fuaocmu:
Wâneŋ biaŋge i ʒikare keretaczi fusucmaocmu
â momori becâsicko rarazi haesacte motâckopec
birickehuc domaniŋmu.
8 Ehame Judazi ŋeŋezic‐ticne basaocmu.
Ehuc dameŋ ira kâte bozeo ʒikare rowaŋ fokacko ʒâŋe fiocmu.
9 Eme Dawidire hae sâko irec qânâsac i fâucke ʒaŋ eme hawecne bocjaha fuame hone bâpiaŋ embiŋ â juwic riqickonec opâ fiambiŋ.
10 Erâ Jerusalemte ficbiri woserâ qânâsac bâpiaŋkehuc basanaŋkeniŋte fic wiac gâcne heropiembiŋ.
11 Erâ qânâsac jajahec jahere ŋondeŋko riqic raŋɋanere opâzi qâzuckeocte nombâŋ moc rombiŋ. Ehuc wiac i fuaocte giene bawec erao ʒâŋe mi fimbiŋ â i bâfuaocte mârâc mana biric ewec ere mi manasumbiŋ.
12 Anutu Tâpiri Ɋuŋɋasaŋ Wofuŋ, Anutu hâcne,
eki dameŋ ira kio wâwâsic â mu mamakuc eniŋte
â qizec susuc bâtâcneniŋte
â târuzi mateŋ barâ hepie huocte muŋarewec.
13 Ŋoŋe ine aŋac ʒeri faio juhuc
lama bulimakao qa hezuc ejarehuc
tiwâ bâzi â waiŋ opâ nâhuc
ʒiŋuc muŋgopieŋ i: “Tomâcko hâmonaŋmure
nânâ opâ nâjâmbâŋkezo!”
14 Irec Anutu Tâpiri Ɋuŋɋasaŋ Wofuŋzi
dâŋ kecʒiŋuc mume hazec‐naneo hume manapo:
“Kiŋ bahac keci jâmbomac moc mi ŋowac rozo,
foŋareha jaha hâmonʒepieŋ!”
Anutu Tâpiri Ɋuŋɋasaŋ Wofuŋ e iŋuc muwec.
Eliakimzi Sebena âkehockeocmu
15 Anutu Tâpiri Ɋuŋɋasaŋ Wofuŋzi kecʒiŋuc muwec: “Ajoc, go soŋaŋ keci, ʒâŋene Sebena, fic wiac soŋaŋkehuc juekac erao rarâ ʒiŋuc âzâcnec:
16 Go fuŋne wemocte ʒira juekic â mozi ʒira jugareme mutec ʒâŋeruŋ moc gore biŋe gufumbiŋ? Goki wama faio focmurâ mutec mâreŋ facnao, qânâ hâŋko ʒâŋeruŋge gufumbiŋ i.
17 Manakic, Wofuŋ e ŋic qac momori go wânʒâŋnehec tuŋguocmu erâ wâc sanaŋne rocguocmu.
18 Rocgurâ bârusucgume bali iŋucne etec wicgume mâreŋ qaratiekicnao racmu. Bomboŋgere kikefuŋ mimi qaqa ejareekic ŋic go mâreŋ ira hâmozemec â keretacfâcge eri‐jeŋichec ijaha omaenʒepieŋ.
19 No iŋuc ehuc soŋaŋ giege gowac rozepac, ehame fekicne jujuge omae‐garezejec.
20 No dameŋ ira kiŋaŋŋic‐nane Eliakim, Hilikiare ŋokâ, e wira hefârec ecnepemu.
21 Erâ gore gie ŋaqi i hecnepe huocmu â gore umbika jomacnehuc guriŋ bapagere tâpiri ere meo râepe foha Jerusalem hae rune â Judare kikefuŋ mamac ejarezejec.
22 No Dawidire kikefuŋte ki i ɋawenao ɋetickepe domaocmu, eme i bajuhuc motâc bâŋgoroŋkeme moczi mi basanaŋkeocmu me basanaŋkeme moczi mi bâŋgoroŋkeocmu.
23 Eme no wâtuŋ iŋucne mâreŋ sanaŋnao keteŋkepe domazejec, ehuc mamacnere kikefuŋte eri ŋeŋe erâ ŋezejec.
24 Ehame mamac‐ticnere kikefuŋ sâko irec tagi, naru motec, apa ŋosa, ʒocŋifec â ocfâc‐ticne, ŋic omane â ʒâŋe biŋehec jaŋe sasawa erao qohota‐fâreniŋmu.
25 Irec Anutu Tâpiri Ɋuŋɋasaŋ Wofuŋzi ʒiŋuc mukac: Dameŋ ira mâreŋ sanaŋnao wâtuŋ keteŋkekicne i rândiŋkerâ waha qaocmu, ehame erao qohotambiŋ jaŋe mâmâc waha qahuc qanʒaŋ‐jopaocmu, Wofuŋzi muwecte iŋuc fuaocmu.”