3
Wofuŋ e Juda mâreŋ â Jerusalem hae jahere dâŋ mutaraocmu
1 Wiac mananiŋ, Anutu Tâpiri Ɋuŋɋasaŋ Wofuŋ,
e Jerusalem haeonec â Juda mâreŋkonec
dope â rowaŋ furu jaha bârârieocmu,
nânâre rowaŋ sasawa
â opâre rowaŋ sasawa.
2 Ehuc ŋic tâpiri sâkohec â momori ŋic,
dâŋ mumutiŋ ŋic â porofete,
findaŋdâŋ mumu â ŋicsoŋaŋ;
3 erâ 50 gurune gurune jaŋere micne bapa,
ŋic ʒâŋe biŋehec â dâŋte micne,
metâ bapa â qaŋgec mamana saric,
jaŋe mâmâc bârâriec‐jopaocmu.
4 Iŋuc fuame mupe motec ɋârizi ŋicbomboŋ ejareniŋmu
â pepec‐jeŋicheczi guriŋ bajareniŋmu.
5 Eme guru sâko jaŋe fecko fec eec eniŋmu
i hahac ɋa â âgo bagozia eec eniŋmu;
socɋâri jaŋe ŋicqizec pepec ejareniŋmu,
â omanezi ŋicraŋɋa bawahac‐jopaniŋmu.
6 Eme moczi soctofa‐ticne, mamac‐ticnere guruonec,
erao qohotahuc ʒiŋuc âzâcneocmu:
“Go ŋaqi faine fogarekacte micne bapa junârec,
ehuc jawa guru kecʒi guriŋ bac.”
7 Mume eki dameŋ ira ʒiŋuc muocmu:
“No wic bâbâsomie gie mi bapemu,
ficnaneo nânâ mecne ŋaqi mecne basakopac,
irec ŋic jaŋere micne bapa mi mucnuzo.”
8 Jerusalem hae e fâfâckewec hâcne,
â Juda mâreŋ e rândiŋke qawec;
i dâŋjeŋiczi â eebapa‐jeŋiczi Wofuŋ râsi ecnehuc
eri ʒâŋe mai‐ticne gâc hecnembiŋ irec.
9 Jaŋe ra rowec ware rowec‐jeŋiczi mutaniŋ‐jopaekac,
Sodom ŋic iŋucne sindaŋ‐jeŋic mi hesoŋkehuc musaweeŋgopieŋ.
Jei, sisipiric‐jeŋic jaŋe jaŋac bâfuaŋgopieŋ.
10 Tiŋne juju jaŋere manape ʒerine ekac,
jaŋe sâcne juhâmoniŋmu,
eebapa‐jeŋicte fârine fuame ro nâc eniŋmu hâcne.
11 Sindaŋŋic ine jei! Harac huacbuc fuacneocmu,
meticnezi wiac ewec sâc
ijaha ecnezo hâcne.
12 Ojai, ŋicfâc‐nane ɋienezi bâʒâic‐jopaeŋgopieŋ
â ŋokaczi mumutâcfâc‐jeŋic eŋgopieŋ.
O ŋicfâc‐nane, micnefâc‐ŋeŋic jaŋe qac qâsoric ehuc
hata rara‐ŋeŋic hesifucke‐ŋarembiŋ.
13 Wofuŋ e mumutara gie‐ticne baocte faharejec,
ŋicfâcne dâŋjeŋic mutiŋneocte domakac.
14 Wofuŋ e ŋicfâcne jaŋere soŋaŋ micnefâc
dâŋko râec‐joparâ ʒiŋuc muhuc fuŋne‐jeŋic ritukac:
“Ŋoŋe hâcne waiŋ gie ima bambiŋ,
hapetac wiac jowac rokicne i ficŋeŋicko fokac.
15 Ŋoŋe weniŋucte ŋicfâc‐nane ro waha âte ejareŋgopieŋ,
ehuc qarâ suriŋne ʒâŋe mai‐jeŋic qanʒaŋneŋgopieŋ?”
Anutu Tâpiri Ɋuŋɋasaŋ Wofuŋ Anutu ere dâŋ iŋuc.
Zioŋte otâfâc jaŋere mumutara dâŋ
16 Wofuŋzi ʒiŋuc mukac:
Zioŋte otâfâc jaŋe sahac fefe eeŋgopieŋte,
â upe qahuc rac warec jueŋgopieŋte
â ruruc bâbâc ehuc ʒâŋe fieŋgopieŋte,
erâ dameŋ sâc enʒic emoric jueŋgopieŋte,
â kike okac rojueŋgopieŋte,
17 irec okacne Wofuŋzi Zioŋte otâfâc utu karuc bâfua‐jareocmu,
erâ ŋaqi heutu‐jareme biuctac domaniŋmu.
18 Ʒoaŋ ira Wofuŋzi eri‐jeŋic jowac roocmu, kike okac â ʒânoŋ bebesa â ajo mata
19 hazec pâŋi â megâŋ â rurufa qâreŋ
20 qizec eri â maŋguc bâroŋ â umbika; opâ âsu mumundoŋ â qaŋgec seroŋ,
21 meo fefe â sâke maŋŋuruc,
22 hombaŋ ŋaqi â hoe ŋaqi, mâŋâŋ qoruc â kâdoc,
23 hawari hohone â ombâŋ ŋaqi, duʒora â qârufac.
24 Wiac i jowac rofâreha
âsu mumundoŋte okacne âsu gârec fuaocmu,
â umbikare okacne repa;
qizec gerere okacne utu pârâc fuaocmu,
ŋaqi qâreŋ biaŋte okacne târu wamba,
â sahac hawari biaŋte okacne mimi.
25 Ŋicfâcge damuzi kimiziec‐jopaocmu,
qac momorifâcge ʒikazi omaec‐jopaocmu.
26 Eme Zioŋte sacmotâc qoroc hefâreocmu,
â tuhu fuaha jahacne makuerâ mâc ŋeocmu.