4
1 Eme dameŋ ira ŋokac 7 jaŋe ŋic mocjaha ro basanaŋkerâ ʒiŋuc âzâcneniŋmu: “Nânâ i nâŋe nâŋâc bâfuarâ nanaŋmu, â ŋaqi wâc nâŋe nâŋâc bâfuarâ rojunaŋmu; mocjaha mana‐nâretec ʒâŋege rorâ bajunʒepeneŋ, eme mimi faio jueŋgopeneŋ i tarazejec.”
Jerusalemte ʒâŋe rara biaŋ fuaocmu
2 Dameŋ ira Israe maŋnao ʒikare uucne juniŋmu jaŋere biŋe Wofuŋte giteczi hawari biaŋ â erinehec fuaocmu, â mâreŋte fârinezi ʒeri aŋac bâfua‐jareocmu.
3 Eme Zioŋko nâfocne juniŋmu â Jerusalemko tiwâne ŋec juc eniŋmu jaŋe tiri mujarezo, Jerusalem haeo juniŋte qâreŋ‐jopakicne sasawa jaŋe hâcne.
4 Ine qanaŋ Wofuŋzi Zioŋte otâfâc wânâŋ‐jeŋic ʒure ɋaɋackeocmu, â Jerusalem haeo socte kiŋ fokac i bâbâtiŋte â ʒaʒataniŋte mârozi ʒumururuckeocmu.
5 Eme Wofuŋzi Zioŋ tikire hae mâreŋ â tutumaŋ irec faicnao ʒoaŋko karorac bâfuaocmu â ŋafeo hosâc â ʒocbâruŋ bâfuaocmu; Wofuŋte eri tatamaczi hâcne ŋic â wiac sasawa irec faicnao fohuc sabec‐joparâ sâoc‐jopaocmu.
6 Izi ʒoaŋko fârorocte mumuc qajareocmu, erâ wâc hoe mâŋâŋte ŋezic‐jopahuc sâoc‐jopaocmu.