35
Israe ŋic jaŋe mame sâko hae‐jeŋicko risieniŋmu
1 Tuhu mâreŋ â mâreŋ burocne jahe kiwac qawac ezepirec
â mâreŋ sawa i ʒeri ezejec,
ehuc faroqac iŋucne âri qazejec.
2 Ârine mâretec fuame ʒeri bari ehuc gae hezejec.
Lebanoŋte ʒâŋe rara erâ Karamele tiki
â Saroŋ wâneŋte eri qaraweŋ fuacnezejec.
Jaŋe Wofuŋte ʒâŋe rara
â Anutu‐nâŋecte eri qaraweŋ honenʒepieŋ.
3 Mejeŋic betaŋkekicne â dieŋ‐jeŋic sâqorekicne
jaŋe dopec‐jopahuc basanaŋ‐jopapie
qiŋ herâ domanʒepieŋ.
4 Ehuc maŋjeŋic gâckekicne jaŋe ʒiŋuc jazaniŋ:
“Ŋoŋe hâbi‐ŋeŋic hepie hume hâhâwic tâmiric junʒepieŋ.
Manaŋgopieŋ, Anutu‐ŋeŋic e jukac!
E okac babazu gie baocte fisiocmu;
Anutu ŋic okacne jareekac
e hâcne ware bafic‐ŋopaocmu.”
5 Iŋuc fuame tiŋtuŋ jaŋe ʒâŋe fifi eniŋmu
â qepoŋ jaŋe hazec‐jeŋic uŋtoocmu.
6 Puriŋ jaŋe kâte bulimakao iŋucne gasackeniŋmu
â nâŋguŋ jaŋe nameŋ‐jeŋic forisieme ʒeri gae heniŋmu.
Manaŋgopieŋ, mâreŋ burocnao opâ ʒâŋene
â mâreŋ sawao opâ sâko fuarâ foraocmu.
7 Ehame dameŋ juwicnao mâreŋ opâ tâmiric fowec
ira riqic fuarâ foocmu
â kereŋke hahaŋ ekicnao
opâ ʒâŋene wefuocmu.
Mârâc kâte qâto jaŋe juju fofo embiŋ ira sohoŋ fuaocmu
â sopâc irec okacne saparac â ʒamac ʒamac wefuocmu.
8 Eme ira hata sâko hewâneŋkekicne moc fuame
ʒâŋene “Tiri Hata” muzo.
Ŋic hehesicne jaŋe ira moc mi âtehuc juhapie
ŋicfâc‐ticne jaŋere biŋe sawa foocmu.
Ehame jaŋe ira rahapie ŋic mutucnezi kosa rac warec mi enʒepieŋ.
9 Laioŋ jaŋe ira moc mi juniŋmu
â qowi mimicnezi wâc mi âteniŋmu,
jaŋe ira basac‐jopazo;
ehame batarac‐jopakicne jaŋe ine ira rahuc juniŋmu.
10 Â Wofuŋzi rambaŋko râec‐jopawec jaŋe ira risieniŋmu,
erâ Zioŋko fisirâ aŋara heniŋmu;
ehame bubiaŋ fofo sanaŋzi fua‐jareocmu,
ʒeri â bubiaŋ fua‐jareme busâqoc â kio husezi omaeocmu.