36
Asiria ŋicwofuŋ Sanheribezi râsi fisiwec
(Ŋic II 18:13–37; Bin II 32:1–19)
1 Hisikia e ŋicwofuŋ juha jara 14 eme Asiria ŋicwofuŋ Sanheribe eki râsi fisirâ Judare hae basanaŋkekicne sasawa ro rauc ewec.
2 Erâ Asiria ŋicwofuŋ e Lakisi haeo ŋehuc Rabasake â momori bocjaha Hisikiarao sorec‐jopame Jerusalem haeo rambiŋ. Eme micne e faicpec riqicte opâwâc qoruc qaqajac ŋic ere mâreŋ heririŋnao hata sâko fokac ira ra domawec.
3 Domahame ŋic kecʒiŋuc jaŋe erao rambiŋ: Ŋicwofuŋ ficte micne sâko Eliakim, Hilikiare ŋokâ hâcne, â qâqâreŋ ŋic Sebena erâ Asafare ŋokâ Joa micne sâko‐jeŋic hâcne.
4 Eme Rabasakezi ʒiŋuc jazawec: “Hisikia âzâcneniŋ, ŋicwofuŋ sâko, Asiria ŋicwofuŋ hâcne, e ʒiŋuc mukac: ‘Ʒi wemo wiaczi dapeŋ egareha roweckehuc juekic?
5 Go manatec dâŋ sawazi ʒikare mamana â tâpiri bâfuaocmu ekac me? Go morao roweckehuc no râpecnumeŋ?
6 Ojai, go kâcbiŋ gunu herickekicne keci, Aigita hâcne, erao roweckekomec; eme gunu ira roweckeeŋgopieŋ jaŋe mejeŋic âke mârâŋkeekac i. Eme Aigita ŋicwofuŋ Farao e ŋic sasawa erao roweckeeŋgopieŋ jaŋe iŋuc hâcne ejareekac.
7 Go ʒiŋuc mecne nazacmu, “Nâŋe Wofuŋ Anutu‐nâŋec erao roweckeeŋgopeneŋ.” Hâc, eme weniŋuc? Hisikia e furu mâreŋ â Wofuŋ taha babacnere alata wiac ŋerawec i bârâriehuc Juda â Jerusalem ŋic ʒiŋuc jazawec, “Ŋoŋe alata kecʒirec maŋfuŋko sawa dapehuc numunʒepieŋ,” Wofuŋ Anutu ere mukomec me?
8 Ajoc, bomboŋ‐nane, Asiria ŋicwofuŋ hâcne, ehec fuŋne babataniŋ gie banic me! Eme honenaŋ: No becâsic 2 tauseŋ garepemu, goki ine becâsicko rara ŋic irec sâc jaha sâcne bâfuac‐jopacmu me weniŋuc?
9 I eipiehuc ine wemocko bomboŋ‐nanere kiŋaŋŋic wawahane jaŋeraonec momori micne mocjaha mac sâcne jâpetec risieocmu? Eme go iŋucnezi ine keretac â ŋic becâsicko rarare Aigita jaŋerao ʒâŋe fihuc juekic!
10 Me weniŋuc? No Wofuŋzi mi mana‐nareha mâreŋ ʒi râsi ecnehuc ima qapemurâ wefupo me? Aricne, Wofuŋ e ʒiŋuc nazawec: Go ferâ mâreŋ keci râsi ecnehuc ima qazemec!’ ”
11 Eme Eliakim â Sebena â Joa jaŋe Rabasake ʒiŋuc âzâcnembiŋ: “Kiŋaŋŋicfâcge nâŋe Aramaio dâŋko dâŋ nâzâzemec, nâŋe dâŋ i sâcne manaŋgopeneŋ; ŋic ŋokac qânâsacko ŋeŋgopieŋ jaŋere maio nâŋehec Hebiraio dâŋko muc manac mi ezemec.”
12 Rabasakezi ine muwec: “Hâc, dâŋ bajukopac i bomboŋ‐nanezi ŋoŋe â bomboŋ‐ŋeŋic ŋoŋe sawa ŋazapemurâ sorecnuwec me? Aricne, e ŋic qânâsacko ŋeŋgopieŋ â ŋoŋehec mâmâc ho fâzi‐ŋeŋic nâniŋte mukicne jaŋerao mâmâc mupemurâ sorecnuwec.”
13 Rabasakezi iŋuc murâ ra mai domahuc Hebiraio dâŋko hahaŋne bahuc ʒiŋuc muwec: “Ŋicwofuŋ sâko, Asiria ŋicwofuŋ hâcne, ere dâŋ mananiŋ! Eki ʒiŋuc mukac:
14 ‘Ŋoŋe Hisikia manacnepie mi eatuc‐ŋopazejec, e nore meonec batarac‐ŋopaocte tâpiri mi focnekac.
15 Erâ ʒiŋuc muhuc Wofuŋtao roweckeniŋte ŋazame mi mananʒepieŋ wâc: “Wofuŋ e jâmbomac batarac‐nâpoocmu, ehuc hae sâko ʒi Asiria ŋicwofuŋte meo feocte mi manaocmu.”
16 Asiria ŋicwofuŋzi ʒiŋuc mukacte Hisikia dâŋticne mi mananʒepieŋ: Ŋoŋe nohec wama babac erâ haeonec wahanʒepieŋ; iŋuc erâ ŋoŋe sasawa ŋaŋacne waiŋ â nemuja nâhuc junʒepieŋ, erâ opâ i ŋaŋacne nombâŋkonec fiarâ nâhuc junʒepieŋ wâc.
17 Iŋuc ehuc juhapie noni fâ fisirâ mâreŋ mocko jowac‐ŋopa rapemu, mâreŋ i ŋaŋacne mâreŋ iŋucne, ira padi mecne, waiŋ mecne, nânâ mecne â waiŋ gie mecne forakac hâcne.
18 Hisikiazi ʒiŋuc muhuc maŋ bâsifuc mi eŋarezejec: “Wofuŋzi batarac‐nâpoocmu.” Ŋicguru gâcne jaŋere nemuzi mâreŋ‐jeŋic Asiria ŋicwofuŋ ere meonec moc batarambiŋ me?
19 Hamati â Arapada hae jahere nemufâc weni? Sefarawaim haere nemu jaŋe weni? Â Samaria mâreŋte nemufâc jaŋe weni? Jaŋe Samaria nore meonec moc batarambiŋ me?
20 Me mâreŋ irec nemu sasawa jaŋeraonec mozi mâreŋ‐ticne nore meonec batarawecte Wofuŋzi Jerusalem hae nore meonec bataraocte muŋgopieŋ?’ ”
21 Jaŋe ine mâc fâsâerâ domahuc dâŋ moc mi bâtikiecnembiŋ, i ŋicwofuŋte dâŋ moc ʒiŋuc fowecte iŋuc embiŋ: “Ŋoŋe dâŋ moc mi bâtikiecnenʒepieŋ.”
22 Eme Hilikiare ŋokâ Eliakim, ŋicwofuŋ ficte micne juwec, e â qâreŋŋic Sebena erâ Asafare ŋokâ, micne sâko Joa hâcne, jaŋe ŋaqi‐jeŋic bâsuckerâ Hisikiarao risierâ Rabasakezi dâŋ muwec irec binaŋ bacnembiŋ.