37
Judaŋic Sanheribe ere meonec batarac‐jopakicne
(Ŋic II 19:1–37; Bin II 32:20–23)
1 Eme ŋicwofuŋ Hisikia e dâŋ i manarâ ŋaqi‐ticne bâsuckerâ târuzi mateŋ heme hume Wofuŋte ufuŋko fewec.
2 Erâ ŋicwofuŋ ficte micne Eliakim â qâreŋŋic Sebena erâ taha bapa kâcɋene sasawa jaŋe wâc târuzi mateŋ hepie hume Amozire ŋokâ, porofete Jesaja hâcne, erao sorec‐jopame rambiŋ.
3 Rarâ âzâcnembiŋ: “Hisikiazi ʒiŋuc mukac: ‘Ʒoaŋ ʒizi fuŋmoc, fific guguriŋ â bâbâtiŋ erâ miminehec, erâ naru motec fuazo ehapie ŋokac jaŋe rocjopaniŋte eipieŋgopieŋ irec sâc.
4 Rabasake e Anutu jujune musoriŋkeocte bomboŋ‐ticne, Asiria ŋicwofuŋ hâcne, eki soreme ware dâŋ muwec i Wofuŋ Anutugezi manawec mecne; manawecko mume okacne fuacnezejec. Irec go ŋic nâfocne juŋgopieŋ jaŋere erâ numuzemec.’ ”
5 Eme ŋicwofuŋ Hisikia kiŋaŋŋicfâcne jaŋe Jesajarao fisimbiŋ.
6 Fisipie Jesajazi ʒiŋuc jazawec: “Bomboŋ‐ŋeŋic âzâcneniŋ, ‘Wofuŋzi ʒiŋuc mukac: Asiria ŋicwofuŋ kiŋaŋŋicfâcne jaŋe musoriŋnuhuc dâŋ mupie manameŋ irec mi hâwicguzejec.
7 Manakic, no maŋ bâsifuc ecnepemu eme sawadâŋ manarâ mâreŋ‐ticnao risiezejec, risieme mupe e jahacne mâreŋko ʒikare nânâ ezejec.’ ”
8 Asiria ŋicwofuŋzi Lakisi hae biac behewec, Rabasake e risiehuc dâŋ iŋuc manarâ ra Libina hae rune jaŋehec qaqac eha bâfuawec.
9 Asiria ŋicwofuŋ e Etiopia ŋicwofuŋ Tirihaka ere dâŋ biŋe ʒiŋuc manawec: “E gohec ʒika qaocte biac warehuc jukac.” Eme iŋuc manarâ Hisikiarao ʒiŋuc muhuc kiŋaŋ râec‐jopame rambiŋ:
10 “Ŋoŋe Juda ŋicwofuŋ Hisikia ʒiŋuc âzâcneniŋ: ‘Anutugezi mi eatucguzejec; go erao roweckehuc ʒiŋuc mukicte mukopac: Jerusalem haezi Asiria ŋicwofuŋ ere meo mi feocmu.
11 Manakic, Asiria ŋicwofuŋ jaŋe mâreŋ sâc wiac qacne gâpâcne ejarehuc sipiric‐jopambiŋ i go gahac biŋene manameŋ. Irec go wemocko sisipiriczi hetiricguocmu?
12 Me mamacfâc‐nane jaŋe ŋic gurune gurune bâsirowec‐jopambiŋ i jaŋere nemuzi moc bafic‐jopambiŋ me? Ine Goʒaŋ, Haraŋ, Rezefe â Edeŋ hae rune Telasa mâreŋko jumbiŋ jaŋere mukopac.
13 Me Hamati â Arapada â Sefarawaim â Hena â Iwa hae i jaŋere ŋicwofuŋ jaŋe weni?’ ”
14 Eme Hisikia e kiŋaŋ fisimbiŋ jaŋere meonec papia rorâ wosehuc Wofuŋte ufuŋko ferâ Wofuŋte maio qaratiewec.
15 Qaratierâ ʒiŋuc muhuc Wofuŋ numucnewec:
16 “Anutu Tâpiri Ɋuŋɋasaŋ Wofuŋ, Israere Anutu, go kerubim jaŋere faicnao ŋehuc juekic, go mocjahazi mâreŋ ŋicne ŋicne jaŋere Anutu, goki hâcne sambâŋ â mâreŋ bâfuac‐jofameŋ.
17 O Wofuŋ, go hazec râerâ manac; o Wofuŋ, ʒâŋe firâ honec; erâ Sanheribezi Anutu jujune go musoriŋguocte dâŋ râeme warewec i mana‐fârezemec.
18 O Wofuŋ, Asiria ŋicwofuŋ jaŋe jâmbomac ŋicne ŋicne mâreŋ‐jeŋichec imac‐jopambiŋ.
19 Ehuc nemuɋâŋ qâqâtâcfâc‐jeŋic i ʒocko behec‐jopapie ʒacjopa‐fârewec; jaŋe nemu fârine aricne, jaŋe jâc â qânâ, ŋicmezi ba akic ekicne hâcne; irec bâsirowec‐jopaniŋte mi eipiembiŋ.
20 O Wofuŋ, Anutu‐nâŋec, ʒi ine ere meonec batarac‐nâpoc, eme mâreŋ ŋic gurune gurune jaŋe gore ʒiŋuc mana taranʒepieŋ: Wofuŋ e mocjahazi Anutu.”
21 Eme Jesaja, Amozire ŋokâ hâcne, e Hisikiarao dâŋ ʒiŋuc râeme rawec: “Wofuŋ Israere Anutu eki ʒiŋuc mukac: Go Asiria ŋicwofuŋ Sanheribe ere numu‐naremeŋ.
22 Eme irec Wofuŋzi ere dâŋ ʒiŋuc mukac:
‘Ŋokac ʒeŋoŋ, Zioŋte otâ hâcne,
e qaisocguhuc mu âke sisic egarekac,
â Jerusalemte otâ eki râpefuŋgao gâwie‐garekac.
23 ‘Go mo âke sisic ecnemeŋ â mo sâke itic ecnemeŋ?
Go mo musoriŋkehuc penaroŋ ʒâŋe fitec fewec?
Israere Tiri rune no hâcne iŋuc enaremeŋ!
24 Go kiŋaŋŋicfâcge jaŋere micko dâŋ râehuc
Wofuŋ no musoriŋnumeŋ, ehuc mumeŋ,
No keretac‐nane bocjahare tiki botâŋne fefârepo,
erâ Lebanoŋ qaŋeŋnao fisipo.
No jâmâzâc‐ticne ʒoricne ʒora
â wetejâc‐ticne biaŋne i qafarapo;
no tiki‐ticne ʒoricne ʒora fejâmbâŋkepo
â jâckâte‐ticne fârine ira wâc hupo.
25 No nombâŋ rope opâ fuame nâpo,
erâ kike tape‐nanezi Aigita mâreŋte opâ sâko sasawa
âtec‐jopape kereŋ seŋseŋkembiŋ.
26 ‘No iŋuc fuaocte esecne manape fowec
â mârâc sasac jaha mana biric epo i go mi manameŋ me?
Ʒi ine mupe fuakac,
eme go hae sanaŋ ima bacjopatec tuhu fuazejec.
27 Ŋecjucfâc‐ticne jaŋe ine tâpiri‐jeŋic wahame
fâfârehuc qurutuambiŋ,
jaŋe gieo monʒaŋ wiac â kecɋaŋ geune
erâ wâc ficbupuo hofâ qinʒiŋ fuarâ soka sokahuc
jaha ururuckeekac, irec sâc embiŋ.
28 ‘Go waha ŋeekic me fahare raekic me ware fisiekic
i no manaekopac,
erâ kimbeŋ qahuc râsi enarehuc juekic
i kâuc mi baekopac wâc.
29 Go râsi enarehuc jukicte
â pepec penaroŋgere biŋe hazec‐naneo huwecte
no hawic‐nanezi sâkegao hehawicguhuc
micko kiki‐nane micgao râepe raʒime
hata waremeŋ ijaha egarepe risie razemec.’
30 “Eme wiac kecʒiŋuczi Hisikia go ma egarezejec: Jara ʒirec maŋnao wiac sasawa e jahac fuakac i nânʒepieŋ, jara faicnao sâc ijaha enʒepieŋ, erâ jara namba 3 ira ine ŋoŋe ŋaŋac he sarac â qa roro enʒepieŋ, ehuc waiŋ gie sarapie fârine fuame nânʒepieŋ.
31 Eme Juda kikefuŋte ʒikare nâfocne juniŋmu, ŋic ʒanʒaŋne hâcne, jaŋe juwicpec gâtâ mocwâc baniŋmu â faicpec fârine bâfuaniŋmu.
32 Eme Jerusalem haeonec ŋic ʒanʒaŋne â Zioŋ tikionec ʒikare nâfocne jaŋe ŋeratierâ juniŋmu hâcne. Anutu Tâpiri Ɋuŋɋasaŋ Wofuŋ ere ʒoɋaczi wiac iŋuc bâfuaocmu.
33 “Irec Wofuŋ e Asiria ŋicwofuŋte ʒiŋuc mukac: E hae kecʒirec maŋnao mi wefuzejec, ehuc tepe wâc qâtâcneme maŋnao mi fisizejec, erâ marohec warerâ sac huckeocte ʒae mi bazejec.
34 E hae ʒirec maŋnao moc mi wewefu hata ware fisiweckoa risiezejec, Wofuŋte dâŋ iŋuc.
35 Iŋuc ecnehuc no nahacnere â kiŋaŋŋic‐nane Dawidi ere erâ hae ʒi ŋezickehuc râsire meonec batarapemu.”
36 Eme Asiria momori jaŋe teuŋ‐jeŋicko tumaŋnerâ ŋehapie Wofuŋte aŋelozi fua‐jarerâ ŋic 185 tauseŋ qâhâmoc‐jopawec, eme hae fureme ŋic gâcne jaŋe faharerâ mi qâŋɋâŋ sasawa forapie honec‐jopanʒepieŋ!
37 Iŋuc fuame Asiria ŋicwofuŋ Sanheribe e hae i beherâ mâreŋ‐ticnao risie rawec erâ Niniwe haeo ŋec juc ewec.
38 Eme ira dameŋ mocko nemu‐ticne Nisiroka ere ufuŋko numuhuc juhame ŋokâ jahec‐ticne Adiramelec â Sareze jahe ʒikazi qâhâmopic. Eme Ararata mâreŋko wisepire ŋokâ‐ticne Esahadoŋ eki tucticne qarâ ŋicwofuŋ juwec.