5
Waiŋ giere kesaic dâŋ
1 Ajoc, manahapie joroc âgo‐nane gae hecnepe,
âgo‐nane waiŋ jufu‐ticnere gae hâcne.
Joroc âgo‐nane e waiŋ jufu moc rauckewec,
i mâreŋ facne guec wokemaŋnehecko fowec.
2 E mâreŋ heruerâ qânâ rome waha‐fârewec,
erâ waiŋ mucne biaŋne i sarawec;
e ʒâʒâŋiŋko qânâfic ʒora bafewec,
â waiŋ bâbâpisicte oto sâko wâc ba akic ewec.
Iŋuc eku waiŋ hândâŋ fuaocte woŋec juwec,
eme fârine ine waiŋ hândâŋ ʒaʒacne fuawec.
3 Ajoc, Jerusalem hae fâri
â Juda mâreŋ rune,
waiŋ jufu‐naneo me no nahacnao dâŋ fokac i mutaraniŋ!
4 No waiŋ jufu‐nane gie bacnehuctecne
wenimoi moc hetarape fowec?
Irec fârine bâfuaocte ʒâŋe fihape,
weniŋucte waiŋ hândâŋ ʒaʒacne fuawec?
5 Eme ʒi waiŋ jufu‐nane mâsi ecnepemu,
i mufua‐ŋarepe mananiŋ.
No rârec rârec kamacsac fokac i bârâriepe
qowi jaŋe fisi rehacne nâniŋmu;
erâ wâc qânâsac‐ticne hetâtiepe
ŋiczi fisirâ âtenʒaŋneniŋmu.
6 No behepe foku uupic wânʒâŋ fuazejec,
tieŋne bâtâcne emasaŋ mi ezo
â fuŋne mâreŋ mi hecnezo
eme hofâ â fâpâ wiaczi bârârâŋneocmu;
erâ karorac wâc aka hecnepe
hoezi moc mi bâgunuckeocmu.
7 Anutu Tâpiri Ɋuŋɋasaŋ Wofuŋ e waiŋ jufu‐ticne
i Israe kikefuŋ guruzi ekac;
Juda mâreŋ irec ŋic
jaŋe jufu biaŋ‐ticne eŋgopieŋ.
Eme bâbâtiŋte ʒâŋe fiha
wemo wiac fuawec? Ʒika!
Tiŋne jujure ʒâŋe fiha
wemo wiac fuawec? Ki uu!
Ŋic sindaŋne jaŋere okacdâŋ
8 Jei, ŋic keci jaŋe! Ficne ficne kâŋgâc ro rauc eraŋgopieŋ
â giene giene ro sakac efâreŋgopieŋ,
ekupie sawane moc mi foocmu,
jaŋezia hae mâreŋ i rucke‐fâreniŋmu.
9 Anutu Tâpiri Ɋuŋɋasaŋ Wofuŋ ere dâŋ nore hazecko huwec ine ʒiŋuc:
“Jâmbomac, fic bocjahazi tuhutac ŋeraniŋmu,
ficsâko, ficbiaŋ i ru tâmiric sasawa efâreocmu.
10 Waiŋ jufu gie dâkâne 10 sâko irec fârine fuaocmu
i pake mocjaha irec sâc sawa;
â padi ukic târu moc saraniŋmu
irec fârine fuaocmu ine râqâc mocjaha irec sâc sawa.”
11 Jei, ŋic keci jaŋe! Furicte faharerâ
izia opâ momori nâniŋte harac eeŋgopieŋ,
erâ ŋafeo dameŋ ʒora waiŋ nâhuc ŋekupie
maŋjeŋic fârorocke sâqoreekac.
12 Jaŋe tiwâ ʒepec‐jeŋicko waiŋ nâhuc,
gita kâriŋɋaŋ â woŋgâŋ qahuc mimi ŋokac ficneeŋgopieŋ,
Wofuŋte eebapare ine mi manasuhuc
meqâreŋ‐ticnere ʒâŋe mi fieŋgopieŋ.
13 Irec râsi jaŋe ŋicfâc‐nane acmâc jaha
niŋgiŋ‐joparâ bacjopa raniŋmu;
ŋicbomboŋfâc‐jeŋic nânâre hâmoniŋmu,
â ŋic guru dindiŋfâc‐jeŋic opâre sipirickeniŋmu.
14 Irec hâmoc hae e ŋic âmbâŋ nânâ iŋucne,
e michawec‐ticne aŋke sâqorekac,
ehuc Jerusalemte fekicne guru
â omane guru ɋâcjopakac,
erâ maŋnao ojowa qahuc foeŋgopieŋ
â ʒeri bari ehuc domaeŋgopieŋ jaŋe mâmâc.
15 Eme ŋic badapec‐jopazo
â ŋicne ŋicne bawahac‐jopazo
â penaroŋ ʒâŋe fieŋgopieŋ jaŋe maŋhuhuŋ eniŋmu.
16 Anutu Tâpiri Ɋuŋɋasaŋ Wofuŋzi ine bâbâtiŋ gie‐ticnere faio fekicne erâ domaocmu,
Tiri Anutu e tiŋne‐ticnere fuŋne bataniŋkeme
tiri juju‐ticne tâtâc fuaocmu.
17 Eme lama jaŋa jaŋe jaŋacne mâreŋko tinac qinʒiŋ nâniŋmu,
â jabanezi mafaŋic jaŋere tuhuo nâ gapec eniŋmu.
18 Jei, ŋic keci jaŋe! Eeatucte repazi hehesic fâreeŋgopieŋ,
keretacte repazi tinac sâqocne fâreeŋgopieŋ.
19 Ehuc ʒiŋuc mueŋgopieŋ: “E fâro baoc me,
gie‐ticne ʒocnehec bame honenaŋ me;
Israere Tiri rune mumupaŋ‐ticnere fârine bâqiŋ‐nâpohuc ware fisime ʒâŋitanaŋ!”
20 Jei, ŋic keci jaŋe! Sâqocne mumbiaŋkehuc
biaŋne musâqoreeŋgopieŋ,
dâpâcte tatamac muhuc
tatamacte dapâc mueŋgopieŋ,
hâtânere nocne muhuc
nocnere hâtâne mueŋgopieŋ.
21 Jei, ŋic keci jaŋe! Jaŋacnere manapie
maŋɋârâŋhec juŋgopeneŋ eekac,
â jaŋacnere manapie
wiac mana tarahuc eŋgopeneŋ eekac.
22 Jei, ŋic keci jaŋe! Waiŋ nânâre sawa ʒoɋac sâko eeŋgopieŋ,
â opâ momori bâmockeniŋte sawa ɋicwânʒâŋ eeŋgopieŋ;
23 bâbâmiriŋ moneŋte erâ ŋic bahachec dâŋ mutaracneeŋgopieŋ,
ehuc ŋic bahacmâc ine tiŋne juju‐ticne mi mutaniŋkeeŋgopieŋ.
24 Irec ʒoczi sopâc nanameŋkerâ ʒâseŋkeekac,
â kecɋaŋ hâmocnezi ʒocbâruŋko omaeekac,
irec sâc gâtâ‐jeŋiczi gârecke ʒaŋ eocmu,
â âri‐jeŋiczi rufe tinac ŋeiŋneocmu;
jaŋe Anutu Tâpiri Ɋuŋɋasaŋ Wofuŋte sâcmutâc hetapaickembiŋ
â Israere Tiri rune mana suambiŋte iŋuc fua‐jareocmu.
25 Irec Wofuŋte kimbeŋzi ŋicfâcne bâruŋke‐jarewec,
erâ meticne wickerâ hecjopawec,
eme tiki jaŋe ɋiɋiteckembiŋ;
â qâŋɋâŋfâc‐jeŋic jawa iŋucne erâ hae ʒoŋao forambiŋ.
Eme sifu kimbeŋ‐ticnezi mi qaʒue wahawec,
â menezi mi betaŋkehuc qiŋ herâ domakac jaha.
26 E ŋicguru moc taicko juŋgopieŋ
jaŋe qeŋ qajareme mananiŋmu,
erâ mâreŋ qaŋeŋnao juhapie woric‐jopaocmu.
Eme honeniŋ, ɋeŋnea ʒocnehec fisiŋgopieŋ!
27 Ŋondeŋ‐jeŋicko moczi moc mi betaŋkekac
me rândiŋkezo ekac,
ŋeŋemana me guŋ fofo i arictac,
umbika‐jeŋic moc mi goroŋkekac,
kikehuhu‐jeŋicte mucne moc mi tâcnekac.
28 Tepe motec‐jeŋic qâteckekicne,
tepe neŋgoc gurutucne fârepie bâmbâŋ qakac,
becâsicfâc‐jeŋic jaŋere kike ʒârâic buse tinac,
keretac ʒafeŋgâŋne oorâŋ mâŋâŋ tinac forisiekac.
29 Owa‐jeŋic laioŋ ŋokacnere owa iŋucne,
laioŋ socɋâri tinac owackeŋgopieŋ;
ŋuruŋkehuc qowi‐jeŋic kirâ bawiseŋgopieŋ,
eme moczi moc mi jowac roocmu.
30 Eme irec erâ ʒoaŋ ira fânâŋ sâko fuaocmu
i hâwec siri sâko irec fânâŋ iŋucne.
Ehame mâreŋko ʒâŋe firâ honezo,
mi dapâc hâhâwicne fuazejec i!
 tatamac i wâc hâweŋ karoraczi sâockekume
dadapâcne jaha fuaocmu.