50
1 Wofuŋ e kecʒiŋuc mukac: “Hâc, neŋgoc‐ŋeŋic behehuc
sorepo irec pasi weni?
Me mo ŋictao tofa‐nane fowecte
erao furire erâ qikiŋ‐ŋopazapo?
Manaŋgopieŋ, no sâqocne‐ŋeŋicte erâ qikiŋ‐ŋopapo
â neŋgoc‐ŋeŋic e sindaŋ‐ŋeŋicte erâ sorepe rawec.
2 No wemocte warerâ ŋic moc mi bâfuac‐jopapo,
no wemocte wirape micnaneo moc mi rombiŋ?
Menane bâmbembeŋkekicne irec fifirue gie sâcne mi bapemu me?
Me babatara gie bazore tâpiri‐nane omaewec me?
Manaŋgopieŋ, hahanec dâŋnanere hâwec kereŋkeocmu
â opâ sâko jaŋe ʒickerâ kereŋkeniŋmu,
eme qowifâcne jaŋe opâ basahuc hâmo gârec erâ âsu finiŋmu.
3 No sambâŋ i dapâczi foŋkepemu
â târu hecnepe hurâ ŋaqi‐ticne eocmu.”
Wofuŋte kiŋaŋŋic micrereŋhec
4 Wofuŋ Anutuzi ŋic betaŋkekicne mu keteŋ ejarepemurâ
micnane baafeckewec.
E furic sâc wiwicnuekac,
wosâekicne jaŋere sâcko dâŋ manapemurâ
hazec‐nane bâuŋtoekac hâcne.
5 Wofuŋ Anutu e hazec‐nane bâuŋtowec,
ehame no mi râŋgeŋkecnepo erâ wâc rârâpe mi wisepo.
6 Qa bâʒâic enarembiŋ jaŋe râpe‐nane sicne‐jarepo,
â mecʒâwâ‐nane unuckembiŋ jaŋe mauc jahec‐nane sicne‐jarepo;
musâqorecnuhuc tâfecnupie
ʒâŋe mai‐nane mi bâsoŋkepo.
7 Wofuŋ Anutu eki ine baficnuekacte mi qurutuapemu;
no irec hâcne ʒâŋe mai‐nane bârisiepe
qânâ sanaŋ iŋucne ewec.
Erâ manakopac,
mimi busâqoczi fai‐naneo mi feocmu.
8 Nore dâŋ dopeckeekaczi bembeŋko jukac.
Mozi dâŋko râecnuzo mukac?
Nâhe mâmâc mai fua taniŋkenac.
Mozi dâŋko râsi enareocmu?
E norao ware fuazejec.
9 Manaŋgopieŋ, Wofuŋ Anutuzi baficnuekac
irec mozi musâqorecnuocmu?
Manaŋgopieŋ, wâfuzi ŋaqi qoruc nanʒaŋnepie omaeekac
irec sâc jaŋe ʒeŋgoma ʒaŋkerâ omaeniŋmu.
10 Ŋoŋeraonec moczi Wofuŋ araŋ bacneocmu
e kiŋaŋŋic‐ticnere dâŋ mana rereŋ ezejec,
â moc e dapâcko ʒoc moc mi tamaecneha hata raocmuzi
Wofuŋte ʒâŋere mamanac juhuc Anutu‐ticnerao roweckezejec.
11 Manaŋgopieŋ, ʒoc ruqeeŋgopieŋ â waha qazeeŋgopieŋ
ŋoŋe sasawa ŋaŋacne ʒocbâruŋko
â waha qazembiŋ irec maŋnao raʒinʒepieŋ.
Wiac i ʒâic serereŋ manahuc foniŋte
menanezi bâfua‐ŋareocmu.