51
Zioŋ haere bâbâmiriŋ dâŋ
1 Wofuŋzi ʒiŋuc mukac:
“Tiŋne jujure henʒiriŋneeŋgopieŋ
â Wofuŋ wira basac ecneeŋgopieŋ
ŋoŋe dâŋ mupe mananiŋ:
Ŋoŋe haroŋaŋzi bacŋopakicne haroŋaŋ i honeniŋ,
â nombâŋkonec qânâ rorâ bacŋopakicne nombâŋ i honeniŋ!
2 Ŋoŋe mamac‐ŋeŋic Abraham erao ʒâŋe fipie raoc,
â Sarazi rocŋopawec erao mâmâc.
Manaŋgopieŋ, e ɋâric tâmiric buc juhame rowosâepo,
erâ jambuŋkehuc basawepo.
3 Jâmbomac, Wofuŋ e Zioŋ mu bâmiriŋ ecneocmu,
ehuc fic hae‐ticne heropiekicne sasawa i bafahareocmu
â mâreŋ‐ticne niniŋ siarereŋ fokac i hetikieme
Edeŋ mâreŋ iŋucne eocmu,
erâ mâreŋ‐ticne hahaŋkekicne i hetikieme
Wofuŋte jufu gie irec sâc eocmu.
Iŋuc fuame hae irec maŋnao ʒeri bubiaŋ â daŋge mumuteŋ
erâ gaere micʒonʒoŋ fuame mananiŋmu.
4 “Ŋic gurune gurune ŋoŋe dâŋ mupe mananiŋ
â ŋicne ŋicne ŋoŋe dâŋnanere hazec râeniŋ;
noraonec hâcne mumutâc dâŋ fuarâ raocmu
â mumutiŋ dâŋnane i ŋic gurune gurune jaŋere ʒoctamac eocmu.
5 Dâŋnane tiŋnezi maic‐ŋopakac â bâbâpiaŋ‐nane i fuawec;
menanezi ŋic gurune gurune jaŋerao
okac babazu gie bapemu
â nucne nucne jaŋe ŋezic‐jopapemurâ nore mamanac juniŋmu.
6 Ŋoŋe qâhâŋnerâ sambâŋkopec ʒâŋe finiŋ
â mâreŋko fipie huoc!
manaŋgopieŋ, sambâŋ e hosâc iŋucne omaeocmu
â mâreŋ e ŋaqi iŋucne sucke ʒaŋ eocmu,
erâ ŋecjucfâc‐ticne jaŋe mâkâc iŋucne hâmoniŋmu.
Nore bâbâpiaŋzi ine fofo sanaŋ foocmu
â erâ‐eesanaŋ‐nane i tatarane tâmiric.
7 “Tiŋnere fuŋne manaeŋgopieŋ
â maŋŋeŋicko sâcmutâc dâŋnane foekac ŋoŋe mupe mananiŋ!
Ŋoŋe ŋiczi qaisoc‐ŋopapie mi hâwic‐ŋopazejec
â mu ruruc eŋarepie sahac‐ŋeŋic mi gâgâmârâzejec.
8 Manaŋgopieŋ, jaŋe wâfu qoʒazaŋzi ŋaqi iŋucne nâcjopaniŋmu
â kurumbuczi ŋaqi ʒâwânehec iŋucne nâcjopaniŋmu.
Nore bâbâpiaŋzi ine fofo sanaŋ foocmu
â hone bafic ee‐nane i mimiŋzi ɋâric
fohuc juocmu sanaŋ.”
9 Wofuŋte me, go sanaŋ qaŋqaŋkec, ehuc tâpirihec ec!
Go mârâc sasac jaha jâmbâŋ,
ŋic gaŋne gaŋne fuŋkerâ juhapie sanaŋkemeŋ
irec sâc sanaŋ qaŋqaŋkec!
Me mozi Rahaba qâfâuckewec â oâ âke mârâŋkewec,
i goki mi emeŋ me?
10 Me mozi mume hâwec ʒâkâŋ sâko kereŋkewec;
me firuec‐jopakicne jaŋe hâwec fotâcneniŋte
mozi mume hâwec fâhâŋnezi hata ewec,
i goki mi emeŋ me?
11 Eme Wofuŋ e firuec‐jopakicnefâc‐ticne
jaŋe risierâ ʒeri fânâŋ ehuc Zioŋko fisiniŋmu,
eme jaŋerao bubiaŋ fofo sanaŋ foocmu.
Eme ʒeri bubiaŋ fua‐jareha
mu mamakuc â kio wâwâsic izi ine omaeocmu.
12 Wofuŋzi ʒiŋuc mukac:
“No hâcne hemiriŋguekopac; go ine mo,
irec ŋic hâmoeŋgopieŋ jaŋere mecne
â ŋicte ɋâric kecɋaŋ iŋucne hâmo ɋaŋac eeŋgopieŋ
jaŋere mâmâc hâwicguekac?
13 Ehame Wofuŋ bâbâfuage sambâŋ fârewec forakac
â mâreŋte hobeteŋ râewec ere nikecguekac,
ehuc râsigezi sipiricguocte maŋne domawec
ere aaricte wâc dameŋ sâc hâwicguekac.
Ʒi ine bâʒâicguekac ere aaric i weni?
14 Ŋic kâpâcwâru bakicne e biac jaha firueniŋmu,
eme hâmorâ nombâŋko mi huocmu
â nânâ‐ticne wâc mi basaocmu.
15 No Wofuŋ, gore Anutu hâcne,
no hâwec itiriŋkepe siri‐ticne wânʒâŋnehec qaekac,
no ʒâŋe‐nane ‘Anutu Tâpiri Ɋuŋɋasaŋ Wofuŋ’.
16 No dâŋnane micgao râepo erâ menanere mumucko soŋgupo,
ehuc sambâŋ fârepo â mâreŋte hobeteŋ râepo
erâ Zioŋ rune ʒiŋuc jazapo: ‘Ŋicfâc‐nane ŋoŋe hâcne.’ ”
17 O Jerusalem, go mana ɋâɋârerâ faharec!
Go Wofuŋ menao kimbeŋ‐ticnere râqâc bajuwec
irecnec nâmeŋ, ehuc maŋsifuc bâbâfuare râqâc
irec fârine nâku nâzickemeŋ.
18 Naru motec rocjopa‐fârewec
jaŋeraonec moczi moc mi jowawec
â naru motec hone maiŋ ejareha sokambiŋ
jaŋeraonec moczi menao moc mi rowec.
19 Wiac jajahec, ima bapa â sisipiric,
nânâre hâhâmo â ʒika
izi faigao feme gore erâ mozi ki mamakuc ewec
me hemiriŋguwec?
20 Sâeczi uficko jowarâ foekac,
irec sâc motecfâcge jaŋe Wofuŋte kimbeŋ
â Anutugere hahanec dâŋ izi gapec‐jopame
haere hata sosohocko hâmocne tinac fombiŋ.
21 Irec bâʒâicgukicne â waiŋ opâ mi nâmeŋzi
sifu maŋsifuc egarekac go ʒiŋuc manac:
22 Wofuŋ Anutuge, e ŋicfâc‐ticne jaŋere dâŋ dopeckeekaczi
ʒiŋuc mukac: “Manakic, no maŋsifuc râqâc,
kimbeŋ‐nanere râqâc hâcne,
megezi badomakic i gowac rokopac;
eme go ʒuhuckerâ mocwâc mi nâzemec.
23 Eme no râqâc i bâbâʒâicfâcge ʒiŋuc gazambiŋ
jaŋere meo râepemu: ‘Go mâreŋko waha foc,
eme nâŋe gore faio âterâ ranʒepeneŋ.’
Eme jaŋe faigao âterâ raniŋte go waha fohaŋtec
râpegezi mâreŋhec sâc mocjaha erâ hata iŋucne ewec.”