58
Sowa fârinere dâŋ
1 Wofuŋzi ʒiŋuc mukac:
“Hahaŋne bahuc wirazemec, maracge mi bawahac,
maracge bâfeŋnetec qeŋ iŋucne dâŋezejec;
ŋicfâc‐nane sindaŋ‐jeŋic mu rituc ejarec
â Jakobore kikefuŋ jaŋere sâqocne bataniŋkec.
2 Jaŋe ʒoaŋne ʒoaŋne wira basac enareeŋgopieŋ,
ehuc hata‐nane mana taraniŋte aŋac‐jopaekac;
jaŋe ŋicguru moczi eebapa tiŋne bâfuambiŋ irec sâc
â Anutu‐jeŋicte jojowac dâŋ mi râpeckembiŋ iŋucne;
jaŋe mumutiŋ dâŋ biaŋne mutara‐jarepemurâ numu‐nareeŋgopieŋ,
ehuc Anutu no maicnuniŋte ejareekac.
3 Eha ʒiŋuc wioeŋgopieŋ: ‘Nâŋe sowa juhapene
wemocte mi honec‐nâpoekic
â sahac‐nâŋec bâʒâickepene
wemocte hone manac mi eekic?’
Manaŋgopieŋ, sowa juju dameŋ‐ŋeŋicko
aŋac‐ŋeŋicte gie baeŋgopieŋ,
ehuc gieŋicfâc‐ŋeŋic bâʒâic‐jopaeŋgopieŋ.
4 Manaŋgopieŋ, ŋoŋe dâŋ mumuc â kikisâ bâfuaniŋte
â mehuhuŋ repicnezi hehec eniŋte sowa jueŋgopieŋ.
Ŋoŋe dameŋ ʒi sowa jueŋgopieŋ sowa iŋucnezi
hata hebâzickeme Anutuzi dâŋmarac‐ŋeŋic sâcne mi manaocmu.
5 Me sowa kecʒiŋucnere moc aŋacnuzac me?
Ʒoaŋ moc ira ŋiczi sahac‐ticne bâʒâickeocmu,
ehuc qizec‐ticne saparac iŋucne hasickerâ domaocmu,
me târu rufarâ ʒafe heririŋko foocmu?
Ŋoŋe mâsi iŋucnere sowa fârine mueŋgopieŋ?
Me ʒoaŋ iŋucnere mueŋgopieŋ: Wofuŋzi irec ecnekac?
6 “No ine wiac kecʒiŋucte manape sowa fârine eekac:
Sâqocnere niŋgiŋ hetâcnezo, reŋte muc bâŋgoroŋkezo,
kâpâcwâru bacjopakicne firuec‐jopazo
â tagi râe‐jarekicne i hetara‐jare‐fârezo.
7 Dâŋ ʒiŋuc hâcne mukicne: Nânâre hâmoekac e nânâ gumezemec,
qarâ suriŋne â jabane jaŋe ficgao râec‐jopazemec,
ŋic biuctac jume honerâ qoruc râcnezemec
â ŋic âgofâcge bafic‐jopazemec.
8 Go iŋuc etecne ʒoctamacgezi furic iŋucne tamaeocmu
â huc wicge i biac somie biaŋ eocmu;
tiŋne jujugezi bânie‐gareocmu
â Wofuŋte huriri qâreŋzi bâjâpecguocmu.
9 Eme wiratec Wofuŋzi dâŋ bâtikie‐gareocmu;
go kio wâwâsic ecnetec ʒiŋuc muocmu: ‘No ʒine hâcne.’
“Ŋondeŋ‐ŋeŋickonec tagi mecne, me bubutoŋ ââecke mecne
â sowidâŋ mumu mecne i bârârieniŋmu,
10 â ŋic nânâre hâmoekac e nânâ râcne gumec eniŋmu
erâ ŋic maŋticne omaewec i gume qiŋneniŋmu
ine tatamac‐ŋeŋiczi dapâcko ʒoc iŋucne uŋ heocmu
â dapâc‐ŋeŋiczi ŋerisierâ ʒoaŋ gereŋ gereŋne iŋucne eocmu.
11 Eme Wofuŋ e dameŋ sâc jowacguhuc juocmu,
ehuc mâreŋ burocnao maŋ qâqâtâcge bâgunuckeocmu,
erâ me kikege basanaŋkeocmu.
Eme go jufu gie opâ ruacnekicne
me opâ ʒâŋe mi ʒiʒickene iŋucne ecmu.
12 Ŋicfâcge jaŋe hae sesucne sesucne dameŋ ʒora fowefuwec
i heɋârerâ bâpiaŋkenʒepieŋ; erâ ŋic gaŋne gaŋne
juwefuhuc qânâsacte hobeteŋ râe jumbieŋ
i mocwâc bâpiaŋkepie sanaŋne fozejec.
Ehame ʒiŋuc mugarenʒepieŋ: E hawec hehebâzicke ŋic
â ŋiczi ira mocwâc ŋeŋe juju eniŋte fic hae bâpiaŋkeekac.
13 “Go sabata hombaŋ sipirickezicte kikege soŋaŋkehuc
tiri ʒoaŋ‐naneo gie maŋgere kosa mi bacmu,
ehuc sabata irec ʒâŋe ‘ʒeri bubiaŋ hombaŋ’ murâ
Wofuŋ nore tiri ʒoaŋ irec ʒâŋe ‘araŋ bapa ʒoaŋ’ mucmu,
erâ gahacne hata mi âtehuc sâsecmu,
me gahacne maŋte gie mi bacmu â dâŋ omane mi mucmu,
14 ehuc Wofuŋ nore aŋac manahuc jutec baficguhape
mâreŋte faio sâcne ququŋke tâmiric jurahuc jucmu;
eme no mamacge Jakobo ere merâfâc gare tahac epemu.”
Wofuŋzi iŋuc hâcne muwec.