59
Sâqocne mumufua dâŋ
1 Manaŋgopieŋ, Wofuŋ meticne i bembeŋne aricne,
irec bafic‐ŋopaocte mi eipieocmu,
â hazecfoŋ wâc mi juekac,
irec dâŋ manaocte mi quŋkeocmu.
2 Kiŋ bahac‐ŋeŋiczi ine ŋoŋe â Anutu‐ŋeŋic
ŋondeŋ‐ŋeŋicko aka fokacte
â sâqocne‐ŋeŋiczi Wofuŋ sâockekacte
dâŋŋeŋic mi manaekac.
3 Meŋeŋicko soc bohotaekac â memotec‐ŋeŋic i kiŋ bahachec,
micbipic‐ŋeŋickonec burecdâŋ wahaekac
â nameŋ‐ŋeŋiczi sindaŋdâŋte saŋuc qaekac.
4 Moczi moc dâŋgieo wiac tiŋnere dâŋ moc mi dopeckeekac
â moczi mumutara dâŋ biaŋne moc mi muekac.
Aricne, wiac omanao roweckehuc siocdâŋ mueŋgopieŋ,
â wiac hâhâwicne kiweckerâ sisipiric roeŋgopieŋ.
5 Jaŋe homa hândâŋ fomackepie âkeʒuekac,
â qâruru bieeŋgopieŋ;
moc e hândâŋ‐jeŋic nâocmuzi hâmoocmu
me âtenʒaŋneme qotâ wefuocmu.
6 Qâruru bieeŋgopieŋ izi ŋaqi mi bapane
â wiac baeŋgopieŋ i ŋiczi mi rurufane.
Eebapa‐jeŋic i eebapa sâqocne
â mejeŋiczi sindaŋ bâfuaekac.
7 Sâqocnere kike afec jueŋgopieŋ â ŋic bahacmâc
jaŋere soc hoŋkeniŋte hata ʒocnehec raeŋgopieŋ.
Mamanasu‐jeŋiczi wiac hehesicne manasu biric eeŋgopieŋ,
hata‐jeŋicko ima samaki â sisipiric foekac.
8 Wamare hata kâuc baeŋgopieŋ
â hata‐jeŋicko mumutiŋ dâŋ moc mi bâbâfuane;
jaŋe hata‐jeŋic hehasickembiŋ,
eme ira raocmuzi wamare kâuc baocmu.
9 Irec mumutiŋ dâŋzi mi maic‐nâpoekac
â bâbâpiaŋzi nâŋerao mi ware fisiekac.
Nâŋe tatamacte woŋec juhuc mi dapâc honenʒepeneŋ i,
erâ ʒoaŋ ʒâziriŋte ʒâŋe fieŋgopeneŋzi
dapâc qisiricko jueŋgopeneŋ.
10 Nâŋe ŋic ʒâŋe tiŋtuŋ iŋucne ficsâpeo babarâ raeŋgopeneŋ
ehuc ʒâŋe tâmiric jaŋe iŋucne babarâ jueŋgopeneŋ.
Nâŋe dapâcko quŋkeeŋgopeneŋ
iŋuc jaha ʒoaŋ ɋaɋacko eeŋgopeneŋ,
nâŋe sahac ɋiɋichec jaŋere ŋondeŋko ŋic hâmokicne iŋucne.
11 Nâŋe ʒeŋgoma kâte qowi iŋucne ŋuruŋneeŋgopeneŋ
â hapâ iŋucne dâŋeeŋgopeneŋ;
mumutiŋ dâŋte woŋec ŋepene arictac eekac
â bâbâpiaŋte woŋec jupene mi bâqiŋ‐nâpoekac.
12 Qaqatara‐nâŋec i gore maio guru sâko fokac i,
â sâqocne‐nâŋeczi mufuac‐nâpokac;
qaqatara‐nâŋeczi mai‐nâŋecko fokac
â sâqocne‐nâŋec i kâuc mi baŋgopeneŋ.
13 Kecʒiŋuc: Maŋrâŋgeŋ, Wofuŋ ninikec
â Anutu‐nâŋec rârâpecke, sindaŋ hârindaŋ ee â qaqatara,
burecdâŋ manasu biric erâ manabâc tâmiric mumu.
14 Mumutiŋ dâŋ bâsuepene rawec â tiŋne juju
i taicko wisewec fokac,
siocmâc juju i tomao waha qawec,
â dâŋ fâretiŋ mumu i âgo mi ecneeŋgopeneŋ.
15 Dâŋ siocmâc mumu i omaewec, eme moc e sâqocne qikiŋneocmu
e mafa wiac‐ticne fiuc roniŋmu.
Wofuŋ e wiac i honewec,
ehuc mumutiŋ dâŋ omaewec irec maname sâqorewec.
16 Eme e ŋic fârine moc mi jume honewec
â moczi moc bafickeocte mi fuawecte wareckewec;
irec e jahacne mezi bafickewec
â tiŋne juju‐ticnezi dopeckewec.
17 E tiŋne juju i maruku iŋucne rufawec
erâ aeŋdu, ʒâŋene bâbâpiaŋ i heme huwec;
e okac babazuzi ŋaqi‐ticne eha heme huwec
â ʒoɋac‐ticne i mâmâteŋ ŋaqi iŋucne rufawec.
18 E eebapa‐jeŋicte sâcko furine jareocmu,
kisâfâc‐ticne kimbeŋ qajareocmu,
râsifâc‐ticne okacne bazu‐jareocmu,
nucne nucne jaŋe okacne bazu‐jare‐fâreocmu hâcne.
19 Eme Wofuŋ ʒâŋe‐ticne i ʒoaŋ huhunaoneczi araŋ bacnenʒepieŋ
â ʒoaŋ wewefunaonec jaŋe huriri qâreŋ‐ticnere
manapie bipinehec ezejec;
Wofuŋ e micrombâŋ‐ticnezi opâ sâko fusinehec
ficne sueme raocmu irec sâc fisiocmu hâcne.
20 “Zioŋko jueŋgopieŋ â Jakobore kikefuŋkoneczi
sâqocne râpeckeniŋmu jaŋe ine fifirue fua‐jareocmu.”
Wofuŋzi iŋuc mukac.
21 Wofuŋzi mukac: “No kecʒiŋuc muhuc jaŋehec ʒâʒâfic ekopac: Mâro‐nane faigao wahawec jukac â dâŋnane micgao râepo fokac i gahacne mickonec â ɋâricfâcge jaŋere mickonec moc mi wawaha mimiŋzi ɋâric forahuc juzejec.”