62
1 No Zioŋte erâ dâŋ muhuc juhape
â Jerusalemte erâ gie bahuc juhape
tiŋne juju‐ticnezi huriri qâreŋ iŋucne fuazejec
â bâbâpiaŋ‐ticnezi waha bâruŋkeekac irec sâc bâruŋkezejec.
2 Ŋicne ŋicne jaŋe tiŋne jujuge honenʒepieŋ
â ŋicwofuŋ ʒeŋgoma jaŋe huriri qâreŋge ʒâŋitanʒepieŋ;
eme Wofuŋzi ʒâŋege ɋâricne moc mugareme ŋic jaŋe muhuc junʒepieŋ.
3 Go Wofuŋte biŋe juhuc eridu biaŋne iŋucne jucmu
â Anutugere biŋe juhuc ŋicwofuŋ hendiŋ iŋucne ecmu.
4 “Behecgukicne”, ʒâŋege iŋuc mocwâc mi muzo,
â mâreŋgere ʒâŋe i “Mâreŋ burocne” mocwâc mi muzo wâc;
gore ʒâŋe i ʒiŋuc mugarezo: “Joroc‐nane”,
â mâreŋgere ʒâŋe ine ʒiŋuc fuazejec “Ŋokac ŋowehec”,
i Wofuŋzi gore aŋackekacte â mâreŋge i ŋowehec eocmu irec.
5 Ŋicmoteczi ŋokac ʒeŋoŋ moc roocmu irec sâc
motecfâcge jaŋe raucguniŋmu,
â ŋiczi ŋokac biŋe‐ticne mana aŋac ecneocmu
irec sâc jaha Anutugezi mana aŋac egareocmu.
6 O Jerusalem, no qânâsacgere ruc bapa ŋic juniŋte râec‐jopapo,
eme jaŋe ʒoaŋko mecne ŋafeo mecne dâŋemâc mi junʒepieŋ:
Wofuŋ manasucnehuc juniŋte mukicne ŋoŋe ŋeŋemana mi enʒepieŋ.
7 Erâ ʒoɋac ecnehuc juhapie Jerusalem mocwâc heɋârerâ
mume mâreŋko ʒâŋe biŋehec ŋezejec.
8 Wofuŋzi tâpiri mefâre‐ticne ira ɋetickehuc ʒiŋuc mupaŋkewec:
“No padi jacgoŋge i râsifâcge jaŋe mocwâc mi jarepe nâniŋmu,
â waiŋ opâ fua‐gareocte gie sâko bahuc jumeŋ
i jaba jaŋe nâniŋte wâc mi mana‐jarepemu.
9 Mâcne, qa roro eeŋgopieŋzi nânʒepieŋ,
ehuc Wofuŋ no muteŋ bâteŋ enarenʒepieŋ,
â waiŋ hândâŋne ro nusec eeŋgopieŋzi
opâne tirific‐nanere hae ʒoŋao nânʒepieŋ.”
10 Motâc sâko fotâcnerâ wahaniŋ!
Ŋic jaŋere hata bâʒâweniŋ;
mâreŋ bâburockeniŋ,
bâburockepie hata fuaoc,
qânâ bârârieniŋ,
ŋic gurune gurune jaŋeraonec risie wareniŋte qeŋ qajareniŋ!
11 Manaŋgopieŋ, Wofuŋ e dâŋ ʒiŋuc râeme raku
mâreŋ qaŋeŋnao fisikac: “Zioŋte otâ âzâcneniŋ,
manakic, bâbâpiaŋgezi fisikac;
manakic, furi‐ticne ameckerâ ware fisikac
â wiac hure hemârec ewec izi bâniecnekac.”
12 Ʒâŋe‐jeŋic ʒiŋuc muniŋmu: “Tiri ŋicguru”
â “Wofuŋ firuec‐jopawecfâc‐ticne”;
gore ʒâŋe ine ʒiŋuc muzo: “Gore mu wioc ekicne”,
erâ wâc: “Hae sâko mi behe sanaŋkekicne”