63
Wofuŋte okac babazu dameŋ
1 Bozera haeonec ŋaqi bâbâroŋ rorâ warekac,
ehuc ŋaqi qoruc eri qaraweŋnehec Edom mâreŋkonec
tâpiri sâkohec fisikac e mo?
“Tiŋne jujure dâŋ muekopac
â ŋic bâpiaŋ‐jopazore tâpiri fonareekac Wofuŋ no hâcne.”
2 Ŋaqige wemocte bâbâroŋ ekac â qorucge
i ŋic waiŋ hândâŋne âte pisickeekac ere qoruc iŋucne?
3 “No waiŋ hândâŋne bucnane âte pisickepo,
ehame ŋic gurune gurune jaŋeraonec moczi nohec moc mi juwec.
No kimbeŋko âte pisic‐jopapo â aaricko âtenʒaŋ‐jopapo.
Ehame socjeŋiczi ŋaqi‐nane ruacnewecte
qoruc wiac‐nane bâbie‐fârepo.
4 No okac babazure moc manape fowec,
eme irec fârine bâfuapemurâ jara dameŋ maickewec hâcne.
5 Eme no rârec rârec ʒâŋe fipe rame
babafic‐nane moc mi honepo,
moczi moc mi baficnuwecte wareckepo.
Iŋuc fuame nahacne mezi baficnuwec
â kimbeŋ qajarehuc sanaŋkepo.
6 No kimbeŋko ŋic gurune gurune âtenʒaŋ‐jopapo
â aaricko henʒaŋ‐jopapo,
ehuc socjeŋic mâreŋko hoŋkepe rawec.”
Wofuŋzi Israe ŋic ehâmo‐jarewec
7 No Wofuŋ aki anonoc‐ticne â eebapa‐ticne bipinehec
i wiac enâre‐fârewec irec sâcko muteŋkezepac,
erâ juju‐ticne â aki anonoc‐ticne fufusuc
irec sâcko Israe kikefuŋ buuruc ɋârâŋne enârewec
irec wâc manasuzepac.
8 E ʒiŋuc muwec: “Jaŋe ŋicfâc‐nane hâcne,
ŋokâfâc‐nane eeatuc tâmiric,”
e iŋuc muhuc babafic‐jeŋic erâ juwec.
9 Ʒârâ hâriŋ dameŋ‐jeŋicko kiŋaŋŋiczi me aŋelozi mâcne,
e jahac maŋjauŋ â buuruc‐ticnere erâ
bafic‐jopahuc firuec‐jopawec;
e fuŋnaonecteaŋ dameŋ sâc bafaharec‐joparâ âsic‐jopawec.
10 Jaŋe ine maŋrâŋgeŋhec juhuc
Tiri Mâro‐ticne bunao bambiŋ;
irec e jahac râsi ejarehuc jaŋehec ʒika qawec.
11 Iŋuc eme jaŋe mârâc jaha kiŋaŋŋic‐ticne Mose juwec
ere hâcne manasuhuc mu wioc embiŋ:
Lama gurufâc‐ticne jaŋere soŋaŋ juocte
opâonec bawefuwec e weni?
 maŋnao Tiri Mâro‐ticne râeme huwec, e weni?
12 Me tâpiri mesanaŋ‐ticnezi Mose bafickeocte muwec,
me ʒâŋe‐ticne fofo sanaŋ foocte
opâ bâfâucke‐jarewec e weni?
13 Me mana‐jareme becâsiczi mâreŋ burocnao raekac
irec sâc hâwec ʒâkâŋ fotâcnembiŋ,
ehame kike‐jeŋic mi fâfâckewec e weni?
14 Bulimakao jaŋe wâneŋko huraeŋgopieŋ
irec sâc Wofuŋte Mârozi jumananiŋte râec‐jopawec.
Go ʒâŋe biŋe sâkohec ecmurâ
ŋicfâcge iŋuc hâcne jowac‐jopahuc jumeŋ.
Wofuŋ e busâqoc mana‐jarehuc bafic‐jopaocte numucnembiŋ
15 Go sambâŋkonec, tiri hae biaŋgaonec hâcne
fitec wahame honec. Ʒoɋac â tâpirige weni?
Maŋjauŋ â buurucge i wemocte sakare‐nârekomec?
16 Goki hâcne mamac‐nâŋec,
Abrahamzi ine nâŋe kâuc bacnâpokac
â Israezi ʒâŋeruruŋ‐nâpokac;
o Wofuŋ, goki mamac‐nâŋec â fifirue‐nâŋec,
fuŋnaonecteaŋ ʒâŋege iŋuc hâcne fowarehuc juwec.
17 O Wofuŋ, go wemocte hone qâoma enârehaŋ
hatage beheeŋgopeneŋ â maŋsanaŋ eeŋgopeneŋ,
ehuc gore mi hâwic‐nâpoekac?
Kiŋaŋŋicfâcge â mefâregere kikefuŋ gurune gurune
nâŋe mocwâc maic‐nâpoc.
18 Tiriŋic gurufâcge nâŋe tirificge
dameŋ bembeŋne sawa ŋenârewec,
eme râsifâc‐nâŋec jaŋe fisirâ wâwânâŋ ecnembiŋ.
19 Go fuŋnaonecteaŋ guriŋ bapa gie moc mi bajaremeŋ
â ʒâŋege mi bajumbiŋ ŋic iŋucne jaŋere sâc embeŋ.