7
Jesajazi Ahasi Wofuŋte micdâŋ âzâcnewec
1 Juda ŋicwofuŋ Ahaʒi, Jotamte ŋokâ, Uʒijare ŋosa, ere dameŋko Siria ŋicwofuŋ Reziŋ â Israe ŋicwofuŋ Peka, Remaliare ŋokâ, jahe Jerusalem rauckenicte momori rocjoparâ fisipic, erâ ro rauc enicte eipiepic.
2 Dawidire tuc qarâ juwec e dâŋ ʒiŋuc âzâcnepie manawec: “Siria â Eferaim jahe ʒâʒâfic ekopirec.” Eme dâŋ i manarâ e jahacne â ŋicfâc‐ticne jaŋere buhândâŋ ɋarac ɋarac qawec, mâŋâŋ fisirâ kâtejâc itiriŋkeekac irec sâc.
3 Wofuŋzi ine Jesaja ʒiŋuc âzâcnewec: “Go faharerâ ŋokâge Sea Jasubu jowatec ra Ahaʒi bâfuanic, ine faicpec riqic ŋekac irec opâwâc tarakacko hatamecko qoruc qaqajac ŋic ere mâreŋko hâcne.
4 Bâfuarâ ʒiŋuc âzâcnec: ‘Aimuŋ juhuc buge mâteŋkeoc, mi hâwicguoc. Ʒocmimiŋ jajahec hosâc qahuc fokopirec ʒi, Reziŋ â Siria erâ wâc Remaliare ŋokâ aaric‐jeŋicte ʒoc hâcne, irec maŋge mi omaeoc.
5 Siria e Eferaim â Remaliare ŋokâhec dâŋ qagarehuc ʒiŋuc mumbiŋte:
6 “Ajoc, Juda mâreŋko ferâ hâhâwic bâfua‐jarenaŋ, erâ mâreŋ i nâŋâc ruckerâ maŋnao Tabele ere ŋokâ âkendâŋnepene ŋicwofuŋ ejarezejec.”
7 Wofuŋ Anutuzi ine ʒiŋuc mukac:
Dâŋ i mi sanaŋkezejec,
â fârine mi fuazejec.
8 Siria ere qizec Damasko,
â Damasko ere qizec Reziŋ.
(Iŋuc ine mi fofeocmu jara 65 mi taraha Eferaim qâtâtiezo, eme jaŋe ŋicguru moc buc mi juniŋmu.)
9 Â Eferaim ere qizec Samaria
â Samariare qizec Remaliare ŋokâ.
 ŋoŋe mi mana ʒakieniŋmuo
ine sanaŋkerâ mi jufeniŋmu.’ ”
Jesajazi Imanuere findaŋdâŋ muwec
10 Eme Wofuŋzi Ahaʒi harierâ ʒiŋuc âzâcnewec:
11 “Go mutec Wofuŋ Anutugeraonec fuŋne qaqa mâsi moc juwickonec jâmbâŋ, hâmoc haeonec, me faickonec jâmbâŋ fua‐garezejec.”
12 Ahaʒi eki ine muwec: “No wiac iŋucnere Wofuŋ sâcne mi esâickepemu.”
13 Eme Jesajazi muwec, “Dawidire ɋâricfâc ŋoŋe mananiŋ: Ŋoŋe ŋic tatakic bâfua‐jareeŋgopieŋ irec manapie afeckekacte Anutu‐nane iŋuc jaha ecneeŋgopieŋ me?
14 Irec Wofuŋ e jahac fuŋne qaqa mâsi moc bâfua‐ŋareocmu. Manaŋgopieŋ, ŋokac socɋâri e motec kiweckerâ roocmu, erâ ʒâŋe‐ticne Imanue muocmu.
15 Motec e sâqocne qiqikiŋ â biaŋne sasakare irec mamana fuacneme susu râqârekicne â baŋac nâhuc juocmu.
16 Â motec e sâqocne qiqikiŋ â biaŋne sasakare irec mamana mi fuacneha ine ŋicwofuŋ jajahec, hâhâwic‐jekic bajuŋgopieŋ jahe mâreŋ‐jekic biac tuhu fuarâ foocmu.
17 Wofuŋ e go â ŋicfâcge â mamacgere kikefuŋ ŋoŋerao wiac hâhâwicne bâfuaocmu, wiac iŋucne Eferaimzi Juda beheweckonec juwefukicne dameŋ ŋondeŋ irec maŋnao moc mi fuawec; Asiria ŋicwofuŋ hâcne mume fisiocmu.”
18 Dameŋ ira Wofuŋzi Aigita mâreŋte opâ sâko gecnao neŋgec juŋgopieŋ fuŋgaŋke‐jareocmu, â Asiria mâreŋko bitu juŋgopieŋ jaŋe wâc fuŋgaŋke‐jareocmu.
19 Eme jaŋe fisi‐fârerâ opâwâcko â hârâc huec, jâc dutune dutune â sopâc kecɋaŋ bârârâŋne‐fârerâ foniŋmu.
20 Dameŋ ira Wofuŋ e opâ sâko ocniŋucnaonec sâqe kiruŋ giedâŋ mucneocmu, Asiria ŋicwofuŋ hâcne, erâ sâqe izi qizec susuc â kike ʒâwâ‐ŋeŋic rofâreocmu, ehuc mecʒâwâ mâmâc omaeocmu.
21 Dameŋ ira ŋic moczi bulimakao ŋokacne socɋâri moc â lama jajahec iŋuc sawa bacjopa juocmu.
22 Eme qowi iŋucnezi susu bocjaha bâfuacnepie susu râqârekicne nâhuc juocmu; mâreŋ ira ŋic tiwâne juniŋmu jaŋe sasawa susu râqârekicne â baŋac nâhuc juniŋmu hâcne.
23 Hae mâreŋ mocko dameŋ ʒiŋuczia waiŋ jâcne wâŋ tauseŋ domaŋgopieŋ, furi‐jeŋic 500 kina, mâreŋ iŋucnao dameŋ ira bacmandaŋ â fâpâ uupic fuaocmu.
24 Bacmandaŋ â fâpâ uupiczi mâreŋ i rofâreha ŋiczi ira fisiocte tepe neŋgoc‐ticne fitackerâ tepe motec‐ticne ameckerâ fisiocmu.
25 Â mâreŋ facne facne kinoŋzi he bâfâuc ehuc jukicne, ira ŋiczi bacmandaŋ â fâpâ uupicte hâhâwic erâ mocwâc mi fisiniŋmu, aricne, mâreŋ i lama bulimakao qikiŋne‐jarepie âtehuc juniŋmu.