8
Porofete ŋokâ‐ticnere ʒâŋe
1 Eme Wofuŋzi nazarâ muwec: “Tafe sâko moc rorâ qâreŋ ŋiczi wowosene qâreŋkehuc ʒiŋuc râec: ‘Ʒi Biacfiuc Fârosakac ere wiac’.”
2 Eme no mumutaniŋ ŋicfâri jajahec, fuŋne‐nane mutaniŋkenicte rocjofapo: Taha bapa Uria, erâ Ʒekaria, Jeberekiare ŋokâ.
3 Erâ ŋonâŋ‐nane porofete ŋokac erao rape motec kiweckerâ rowec. Eme Wofuŋzi nazarâ muwec, “Ʒâŋene Biacfiuc Fârosakac muzemec.
4 I ʒiŋucte: Motec e ‘Mamac‐mae’ â ‘Neŋgoc‐mae’ sâcne mi muhame Damaskore mafa â Samariare mâriri i Asiria ŋicwofuŋtao ameckerâ raniŋmu.”
5 Eme Wofuŋzi harierâ ʒiŋuc nazawec:
6 “Ŋicguru keci jaŋe Siloa opâ munaŋne i suŋgiŋkehuc Reziŋ â Remalia ŋokâ‐ticne jahere maio hâbi‐jeŋic goroŋkekac.
7 Irec ʒiŋuc manac, Wofuŋzi Eufrata irec fusine ɋiɋicne â bocjaha sore‐jarekac: Asiria ŋicwofuŋ â tâpiri ɋuŋɋasaŋ‐ticne hâcne, eme izi moŋgeŋ‐ticne qâuruckerâ tucduŋ‐ticne fotâcne‐fâreocmu.
8 Erâ rumi‐ticnezi âkeʒurâ Juda mâreŋ fotâcnehuc qâuruckeme upe‐jeŋicko qaocmu; o Imanue, fafakec‐ticne qaratieme mâreŋge ŋifec â ŋifec qofacke‐fâreocmu.”
9 Ŋic gurune gurune aaric mana‐bipiehuc
bipic tatara enʒepieŋ,
mâreŋ wiwickonec ŋoŋe hazec râe‐fârenʒepieŋ.
Wiac emoc bâmoc eku bipic tatara enʒepieŋ,
wiac emoc bâmoc eku bipic tatara enʒepieŋ hâcne.
10 Dâŋ mu biric enʒepieŋ, eme fârimâc ezejec;
dâŋ musanaŋkenʒepieŋ, eme waha qazejec.
Anutu e nâŋehec jukac hâcne.
Wofuŋ mocjaha araŋ bacnezo
11 Wofuŋzi mesanaŋ‐ticne fai‐naneo râehuc ŋicguru ʒi jaŋere hata âtezipore uŋ ʒiŋuc nazawec:
12 “Ŋicguru ʒi jaŋe manapie doc bapa dâŋ ekac, dâŋ irec manapie doc bapa dâŋ mi efârezejec, erâ jaŋe hâwic‐jopakac wiac irec hâwic‐ŋopame ɋarac ɋarac mi qanʒepieŋ.
13 Aricne, ŋoŋe Anutu Tâpiri Ɋuŋɋasaŋ Wofuŋ ere manapie tirimoc ezejec; ŋoŋe ere manapie hâhâwicne â araŋ babacne ezejec.
14 Eme eki tiri jujure fuŋqizecne eocmu, erâ Israe guru jajahec ine kike hehepiric qânâ â heheariwe buse ejacteocmu, â Jerusalem rune wiwitic â bitiŋ ejareocmu.
15 Eme bocjahazi ira heariwerâ waha jopahuc qanʒaŋ‐jopaocmu, erâ wâc bitiŋko kicjopame roc‐jopazo.”
16 Mumutaniŋ dâŋ i foforierâ ʒâfickezepac, mu qaqazu dâŋ i mamana motecfâc‐nane jaŋere maŋko râehuc basanaŋkezepac.
17 Wofuŋ, ʒâŋe mai‐ticne Jakobore kikefuŋ bâsoŋke‐jarekac, e hâcne woŋeckepemu â ere mamanac jupemu.
18 Manaŋgopieŋ, no â motec jahec‐nane, Wofuŋzi narec‐jofawec, nâŋe Israe maŋnao Anutu Tâpiri Ɋuŋɋasaŋ Wofuŋ, Zioŋ tikio juekac, eraonec ma â sowi eŋgopeneŋ.
19 Eme jaŋe ʒiŋuc ŋazaniŋmu: “Ŋoŋe bawe â faŋfaŋ indiŋ‐jopapie saŋucko â fufuŋgaŋko dâŋ mufua‐ŋarenʒepieŋ.” Me ŋicguru moc jaŋe nemufâc‐jeŋic sâcne mi indiŋ‐jopaniŋmu me? Me jujune jaŋere erâ hâmokicne jaŋerao iindiŋ mi râezo me?
20 Mu qaqazuc dâŋ â mumutaniŋ dâŋ irapec hazec râezo! Jaŋe dâŋ muŋgopieŋ i bajuku ine jâmbomac furic tatamac moc mi bâbâfuane.
21 Ŋic iŋucne jaŋe busâqoc mana utuckehuc â nânâre sâqorehuc hae mâreŋ sicne fotâc eniŋmu. Ehuc nânâre hâmoku mana gâpârerâ ŋicwofuŋ‐jeŋic â Anutu‐jeŋic musoriŋ‐jofaniŋmu.
22 Ehuc ʒâŋe faic fipie feocmu â juwic mâreŋko fipie huocmu; erâ manaŋgopieŋ, wiac honeniŋmu i busâqoc â dapâc â hâhâwicte uupic wânʒâŋ, irec duŋdapâcko raʒi sanaŋkeniŋmu.