12
Hiobezi dâŋ okacne bâtikie‐jareme arecne jahec â moc ewec
1 Eme Hiobezi dâŋ okacne kecʒiŋuc bâtikie‐jarewec:
2 “Jâmbomac, ŋoŋe ŋic sasawa jaŋere mic mecne,
irec ŋoŋe juku hâmopie maŋɋârâŋzi ŋoŋehec
mâmâc omaeocmu.
3 Manaŋgopieŋ, no ŋoŋere sâc mamanahec jaha juekopac,
no ŋoŋere wahamicne aricne;
ŋoŋe dâŋ muŋgopieŋ i mozi moc kâuc baekac?
4 No ŋic tiŋne â bahac fâsâc juekopac,
erâ ine âgofâc‐nane ŋoŋe sifu âke sisic enarehuc
gâgâwi enareŋgopieŋ.
Noni hâcne Anutu numucnepe mana‐nare jujec.
5 Ŋoŋe ʒârâ ʒâpâ tâmiric jueŋgopieŋzi
no qaisocnuhuc mu ruruc enareŋgopieŋ,
erâ no biac rândiŋkezo ehape
waha qazejec muhuc tuŋnuŋgopieŋ.
6 Fiuc roro â miti tâmiric jaŋe ine tâpiri‐jeŋicte manapie
Anutu‐jeŋic eha wama faio jueŋgopieŋ.
7 “Ŋoŋe qowi jaŋe wio‐jarepie ŋaza qazuc eniŋmu,
me sawa wipe jaŋe wio‐jarepie ŋazaniŋmu jaha.
8 Ŋoŋe mâreŋ qowi mecne, hâwec qowi mecne
mu wioc ejarepie
maŋɋârâŋte fuŋne ŋaza qazuc eniŋmu wâc.
9 Anutuzi wiac sasawa bâfuac‐jopa‐fârewec
i jaŋe kâuc mi baŋgopieŋ.
10 Anutuzi hâcne wiac jujune sasawa hone soŋaŋ ejareekac,
â ŋic nâŋâc ʒeŋgoma ere tâpirio jufâreeŋgopeneŋ.
11 Nânâ i aŋacnehec me aŋac tâmiric muhuc nâhoneeŋgopeneŋ,
irec sâc jaha hazec‐nâŋeczi dâŋ manarâ mana wosâc enʒepeneŋ.
12 Ŋicraŋɋa jaŋe maŋɋârâŋhec
â ŋicqizec jaŋe mamana tarahec.
13 “Anutu e ine maŋɋârâŋ â tâpiri rune,
e hâcne mamanasu â mamana tara‐ticnehec.
14 Eki fic moc hetâtieme mozi heɋârerâ baocmu?
Me ŋic moc kâpâcwâru bahame mozi bataraocmu?
15 Eki hoe aka hecneme
opâ jaŋe kereŋke‐fâreniŋmu,
erâ ekizia wâc mume
rumi fisirâ mâreŋ qofackehuc âke dumeocmu.
16 Anutu e tâpiri â sasanaŋ‐ticnehec,
eeatuc ŋic â ŋic eatuc‐jopakicne
jaŋe mâmâc ere rurumaŋko juŋgopieŋ.
17 E ŋic fekicne jaŋere maŋɋârâŋ qame wahaekac,
â mumutara ŋic maŋmutuc bacjopaekac.
18 E ŋicwofuŋ jaŋe eri ŋeŋe‐jeŋickonec tuŋjoparâ
kâpâcwâru bacjopaekac.
19 E taha bapa ŋic ŋaqi qoruc hetara‐jareekac
â ŋic tâpirihec bawahac‐jopaekac.
20 E dâŋ mumu ŋic bâniniŋ‐jopaekac,
â ŋicraŋɋa maŋɋârâŋ jowac roekac.
21 E ŋic qac momori jaŋere faio aaric‐ticne hoŋkeme feekac,
â mâreŋte guriŋ bapa jaŋere tâpiri wâc qame wahaekac.
22 E wiac soŋsoŋko fokac i hewirickeekac,
â duŋdapâc qisiric fokac
ira tatamac‐ticne bâfuaekac.
23 E ŋic gurune gurune basawec‐jopahuc basanaŋ‐jopaekac,
erâ ekizia wâc bawahac‐jopahuc bâsirowec‐jopaekac.
24 E guriŋ bapafâc‐jeŋic mutuc bacjopaekac,
ehuc maŋ bâsifuc ejareme
qac qâsoric ehuc jueŋgopieŋ.
25 Iŋuc ejareme dapâcko babarâ juhuc
biric boroc erâ maŋjeŋic omaeekac.