11
Zofarizi fuŋkerâ Hiobe dâŋ âzâcnehuc qorickewec
1 Hiobe e iŋuc mume Namati ŋic Zofarizi dâŋ okacne kecʒiŋuc muhuc bâtikiecnewec:
2 “Go mumusifuc dâŋ bocjaha mukomec
irec okacne mi bâtikie‐garehuc
wemocko mâc râepene foocmu.
Me ŋic moczi dâŋ racne bocjaha murakume
dâŋticne fârine moc eocmu me?
3 Go dâŋ kosa wosekomec izi sâcne bâniniŋ‐nâpoocmu me?
Me mu âke sisic boc etecne sâcne mi qatara‐garenaŋmu me?
4 Go kecʒiŋuc hâcne mukomec: ‘No dâŋ mukopac i fârine sasawa,
erâ Anuture maio bahac fâsâc domakopac wâc.’
5 Ojai, Anutu e jahac dâŋ okacne bâtikie‐garezac me!
Ehuc e jahacne miczi dâŋ gazame sâckezac.
6 Wiac bocjaha ŋiczi mi mamana tarane fokacte
eki maŋɋârâŋ ʒâkâŋnehec irec fuŋne gazazac me!
Eme go fuŋnege ʒiŋuc mana taranʒaŋ:
Anutu e kiŋge fokac irec sâcko mâcne,
baafeckehuc bâtiŋguekac hâcne.
7 “Anuture tâpiri â biŋe rara‐ticne i qeŋ bipinehec,
Go irec fuŋne sâcne hone mana tarac ecmu me?
8 Karoraczi Anutu aka sâcne mi hecneocmu,
goki ine ira fezore quŋke sâqoreocmu.
Anutu e hâmoc haere fuŋne manaekac,
goki ine kâuc baekic.
9 Anuture biŋe rara biaŋ
i mâreŋ qaŋeŋne sâcke‐fârerâ raekac,
â hâwec sâko sirickeekac wâc.
10 Anutuzi fisirâ dâŋgieo râecguha
mozi aka moc hecneocmu?
11 Anutu e ŋic sindaŋne jaŋere fuŋne manaekac,
ehuc eebapa‐jeŋic sâqocne honeekac wâc.
12 Kâte doŋgi ŋokacne moczi motecne rome ŋic hawari roocmu
dameŋ ira ŋic mutucne jaŋe wâc mamanahec eniŋmu.
13 “O Hiobe, go maŋge bârisiec,
erâ mege Anuturao sicnehuc numuzemec.
14 Go wiac sâqocne megao fokacko behetec raoc,
eme wiac sindaŋnezi ficgao mi fozejec.
15 Go iŋuc erâ mimi tâmiric qac firic jaha sâcne jucmu,
ehuc hâhâwic tâmiric juhuc wama faio sanaŋkerâ juzemec.
16 Rumizi fâre wahaekac
irec sâc jaha ʒârâ ʒâpâ fâre wahaocmu,
ehame ʒârâ ʒâpâ faio jumeŋ irec nikecguocmu.
17 Iŋuc fuame gorao dapâczi herisieme tatamac eocmu,
ehuc jujugezi ʒoaŋ tatamac irec sâc jâuruocmu.
18 Eme go wama faio juhuc Anuturao rowecketec
eki ŋezicgume juhâc qâhâmocmu.
19 Ehuc râsi jaŋere hâhâwic mocwâc mi bajucmu,
ehame ŋic ŋokac bocjaha jaŋe bafic‐jopacmurâ
numu‐gareniŋmu.
20 Ŋic sindaŋne jaŋe ine wiseniŋte hata basarâ
fifisacne fihuc maŋjeŋic gâckeocmu,
jaŋe hâmoczi rocjopaocte
irec mamana sawa juniŋmu hâcne.”