14
Hiobezi juju dameŋ bembeŋnere manatâc qâtâc ewec
1 “Ŋic ŋokackonec fuaeŋgopeneŋ nâŋâc
juju dameŋ‐nâŋec bembeŋne â neneŋ gie‐ticnehec.
2 Nâŋâc ʒariŋ ârizi fuarâ ŋeindaŋnehuc mocwâc mârâŋkeekac,
erâ nâkumuczi ʒoraha hae ŋafeme biac omaeekac
irec sâc eeŋgopeneŋ hâcne.
3 Eme no irec sâc jaha juhape
go honecnu‐bipiehuc dâŋgieo râecnuzo mukomec me?
4 Ŋic wâwânâŋhec jaŋeraonec
ŋic wâwânâŋ tâmiriczi sâcne fufuane me?
Aric kereŋne jâmbâŋ!
5 Go ŋic juju dameŋ‐nâŋecte ʒâfo bahuc
mosa dameŋ‐nâŋec biac mupaŋkemeŋ,
erâ i jâurunʒipeŋte aka henâremeŋ wâc.
6 Irec go behecnurâ norao ʒâŋe mocwâc mi fizemec,
eme no wama faio kiŋaŋ qaqa gie bahuc
juju dameŋ‐nanere ʒeri bubiaŋ manazepac.
7 “Jâc moc qapene mocwâc gitec hezo murâ heocmu mecne.
8 Jâc tucne â gâtâne i mâreŋmaŋko hâmozo eha
9 opâ ruacnepene mocwâc gitec herâ
jâc ɋâricne iŋucne soka sanaŋ eocmu.
10 Ŋiczi ine irec sâc aricne, e hâmome taraekac,
e iŋuc me iŋuc mocwâc mi eocmu.
11 Dameŋ moc maickeocmu ira opâ jaŋe ʒicke‐fâreniŋmu
â hâwec sâkozi wâc kereŋkeocmu.
12 Hâmokicne jaŋe mocwâc mi fahareniŋmu,
jaŋe qânikiŋzi fosanaŋkeha
mocwâc mi ɋâre‐jâmbâŋkeniŋmu,
aricne, jaŋe guŋsanaŋ fohapie
moczi moc mi wiwic‐jopaocmu.
13 Go hâmoc haeo ɋâricne soŋnucmurâ enarekac,
eme no ira soŋkerâ juhape aaricge fâre wahazejec,
ehame nore manasuhuc ʒâfo moc bacmu i maickezejec.
14 Ŋic hâmoocmuzi mocwâc sâcne ɋârerâ risieocmu me?
Iŋuc eene moc fome muzac no ʒârâ ʒâpâ dameŋ ʒi omaeme
dameŋ biaŋne moc fua‐nareocte woŋec juzapo.
15 Eme go dameŋ ira wira‐naretec dâŋ okacne bâtikie‐garezapo,
ehame meqâreŋge no honecnucmurâ egarezac.
16 Ehuc juju bapa‐nane mocwâc soŋaŋkehuc
sâqocne‐nanere nikecguzac.
17 Erâ go sâqocne‐nane bârârie‐narehuc bâtâmirenʒaŋ,
ehuc hehesic‐nane sasawa i wâc bârârâŋnenʒaŋ.
18 “Manakic, dameŋ moc maickeocmu
ira tiki jaŋe fâuckerâ ʒaŋkeniŋmu,
â haroŋaŋ jaŋe ŋerârieniŋmu.
19 Opâzi qânâ âeckekume pitiwaekac,
â hoe micsâkozi mâreŋ wokemaŋne jowa‐fâreekac
irec sâc jaha goki ŋicte woworic qatec wahaekac.
20 Go ŋic tâpiri‐ticne bawaharâ behetec ratâmireekac
â hawari‐ticne hetikiehuc
maigaonec bârârie sanaŋkeekic.
21 E mi manaha ŋokâfâcne jaŋe ʒâŋe biŋehec eeŋgopieŋ,
erâ wâc mi manaha mocwâc omae‐jareekac.
22 E jahacne sahacte sawa ʒâic manaekac,
ehuc e jahacnerea ki busâqoc eekac.”