15
Elifaʒizi Hiobe dâŋ okacne bâtikiecneme arec jajahec ewec
1 Eme Temaŋŋic Elifaʒi e Hiobe dâŋ okacne kecʒiŋuc bâtikiecnewec:
2 “O Hiobe, go dâŋ mukomec i racne â fârimâc sasawa.
3 Manakic, go dâŋ wosekomec
i ŋic maŋɋârâŋheczi mi mumune,
erâ juju bapa‐ticne i dâŋ racne
keciŋucnezi wâc mi dopeckeocmu.
4 Go ŋic jaŋe Anutu araŋ bacnehuc juhapie aka hejarekomec,
ehuc numucnehapie wâc hecke‐jarekomec.
5 Go maŋgezi mumu hehec egareha dâŋ keci mukomec,
ehuc burecŋic jaŋere dâŋ hawari ehuc fuŋnege hesoŋkekic.
6 Irec noni mâcne, go gahacne dâŋzi
dâŋgieo râecguhuc mugâpâre‐gareocmu.
7 “Goki fuŋkerâ mâreŋko jumeŋ me?
Me go fuarâ juhaŋtec
Anutuzi tiki bâfua‐fârewec me?
8 Me Anutuzi wiac mana biric ewec
i goki moc hone manac emeŋ me?
Me maŋɋârâŋhec juju i go buc jukic me?
9 Manakic, goki wiac manakomec
i nâŋe manaeŋgopeneŋ wâc,
erâ go mamana tara fogarekac
sâc ijaha nâŋe wâc fonârekac.
10 Maŋɋârâŋ qazu‐nârekicne i gore mamaczi mi fuarâ juha
ŋic jaŋɋâŋhec jumbiŋ jaŋe hâcne nâzâ qazuc epie manambeŋ.
11 Anutuzi mu bâmiriŋ egarezo mume
wemocte qikiŋ nekomec?
 dâŋ wama ruaine irec manatec
wemocte fâri tâmiric ekac?
12 Go wemocte buge taŋtaŋ âeckeha
ʒâŋe bâbâroŋ honec‐nâpokomec?
13 Erâ wemocte Anutu aaric manacnehuc
dâŋ keciŋucne bocjaha wose rakomec?
14 Ŋic ŋokackonec fuakicnezi jâmbomac
bahac fâsâc moc juocmu me?
Me Anuture maio kiŋ tâmiric moc domaocmu me?
15 Manakic, Anutu e aŋelofâc‐ticne
jaŋerao mi fohoreweekac
erâ sambâŋte ŋecjucfâc jaŋere wâc
maname mi sâcke‐hâmoekac.
16 Ehame ŋic sindaŋne â mamakâcne
e wiac hehesicne i nânâ opâ iŋucne
gapec tâmiric nâ bac eekaczi
wemocko bahac fâsâc erâ kiŋ tâmiric juocmu.
17 “O Hiobe, go manahaŋtec dâŋ moc gaza mutâc epe,
ehuc wiac hone manac epo irec binaŋ bagarepe.
18 Ŋic maŋɋârâŋhec jaŋe mamacfâc‐jeŋic jaŋeraonec
dâŋ fârine manambiŋ
i moc mi hesoŋkehuc mu qazuc enarembiŋ.
19 Jaŋe mâreŋ‐jeŋicko ŋic jabane moc mi jumbiŋte
mozi moc eatuc‐jopame Anutu râpeckenʒapiŋ.
20 Ŋic sindaŋnezi ŋic âgofâc‐ticne bâʒâic‐jopaocmu
e mâreŋko jufeocmu sâc hâhâwic bajuocmu.
21 Wiac hâhâwicnere fânâŋzi hazec‐ticnao huocmu,
erâ wama faio sâcne mac jukopac muhame ʒikaŋiczi fisicneocmu.
22 E ʒikare biŋe ekopac muhuc
hâmoc wisecneocte maname quŋkeocmu.
23 E nânâ wena moc bâfuape muhuc
koŋkoŋkehuc juekac,
ehuc ʒiŋuc manapaŋkeekac:
No sisipiricte biŋe hâcne.
24 Ehuc ŋicwofuŋ moczi ʒikao raocte ʒawiehuc juekac,
irec sâc sisipiriczi nore woŋec foha
hâhâwic faio hume serereŋ juekopac.
25 Ŋic moc e Anutu bapafâre râsi ecnehuc maŋbâiŋ ecneocmu
e wiac iŋuc hâcne fuacneocmu.
26 Ŋic iŋucnezi pepec ehuc maro‐ticne he bâfeŋnerâ kiwaehuc
Anutuhec juju gie baocte ʒoɋac eekac.
27 E ʒâŋe mai‐ticnao wokemaŋ ruaekac
erâ nânâ âmbâŋ nâhuc
biuc wokemaŋ sâkohec eekac.
28 Ŋic eki hâcne hae ima bakicne i ro rauc ewec,
â fic ʒocte biŋe qahuc behekicne
ira ŋec juc ewec,
irec ine fic hae i ʒikazi imackeocmu.
29 Ŋic iŋucnezi mafa mâriri sâkohec mi eocmu,
erâ wiac focnekac i fofo sanaŋ fohuc
fua sawec wâc mi eocmu.
30 E dapâc wisecne‐bipieocmu,
ehuc jâc moc ʒoczi ʒahuc
tieŋ taeŋne ʒâtâmireekac,
me mâŋâŋzi âri‐ticne ficne sueme
ratâmireekac irec sâc eocmu.
31 E mutuc erâ wiac sisirowenao roweckeocmu
ine irec fârine wiac sisirowene jaha fuacneocmu.
32 Ehame dameŋ‐ticne mi taraha
jâczi ururuckerâ mocwâc mi fieekac
irec sâc jaha eocmu.
33 E waiŋ qaŋeŋnezi hândâŋ‐ticne woze qeuc mi ehuc mâtâckeekac,
me oliwa jâczi ârickerâ qasawa eekac irec sâc.
34 Ŋic sindaŋne jaŋe ɋâric tâmiric juku omaeniŋmu
â fic hae‐jeŋic hotâ moneŋzi bakicne
i ʒoczi ʒâseŋke‐fâreocmu.
35 Ŋic iŋucne jaŋe sisipiric fuaocte
mamana gie bahuc hehesic bâfuaeŋgopieŋ,
ehame eeatuczi maŋjeŋic fusucmarâ foekac.”