2
Hiobe e eesâic fuacneme sanaŋkeha arec jajahec ewec
1 Eme ʒoaŋ mocko aŋelo jaŋe Wofuŋte maio mocwâc tumaŋnehapie Sataŋ e ŋondeŋ‐jeŋicko mâmâc fisirâ Wofuŋte maio domawec wâc.
2 Eme Wofuŋzi Sataŋ ʒiŋuc muhuc wiocnewec: “Go wenirec warekomec?” Iŋuc wiocneme Sataŋ e dâŋ ʒiŋuc bâtikiecnewec: “No mâreŋ sâc fotâcne‐fârehuc juku warekopac.”
3 Iŋuc mume Wofuŋzi Sataŋ ʒiŋuc âzâcnewec: “Go iŋuc juhuc kiŋaŋŋic‐nane Hiobe moc hone manac ecnemeŋ? Manakic, mâreŋko ŋic e iŋucne moc mi juŋgopieŋ, e bahac tâmiric â siocmâc juhuc Anutu no araŋ banarehuc sâqocne qikiŋneekac. Go e fuŋne tâmiricko sipirickecmurâ esoc qafeŋ enaretec mana‐garepo; ehame eki ine sifu norao qohotahuc juekac.”
4 Sataŋzi ine Wofuŋ ʒiŋuc âzâcnewec: “Manakic, ŋic moc e juju‐ticne ŋezickeocte wiac‐ticne sasawa qikiŋne‐fâreocmu.
5 Irec go sahac‐ticne bâuatec acmâc jaha sâwecgurâ behecguocmu.”
6 Sataŋ e iŋuc mume Wofuŋzi dâŋ kecʒiŋuc âzâcnewec: “Sâcne, no e gore meo râekopac, go wiac iŋuc me iŋuc ecnezo murâ ecnec, mâc juju‐ticne ine mi jâoc rozemec.”
7 Eme Sataŋ e Wofuŋ beherâ ra Hiobe wicwakoc bâfuacneme sahac‐ticne sâcke‐fârewec.
8 Ehame ʒafeo ŋehuctecne bac hahacdaczi wicsâŋiŋ hegâkoŋkewec.
9 Iŋuc ehuc ŋeha ŋonâŋ‐ticnezi âzâcne muwec: “Hâc, go wiac fua‐garekac i mana‐bipiehuc Anuturao qohotakomec? Go e sâweckerâ hâmoc me!”
10 Hiobezi ine dâŋ kecʒiŋuc bâtikiecnewec: “Go ŋokac mutucne jaŋe dâŋ mueŋgopieŋ irec sâc mukomec. Anutuzi wiac biaŋne tahac‐nâfome bubiaŋ faio ro amec ehuc jupec, eme ʒi eraonec jaha wiac ʒâʒâicne ware‐nâcteme qikiŋnepere sâckeocmu me?” Hiobezi ʒâic sâko manahuc sifu Anutu dâŋ babahacne moc mi âzâcnewec.
Hiobere âgofâc jaŋe fisimbiŋ
11 Hiobere âgofâc jahec â moc kecʒiŋuc jaŋe jumbiŋ: Temaŋŋic Elifaʒi, Suhiŋic Bilidadi erâ Namati ŋic Zofari. Jaŋe Hiobezi ʒâic serereŋ manahuc ŋekac, biŋe iŋuc manarâ e iqickehuc hone manac ecneniŋte mumockembiŋ.
12 Erâ jaŋe ra fisirâ taic domahuc Hiobe honerâ mi ʒâŋitambiŋ. Ʒâhec ine ʒâŋitarâ kio wâuŋa ehuc ŋaqi‐jeŋic bâsuckerâ busâqoc sâko manahuc ʒafe ruambiŋ.
13 Iŋuc erâ mâreŋko waha qâterâ ŋehapie ŋafe ʒoaŋ 7 tarawec. Ehame Hiobe e ʒâic serereŋ sâko manawecte ehec dâŋ wiac muc manac moc mi embiŋ.