3
Hiobezi fufua dameŋ‐ticne musâqorewec
1 Eme juku Hiobe e fuŋkerâ mu huacbuc ehuc fufua dameŋ‐ticne sâweckewec.
2 Ehuc dâŋ kecʒiŋuc muwec:
3 “Fufua dameŋ‐nane i sâwecte biŋe ezejec,
â neŋgoc‐nanezi fuŋkerâ kiwecnuwec
ŋafe i wâc iŋuc jaha.
4 O Anutu, go mutec ʒoaŋ i dapâc ezejec,
ehuc ʒoaŋ irec mocwâc mi manasuzemec,
â tatamacge sakarecnezemec.
5 Go mutec ʒoaŋ i ŋaferâ dapâc siŋsiŋ ezejec,
ehame karoraczi fuarâ ʒoaŋ sâockezejec.
6 Go mutec ŋafe ira dapâc qisiric fuazejec,
erâ ŋafe i ʒoaŋ gie bapa birionec bârâriezemec,
ehame mosare birio wâc omaezejec.
7 Ŋafe ira ɋâric mocwâc mi fuapie
ʒeri fânâŋ tâmiric fohuc juzejec.
8 Qaŋgec bapa mujaretec ʒoaŋ i sâweckenʒepieŋ,
oâ sâko ʒâŋene Lewiataŋ suruckepie momori eekac
jaŋe iŋuc hâcne enʒepieŋ.
9 Go mutec bâpiŋ sâkozi mocwâc mi tamaezejec,
ehame ŋafe ira hae mocwâc mi furezejec.
10 Ŋafe izi neŋgoc‐nanere bumaŋkonec fuapemurâ aka mi hehuc
ʒâic busâqoc maŋko râecnuwecte sâweckezo wâc.
11 “No wemocte neŋgoc bumaŋko mi hâmopo,
me fuarâ izia wemocte mi omaepo?
12 Neŋgoc‐nanezi wemocte qicnuwec,
â wemocte moŋ gumecnuwec?
13 No dameŋ ira hâmozapo muzac
ʒiŋuczia ʒâŋeruŋko fomanazapo.
14 Ŋicwofuŋ â babaficfâc‐jeŋic hae sesuc
heɋârehuc bâpiaŋkembiŋ
jaŋehec fozapo hâcne.
15 Me ŋic fekicne ficjeŋic gol â siliwazi hefusembiŋ
jaŋe iŋucne fozapo.
16 Me naru motec hâmocne fuaeŋgopieŋ
jaŋere sâc wemocte mi fuapo?
17 Ŋic sindaŋne jaŋe ʒâŋe ʒâŋeruŋko hâcne gie‐jeŋic hetaraeŋgopieŋ,
â betaŋkeeŋgopieŋ jaŋe ira fomanaeŋgopieŋ.
18 Kâpâcwâru ŋic jaŋe ira hâcne âke mâteŋ‐jopaekac,
ehame soŋaŋfâc‐jeŋic jaŋere owa fânâŋ mocwâc mi manaeŋgopieŋ.
19 Ira hâcne kâcɋene mecne piticne mecne
mâmâc fomanaeŋgopieŋ,
â kiŋaŋ qaqa jaŋe bomboŋfâc‐jeŋic
jaŋere meo mocwâc mi jueŋgopieŋ.
20 “Kihuhuŋ‐jopaekac jaŋe Anutuzi wemocte
tatamac bâfua‐jareekac,
a busâqoc manahuc jueŋgopieŋ
jaŋe wemocte juju tahac‐jopaekac?
21 Jaŋe hâmocte woŋec juipieeŋgopieŋ,
ehuc moneŋ mafare mâcne,
ʒâŋeruŋte manapie fefene eekac,
22 Jaŋe ʒâŋeruŋko huniŋte boc ejareekac,
eme ira fohuctecne ʒeri sâko bâfuaeŋgopieŋ.
23 Anutu e wemocte ʒâhec juju‐jeŋicte fuŋne
hesoŋke‐jarehuc
hata‐jeŋic sasawa hebâzicke‐jareekac?
24 Mu huacbuc‐nane izi nânâ‐nane eekac,
â kio huse ee‐nanezi ine opâ sâro iŋucne wahaekac.
25 Hâhâwic bâfua‐nareekac wiac sasawa
izi fai‐naneo fefâreekac.
26 No wama faio mâcne, sisi hâhâŋ faio juekopac,
ehame ʒârâ hâriŋ wiaczi moc mi behecnuekac.”