30
Hiobezi ʒârâ ʒâpâ maŋko juwec irec dâŋ
1 “Ŋic socɋâri jaŋe nore sâc mi eŋgopieŋzi
gâwie‐nareŋgopieŋ.
No mamacfâc‐jeŋic jaŋere manape jawa qaqane eha
qâtofâc‐nane bafic‐jopahuc
lamafâc‐nane soŋaŋ‐jopaniŋte mupie muzac
mi mana‐jarezapo.
2 Jaŋe ŋicguru rorokacnezi
nore gie moc baniŋte tâpiri basanʒapiŋ.
3 Jaŋe ŋic hapetacte nânâre hâmo sipiric ehuc
kâteonec wâcwiac gâtâne unucke nâc ejumbieŋ.
4 Jaŋe wawec â wifu hândâŋne nâjumbieŋ,
â qaqanaczi nânâ‐jeŋic ejujec.
5 Fiuc roro owackecnehuc jâpeeŋgopeneŋ
irec sâc jaha owacke‐jarehuc
jâpec‐jopa jumbieŋ.
6 Eme opâwâcko â haroŋaŋ ŋoŋondeŋko soŋke jumbieŋ,
erâ qânâuŋko â mâreŋ tucduŋko juju fofo ejumbieŋ.
7 Jaŋe qowi iŋucne kâteo juhuc owacke jumbieŋ,
ehuc jâcfuŋko heheâroŋ erâ ŋejumbieŋ.
8 Jaŋe ŋicguru waha qaqane â ʒâŋe biŋe tâmiric,
irec mâreŋ‐nâŋeckonec jâpec‐jopapie wise‐fârembiŋ.
9 “Jaŋe dameŋ ʒiŋuczia ware mu gâgâwi enareŋgopieŋ,
ehuc juju‐nanere qâqiŋ qahuc âke sisic enareŋgopieŋ.
10 Erâ nore manapie mamakâcne eha dic banareŋgopieŋ,
me ware honecnurâ tâfecnuniŋte acmeruŋ mi eŋgopieŋ.
11 Anutuzi bârokawecnuhuc tâpiri‐nane
bawahawecte manabâc tâmiric
râsi sanaŋ enareŋgopieŋ hâcne.
12 Ŋicguru ʒororone keci jaŋe onʒoŋ jaha
ro fâre enarehuc jâpecnuzo eŋgopieŋ,
ehuc sipiricnuniŋte ʒawiehuc roroc eŋgopieŋ.
13 Jaŋe wisezipore aka henarehuc imacnuzo eŋgopieŋ,
ehame moczi moc mi hecke‐jarekac.
14 Râsi jaŋe sac henʒaŋnerâ haeo fisieŋgopieŋ
jaŋe irec sâc jaha fisi‐nareŋgopieŋ.
15 Sisipiriczi maicnume bipic‐nane tarakac,
ehame mâŋâŋzi rehac ficne sueme raekac
irec sâc jaha ʒâŋe biŋe‐nane rârâŋnekac,
erâ mâŋâŋzia karorac ficneme raekac
irec sâc jaha jujuhâmo‐nane omaekac.
16 “No ʒi hâmozo ekopac hâcne,
ʒârâ hâriŋ‐nanezi moc mi afeckekac.
17 Ŋafeo siec bibiric‐nane sasawa ʒâicnu‐fâreekac,
ehame ʒâic serereŋ dameŋ‐nanezi moc mi behecnukac.
18 Tâpiri sâko moczi sahac‐nane fiŋiŋiŋnume
manape ŋaqi fâŋfâŋne rojukopac tinac ekac.
19 Anutuzi tuŋnume sohoŋmaŋko hukopac,
ehuc rufe â ʒafe iŋucne ekopac.
20 Erâ Anutu go wira wâwâsic egarepe micnaneo mi roekic,
â numu‐garepe wâc mi mana‐nareekic.
21 Go busâqoc moc mi mana‐narehuc râsi sanaŋ enareekic,
ehuc tâpiri mesanaŋgezi nu jâpec enarehuc juekic.
22 Go mâŋâŋ sâko manacnehaŋ ficne suecnuekac,
â mâŋâŋ ɋicwânʒâŋneheczi qâtuŋnuekac.
23 Jei, no manakopac, go hâmocte meo râecnuzo ekomec,
hâmoc hae ŋic ʒeŋgoma nâŋere biŋe mukicne
ira râecnukomec hâcne.
24 “Go wemocte sisipiriczi imacnuha
baficnucmurâ wira wâwâsic egarehape
qa bâʒâic enarekomec?
25 No ŋic ʒârâ hâriŋ faio jumbiŋ jaŋere erâ
kio wâwâsic mi egare jupac me?
Me qarâ suriŋne jaŋere busâqoc
mi mana jupac me?
26 No jujuhâmo â tatamacte mamanac jupo,
ehame ine ʒârâ hâriŋ â duŋdapâc izi fua‐narewec.
27 No ʒâic serereŋ manahuc
bu ʒaʒamaŋ‐nane fâuckekac,
ʒâic dameŋ‐nanezi sawa maicnurâ fokac.
28 Wiac moczi moc mi bâmiriŋnukacte
busâqoc manahuc makuc bahuc jukopac,
ehuc ŋic tutumaŋko faharerâ baficnuniŋte numu‐jareekopac.
29 Marac fânâŋ‐nane i kâte qâto jaŋe âgofâc‐jeŋic
basac‐jopahuc qauu qaeŋgopieŋ,
â qera jaŋe dâŋeeŋgopieŋ irec sâc ekac.
30 Sahac‐nane ʒocnehec efârehuc gâpârerâ iriweckekac.
31 No mârâc jaha woŋgâŋ qahuc ʒeri bubiaŋ gae hejupac,
â dameŋ ʒiŋuczia ine makuc bahuc busâqoc gae sawa heekopac.