29
Hiobezi mârâc jujuhâmo fuacnewec irec manasuhuc dâŋ muwec
1 Hiobe e ʒuhuckerâ dâŋ kecʒiŋuc muwec:
2 “Jei, Anutuzi mârâc jaha hone soŋaŋ enareme juhâc qâhâmopo
juju iŋucne mocwâc fua‐nareme juzapo me!
3 Anutu e dameŋ ira hâcne nohec hati juwec,
ehuc dapâcko juhape tamae‐narewec.
4 No dameŋ ira Anutuzi fic hae‐nane hone maiŋ ecnehuc
hâpo heâroŋ enareha ŋic ʒoɋac sasanaŋhec jupo.
5 Anutu bapafâre e dameŋ ira hâcne nohec juha
naru motecfâc‐nane jaŋe
qazu orâŋ enarehuc jumbiŋ.
6 Noniŋ bulimakaofâc‐nane jaŋe
susu bocjaha bâfua‐nare jumbieŋ,
â oliwa jâcnane i mâreŋ kereŋnao sarape sifu fua biaŋ ewec.
7 Hae soŋaŋ micne jaŋe tumaŋnehapie sâc
no qâtec‐joparâ ŋondeŋ‐jeŋicko ŋeŋe juju ejupac.
8 Ehame ŋic motec jaŋe honecnurâ izia soŋke jumbieŋ,
â ŋicqizec jaŋe araŋ banarehuc fahare jumbieŋ.
9 Ŋic fekicne jaŋe dâŋjeŋic bâniniŋkerâ
dâŋemâc ŋejumbieŋ,
10 â ŋic ʒâŋe biŋe sâkohec jaŋe wâc iŋuc jaha
dâŋ tâmiric ŋejumbieŋ.
11 Hone manac enarembiŋ ŋic i jaŋe sasawa
wiac ebac epo irec muac baafec enare jumbieŋ.
12 No ŋic hapetac jaŋe wira wâwâsic enarepie
manarâ hone bafic ejare jupac.
13 Ŋic jaŋe sipirickezo ehapie bafic‐jopape mumbiaŋnu jumbieŋ,
â hozec jaŋe ehâmo‐jarepe ʒeri bari ejumbieŋ.
14 No dameŋ sâc wiac ebac epe
tiŋke biaŋ efâre jujec.
15 No ʒâŋe tiŋtuŋ jaŋe jowa qataŋ ejare jupac,
â kike demba jaŋe dope hutuŋ ejare jupac wâc.
16 No ŋic hapetac mamac ejarehuc bâmec bajare jupac,
â ŋic furune wiac qacne gâpâcne fua‐jarewec
iŋuc jaha wâc hone bafic ejare jupac.
17 No ŋic sindaŋne jaŋere tâpiri bawaha jupac,
ehuc bâʒâic‐jopa jumbieŋ jaŋe ŋezic‐jopa jupac.
18 No ʒiŋuc manasuhuc jupo: ‘No jufeku
ŋicqizec jâmbâŋ epemu,
ehuc fic hae‐naneo hâmoc biaŋne hâmopemu.
19 No jâc moczi gâtâne sicnerâ opâ bâfuaekac,
â tieŋ taeŋne maniŋ titikuczi bâgunuckeekac
irec sâc erâ jufepemu.
20 Ʒâŋe biŋe sâko‐nane wawahane mi eocmu,
â tâpiri‐nane wâc mi omaeocmu.’
21 “No ŋic jaŋe niniŋkerâ ŋehapie dâŋ jaza jupac,
erâ hazec râehapie dâŋ mutâcne‐jare jupac.
22 Eme dâŋ mutarape jaŋe okacne mi bârisie jumbieŋ;
dâŋnane i hoe sisic iŋucne fai‐jeŋicko wahame
mana sakac ejumbieŋ hâcne.
23 Ŋic jaŋe ʒoaŋ fârorocte takic‐jopame hoere ejareekac
irec sâc jaŋe dâŋnanere boc ejare jujec.
24 Jaŋere ʒâic busâqoczi nore ʒeri bubiaŋ
sâcne mi bawaha jujec,
ehame no mu âkeriŋ ejarepe qacfiric ejumbieŋ.
25 No ŋicwofuŋ jaŋe eeŋgopieŋ irec sâc
qizec‐jopahuc hata mutâcne‐jare jupac,
erâ ŋicwofuŋ moczi momorifâcne bânie‐jarehuc
sâcmutâc ejareekac irec sâc ejare jupac,
ehuc hâbi‐jeŋic goroŋkeme basanaŋ‐jopa jupac.