32
Elihuzi fuŋkerâ Hiobe dâŋ okacne bâtikiecnewec
1 Hiobe e qizec qahuc, “No bahacmâc jukopac” iŋuc muhuc dâŋticne mutarawecte ŋic jahec â moc jaŋe ʒuhuckerâ dâŋ okacne mi bâtikiecnehuc mâc niniŋkerâ ŋembiŋ.
2 Iŋuc epie Ram guruonec Buʒiŋic Barakere ŋokâ ʒâŋene Elihu e Hiobezi jahacnere maname sâckeha Anuture maname sâqorewecte boc aarickewec.
3 Erâ Hiobere âgofâc jahec â moc jaŋe Hiobe dâŋ bâtikiecnehuc bahac‐ticnere fuŋne bataniŋkezo eipiembiŋte jaŋere wâc iŋuc jaha aarickewec.
4 Mâc e ŋicmotec juwecte jaŋe dâŋjeŋic muhapie dâŋemâc ŋewec.
5 Ʒi ine Hiobezi dâŋticne mutarame okacne ʒuhuckerâ bâtikiecneniŋte tâpiri basapie honec‐joparâ aarickewec hâcne.
6 Iŋuc ehuc fuŋkerâ dâŋ kecʒiŋuc muhuc jazawec:
“No motec ɋâri â ŋoŋe ine ŋicqizec,
irec maŋnaneo dâŋ fokac i ŋazazore
hâwicnume behepac.
7 No maŋnanezi ʒiŋuc manasupac:
Ŋicqizec jaŋe dâŋjeŋic nazaŋ gazaŋ ehuc
maŋɋârâŋ‐jeŋicte fuŋne bataniŋkenʒepieŋ.
8 Erâ ʒi ine ʒiŋuc manakopac: Jara bocjahazi
maŋɋârâŋ mi bâfua‐nâreekac, aricne,
Anutu bapafârere Mârozi maŋnâŋecko hurâ bâfua‐nâreekac.
9 Ŋicqizec jaŋe sawa maŋɋârâŋhec mi jueŋgopieŋ,
me jaŋe sawa biaŋne â sâqocne irec fuŋne
mamana tara i wâc mi fokac.
10 Irec ʒiŋuc mukopac: ‘Ŋoŋe dâŋnanere hazec râeniŋ,
ehame maŋnaneo dâŋ fokac i hâcne ŋazape.’
11 “Manaŋgopieŋ, ŋoŋe dâŋŋeŋic muc manac ehapie
no tatakic tâmiric ŋehuc ʒiŋuc manapac:
Jaŋe dâŋ muku maŋɋârâŋ dâŋ moc bâfuarâ
muniŋmu me mâcne,
iŋuc muhuc woŋec ŋepac hâcne.
12 Ŋoŋe dâŋ muhapie no manatâc qâtâc epac,
ehuc ine ʒiŋuc mana tarapac:
Hiobezi dâŋ mujec i ŋoŋe mutiŋnehuc
okacne biaŋne jaha bâtikiecneniŋte
eipie sâqorembieŋ.
13 Irec ŋoŋe wemocko ʒiŋuc moc muniŋmu:
Nâŋe maŋɋârâŋhec juŋgopeneŋ.
Ŋoŋe eipiembiŋte Anutu e jahac dâŋ okacne bâtikiecnezejec.
14 Hiobe e no mâcne, ŋoŋe dâŋ ŋazajec,
no nazame muzac ine ŋoŋe okacne bâtikiecnembieŋ
irec sâc mi bâtikiecnezapo.
15 “O Hiobe, jaŋe dâŋ basarâ
okacne bâtikie‐gareniŋte eipieŋgopieŋ hâcne.
16 Eme jaŋe niniŋkerâ dâŋ muniŋte quŋkehuc
mâc domahapie no wâc iŋuc jaha ʒuhuckerâ
dâŋemâc sâcne domapemu me?
17 Aricne, no ʒi hâcne dâŋ okacne bâtikie‐garepemu,
ehuc maŋnaneo dâŋ fokac i gazapemu.
18 Manakic, no dâŋ muzore fâcfâc boc âkecnukac,
irec ʒuhuckerâ dâŋemâc mi ŋepemu.
19 Me dâŋ mumure hata basahuc
waiŋ ɋâricnezi ʒopo fusucmarâ âte fâuckeekac
irec sâc âte fâuckepemu.
20 Irec no dâŋ okacne bâtikie‐gare‐jâmbâŋkehuc
maŋnane fâre wahazejec.
21 No mana‐ŋarepe feriŋ wahariŋ eha
ŋic moc me moc mi mumbiaŋkepemu.
22 No ŋic mumumbiaŋ‐jopa i moc mi eekopac,
moc epe muzac Anutuzi biac bâsirowecnuzac.