33
Elihuzi Hiobere maname mi sâckeha dâŋ âzâcnewec
1 “O Hiobe, go ʒi dâŋnanere hazec râec,
ehuc dâŋ sasawa mukopac i mana‐fârec.
2 Manakic, no okacne bâtikie‐garezo micnane aŋkekopac,
ehuc maŋnaneo dâŋ fokac i muzo ekopac.
3 Dâŋnane sioc tâmiric sasawa,
â dâŋ mupemu i wâc fârine jaha.
4 Anuture Mârozi bâfuacnuwec,
â bapafârere nokafezi juju bâfua‐narewec.
5 Go dâŋ okacne bâtikie‐narezo murâ
bâtikie‐narezemec.
Go dâŋge biaŋne manasu biric erâ
nore maio domazemec.
6 Manakic, nâhâc Anuture maio
sâc mocjaha ekoperec,
eki hâcne nâhâc mâmâc jaha
afezi bâfuac‐nâfowec.
7 Irec go nore mi hâwicguzejec,
no ʒoɋac sâko egarehuc mi bawahacgupemu.
8 “Go nore maio dâŋ mutec manapac,
ehuc micfânâŋgere hazec râepac.
9 Go kecʒiŋuc hâcne mukomec:
‘No kiŋ tâmiric jukopac,
no wiac hehesicne moc mi epo,
â bahac moc mi bâfuapore
maŋɋaɋac jukopac hâcne.
10 Anutuzi ine maŋgâŋ râsi enarehuc
qa bâtiŋ enarekac.
11 E kike‐nane jâc fifitacko râehuc
eebapa‐nane i me i honeocte ruc banareekac.’
12 “Manakic, no ʒiŋuc gazakopac:
Go dâŋ mukomec i mi sâckekac;
Anutu e ŋic mamana siricke‐fâreekac.
13 Ehame go wemocte ere manatec sâqoreha ʒiŋuc mukomec:
‘E dâŋnane i me i irec okacne moc mi bâtikie‐nareekac’?
14 Anutu e dâŋ mumure hata‐ticne fuŋne fuŋne fokac
i ŋiczi hone takireeŋgopeneŋ.
15 Ŋic nâŋâc ŋafeo guŋ fohapene
Anutuzi guŋqâhâŋ enârehuc dâŋ nâzâekac.
16 Iŋuc enârehuc hazec‐nâŋec bâuŋtoekac,
ehuc uŋ sawaŋ enâreme hâwic‐nâpoekac.
17 Nâŋâc maŋfefe mi ehuc sâqocne râpeckenaŋte
Anutuzi iŋuc hâcne enâreekac.
18 Nâŋâc ʒikare micko fenʒipeŋte ŋezic‐nâpoekac,
â nombâŋ mecnaonec wâc rocnâpoekac.
19 “Anutu e ŋic bâtiŋ‐nâpohuc mume huc fua‐nâreekac,
â siec bibiric‐nâŋec ʒâicke‐fâreekac.
20 Ŋic hucheczi nânâre boc mi ecneekac,
ehuc nânâ aŋacnere wâc maname mamakâcne eekac.
21 E sahac‐ticne waha‐fâreme
siec sawa eekac.
22 Ehuc hâmoc haere biŋe eekac hâcne.
23 Ehame Anuture aŋelofâc guru dindiŋ jaŋe ŋic nâŋâc
tiŋne jujure fuŋne nâzâ nâwotuc eeŋgopieŋ
jaŋeraonec moczi ŋic e bafickeocte fuaocmuo
24 ine ere busâqoc manahuc Anutu ʒiŋuc âzâcneocmu:
‘No kiwiric‐ticne rokopacte bataratec
hâmoc haeo mi huzejec.’
25 Eme eki manacneme ŋic e ɋiɋic qarâ
mârâc tâpirihec juwec irec sâc jaha
mocwâc bâfuarâ juocmu.
26 Ehuc Anutu numucneme micnao roocmu,
erâ bubiaŋ manacnehuc araŋ bacneocmu,
ehame Anutuzi manacneme kiŋfâsâc eocmu.
27 Ŋic e iŋuc fuacneme hofao fuŋne‐ticne ʒiŋuc mutaniŋkeocmu:
‘No sâqocne bâfuapo, ehuc wiac ebac epe sâqorewec,
ehame Anutuzi ine sifu akicnuwec.
28 E iŋuc ehuc hâmockonec bataracnuwecte
juju mocwâc fua‐nareme tatamacko jukopac.’
29 “Manakic, Anutu e wiac iŋucne
ŋic nâŋâcnao arecne arecne baekac.
30 Erâ i ŋic juju‐nâŋec ŋezickehuc bârisie‐nâreme
bubiaŋ faio ʒuhuckerâ junaŋte iŋuc eekac.
31 O Hiobe, go dâŋnanere hazec râec,
ehuc niniŋkerâ ŋehaŋte dâŋ mupe.
32 Me dâŋ okacne bâtikie‐narezo murâ bâtikie‐naretec manazepac;
go wiac ebac etec sâckewec;
i jâmbâŋ mutaniŋkepemurâ enarekac hâcne.
33 Me dâŋ okacne arictac ekacko ine mâc
niniŋkerâ dâŋnanere hazec râehaŋtec
weniŋuc erâ maŋɋârâŋhec ezo
irec fuŋne qazu‐garepe.”