41
Anutu e tâpiri‐ticnere fuŋne jaha ʒuhuckerâ Hiobe âzâcnewec
1 “Go oâ sâko ʒâŋene Lewiataŋ
e hawicko sâcne rocmu?
Me nameŋ‐ticne bofackehuc mecqaŋeŋnehec
muczi sâcne basanaŋkecmu?
2 Me go masune sâcne qâqâ hafecmu,
me hawiczi mecqaŋeŋ‐ticnao sâcne hetec huocmu?
3 E behetec ra juocte numu‐gareocmu me?
Me go ere busâqoc manacmurâ
kio wâwâsic moc egareocmu?
4 Me gohec ʒâʒâfic ehuc dameŋ tâmiric
kiŋaŋ qagarehuc juocte mupaŋkeocmu?
5 Me kiŋaŋ narufâcge jaŋehec mamasiri eniŋte
wipe mâteŋne iŋucne sâcne bajucmu?
6 Me opâ qowi roro ŋic jaŋe furi‐ticne
bafec bawahac ehuc dâŋgie moc baniŋmu?
Me âbârâ ŋic jaŋe nareŋ gareŋ gie baniŋte
sâcne hezuniŋmu?
7 Go sahac‐ticne sasawa saozi
sâcne âke mârâŋke‐fârecmu?
Me tepe motec sâkozi
qizec‐ticne sâcne muru fâuckecmu?
8 Manakic, go ehec arec wâŋ sawa juju gie bacmu,
erâ irec faicnao mocwâc bazore mi egareocmu;
ehuc ehec juju gie bacmu irec moc mi nikecguocmu.
9 Ŋic moc e Lewiataŋ honeocmuzi
hâbi‐ticne goroŋkeme mâreŋko waha qaocmu.
10 Lewiataŋ suruckepene momori jâmbâŋ eocmu,
ehame ŋic moczi ere maio sâcne mi domaocmu.
11 Mozi ehec juju gie bahuc sâcne juocmu?
Ŋic moczi iŋuc sâcne moc mi ejâmbâŋkeocmu,
i aric kereŋne jâmbâŋ.
12 “Irec go hazec râehaŋ Lewiataŋ
kike‐ticnere gazape manac,
ehuc sosoka â tâpiri ɋicwânʒâŋ‐ticnere
fuŋne wâc gaza mutâc epe.
13 Sahac‐ticne i ŋic moczi sâcne mi âkehockeocmu,
erâ sahac‐ticne râŋgeŋ qaŋqaŋnere ŋic moczi
wâc sâcne mi âke mârâŋkeocmu.
14 Micsiec‐ticne gereŋ gereŋ qakicne
i birihec domaha moczi moc
micticne sâcne bâiŋdaŋkeocmu me?
15 E râpe siecnao garac‐ticne sanaŋ qaŋqaŋne
birio râe‐fârekicne,
erâ i qânâ takirekicne iŋucnezi
keketeŋ jâmbâŋ forakac.
16 I keketeŋ â iitic jâmbâŋ fokacte
ŋondeŋnao ira sawazi
raʒic wefuc sâcne mi eekac.
17 Jaŋe ʒiʒimic keketeŋ erâ foŋgopieŋte
moczi moc sâcne mi bârâwiŋ‐jopaocmu.
18 E kisiec qame ʒoc fuaekac,
â ʒâŋe‐ticne i ʒoaŋzi wefuocte furic râeekac
irec sâc bâruŋkeekac.
19 Micticnaonec ʒocbâruŋ wahaekac,
erâ wâc ʒoc uucne wefuhuc iiŋkerâ raekac.
20 Ŋic ŋoŋe hofâ qinʒiŋ rikepie hosâc feekac
irec sâc jaha hosâzi sâkenaonec wahaekac.
21 Micrombâŋ‐ticnezi ʒoc ficneme bâruŋkeekac,
â micticnaonec ʒocbâruŋ wefuekac.
22 E upe‐ticne tâpiri sâkohecte
ŋic jaŋe honerâ hâwic‐jopa‐fâreekac.
23 Sahac‐ticne i aeŋ iŋucne râŋgeŋ qaŋqaŋne sasawa,
irec ŋondeŋnao urucne moc mi fokac.
24 Maŋticne i qânâ iŋucne hâhâwic‐ticne tâmiric,
i buse iŋucne takirekicne â sanaŋ qaŋqaŋne jâmbâŋ.
25 Lewiataŋ e fahareme ŋiczi sawa mâcne, nemu jaŋe wâc
honerâ hâwic‐jopame bititie sâqoreeŋgopieŋ.
26 E ʒikazi qa qâpuriŋ sâcne mi ecneekac
erâ damu me tepe motec me biriŋ sâkozi
tâpiri‐ticne wâc mi bawahaekac.
27 E aeŋte maname sopâc tinac eekac,
â aeŋ bâbâroŋ sanaŋnere maname
jâc semune tinac eekac.
28 E tepe moteczi muruzo epie mi wiseekac,
â qânâ wickecnepie maname gâc tinac eekac.
29 Qândiŋte maname siŋsiŋ tinac eekac,
â ŋic jaŋe damu wickecnepie mâc gâwie‐jareekac.
30 Meʒârâic‐ticne i kuʒi dâkâ micnehec iŋucne,
irec hata rahuc sohoŋ wiac bâdoc qâdockeekac.
31 E hâwec hefâuckeme qaŋqaŋ eekac,
â opâ ʒâkâŋko hume kuru bâbâc wefuekac.
32 E fifia bahuc rame opâzi fâuckehuc
râpefuŋnao irisuckeekac, ehuc qârâhâc fuaekac.
33 Mâreŋko qowi ere sâc moc mi juŋgopieŋ,
e wiac irec me irec hâhâwic moc mi bajuekac.
34 E qowi kâcɋene â piticne honec‐jopame
wawahane efâreeŋgopieŋ,
eki hâcne qowi momori sasawa
jaŋere femicne juekac.”