40
Wofuŋ e Hiobezi dâŋ okacne bâtikiecneocte âzâcnewec
1 Eme Wofuŋzi ʒuhuckerâ Hiobe dâŋ kecʒiŋuc âzâcnewec:
2 “O Hiobe, go Anutu bapafâre nore manatec sâqorekac,
go iŋuc ekomecte dâŋ gaza‐fârepac
irec okacne bâtikie‐narec.”
3 Iŋuc âzâcneme Hiobezi Wofuŋ dâŋ kecʒiŋuc bâtikiecnewec:
4 “O Wofuŋ, no iŋucnezi dâŋ okacne moc
weniŋuc bâtikie‐garepemu?
No dâŋ iŋuc me iŋuc ʒuhuckerâ muzore mi enarekac.
5 No mârâc dâŋ muhuc gâcne musifuckepo,
irec ʒi dâŋ i me i mocwâc mi mupemu.”
Anutuzi Hiobe tâpiri‐ticnere fuŋne muutuckehuc mutaniŋkecnewec
6 Iŋuc mume Wofuŋ e ʒâʒâkiriŋ mâŋâŋmaŋko juhuc Hiobe dâŋ kecʒiŋuc âzâcnewec:
7 “Go ŋic jâmbâŋ jukomecko faharerâ bifuŋge jomac,
ehame no dâŋ mu wioc egarepe okacne bâtikie‐narec.
8 ‘Wofuŋ e wiac ʒi maŋgâŋ enareme mi sâckekac,’
go nore iŋuc muhuc gahacnere
manatec tiŋne hawari ekac me?
9 No tâpiri fonarekac irec sâc jaha
gorao moc fokac?
Me nore marac fânâŋ i ɋuŋ parandaŋ iŋuc fokac
irec sâc jaha go moc fogarekac me?
10 “Go tâpiri iŋucne moc fogarekacko
ine faharerâ tatamac â ʒâŋe biŋe
qonaŋketec izi erige ezejec,
ehuc ʒai ʒonʒoŋ â huriri qâreŋge bâfuatec
izi ŋaqige ezejec.
11 Go kimbeŋgere ʒoc ruqetec bâruŋkezejec,
ehame maŋfefehec jueŋgopieŋ
jaŋe bâfuac‐jopahuc bawahac‐jopazemec.
12 Jâmbomac, jaŋe siŋjeŋic qatarahuc
bawahac‐jopa‐jâmbâŋkezemec,
â ŋic sindaŋne jaŋe ine juju‐jeŋickoa
henʒaŋ qanʒaŋ‐jopazemec.
13 Ehuc mâreŋmaŋko ducjopa‐fârezemec,
â hâmoc haeo kâpâcwâru bacjopazemec.
14 Go iŋuc moc sâcne efârecmuo
ine noni mumbiaŋgupemu,
ehuc wiac i go gahacne tâpirio ekomec
i mutaniŋkepemu.
15 “Go qowi sâko mako moc ʒâŋene Behemoto e honec;
no go bâfuacgupo iŋuc jaha e bâfuapo,
e bulimakao iŋucne sopâc kecɋaŋ nâekac.
16 Erâ sifu sasanaŋ‐ticne i fekicne jâmbâŋ,
â sahac‐ticnere rua sasawa i sanaŋ qaŋqaŋne.
17 Gecticnezi ine qândâoŋnerâ
jâmâzâc jâc iŋucne fe domakac
â kike‐ticnere rua i râŋgeŋ qaŋqaŋne.
18 Siec wiac‐ticne sasawa
i aeŋ bâbâroŋ sanaŋne iŋucne,
â me kike‐ticne ine aeŋ sanaŋne irec sâc.
19 “Qowi wiac bâfuac‐jopa‐fârepo jaŋeraonec e hâcne
hone wawarecnehec bâfuapo,
tâpiri‐ticne i bâbâfua‐ticne
noni sawa bawahapemu.
20 Qowi mimicne gâcne jaŋe tikio mamasiri eeŋgopieŋ
e tiki irecnec hâcne nânâ bâfuaekac.
21 E gugucjâcte fuŋnao fomanaekac,
ehuc ʒamac ʒamac maŋko soŋkerâ foekac.
22 Gugucjâczi mumuc qacneekac,
â kakikic jâcte tieŋ taeŋnezi ficboze ecneekac.
23 Opâ rumi sâko fisime mi hâwickeekac,
â opâzi ʒâŋe mainao âeckeme
mâc baŋaŋkerâ foekac.
24 Moczi moc hawiczi hehawickerâ roocmu?
Me mozi sâkenao finʒuŋ râerâ fâre wefuocmu?