6
Hiobezi fuŋkerâ dâŋ okacne bâtikiekac
1 Elifaʒi e dâŋ iŋuc mume Hiobezi kecʒiŋuc bâtikiecnewec:
2 “Jei, ʒârâ â busâqoc‐nane i
ŋemâc bâbâfuare sâcko râenʒapiŋ me!
3 Iŋuc epie muzac hâwecmecko moŋgeŋ fokac
irec ŋemâc i sirickezac.
No irec hâcne dâŋ mupe sifuckejec.
4 Anutu bapafâre e tepe motec‐ticnezi murucnuwec,
eme irec ʒâiczi sahac‐nane siricke‐fâreha maŋnanezi omaezo ekac.
Anuturaonec wiac hâhâwicnezi ʒuʒuhuc jaha
fai‐naneo fekac hâcne.
5 Doŋgi jaŋe kecɋaŋ nâhuc manapie taraekac,
â bulimakao jaŋe sopâc nâhuc mi owackeeŋgopieŋ.
6 Mozi nânâ wiac aŋac tâmiric hâwec mi hehuc sâcne nâocmu?
Me qâqâc hândâŋ âpâunere mozi maname aŋacne eocmu?
7 No wiac mamakâcne iŋucne mi nâekopac
me nânâ wiac gâcne sasawa nârâ wâc mamaŋucne enareekac.
8 “Hâc, Anutu e nunumu‐nane wemocte mi manaekac,
â nunumu‐nanere fârine wâc
wemocte mi bâfua‐nareekac?
9 Anutu e qâhâmocnuzac,
ehuc juju‐nane nowac rozac me!
10 E iŋuc enareme muzac no ʒâic sâko mana‐bipiehuc
ʒeri bari erâ kiwac qawac ezapo.
Anutu e tirine i manakopac,
irec no dâŋticne moc mi bâsuepo.
11 No wemo tâpiri moc fonarekacte ʒuhuckerâ jupemu?
Me wemo juju biaŋne moc fua‐nareocte woŋec jupemu?
12 No qânâzi bacnukicne me?
Me sahac‐nane i aeŋ bâbâroŋzi bakicne me?
13 No mocwâc biaŋkepemurâ tâpiri basakopac,
erâ ira me ira rarâ babafic moc bâbâfua irec hatane basakopac wâc.
14 “Ŋic moc e maŋticne omaeha
Anutu mocwâc mi manasiŋkeocmu,
iŋuc ehame âgofâc‐ticne jaŋe sifu iqickerâ mu keteŋ ecnenʒepieŋ.
15 Âgofâc‐nane, ŋoŋe ine opâ sâkozi hoe tâmiricko
qaŋeŋne qahuc pitiwaekac
irec sâc erâ eatucnuŋgopieŋ.
16-17 Opâ sâko jaŋe hoe dameŋko ɋiɋicne fisieŋgopieŋ,
ʒoaŋ dameŋko ine fâre wahahuc ʒicke kereŋ eeŋgopieŋ.
18 Âbârâ ŋic jaŋe opâ bâfuaniŋte babasa gie baku
qâsorierâ mâreŋ sawao hâmo sipiric eeŋgopieŋ.
19 Tema â Seba haeonec âbârâ ŋic jaŋe
opâre fifisacne fieŋgopieŋ.
20 Erâ raku opâo fisirâ basahuc
bipic tatara ejareekac.
21 Manaŋgopieŋ, no honec‐ŋopape opâ sâkozi eekac
irec sâc eŋgopieŋ tinac ekac.
Ŋoŋe norao wiac hâhâwicne fuakac i honerâ
bipic tatara eŋarekac hâcne.
22 ‘Ŋoŋe taha wiac moc nareniŋ.’
Me ‘Moneŋ mafa‐ŋeŋic gâcnezi baficnupie ʒuhuckerâ juzapo.’
No iŋuc moc ŋazapo me?
23 Me ‘Ŋoŋe râsi‐nanere meonec bataracnuniŋ,’
iŋuc moc ŋazapo me?
Me ‘Bâʒâicnueŋgopieŋ ŋic i jaŋere niŋgiŋkonec
firuecnuniŋ,’ iŋuc moc mupo me?
24 “Sâcne, ŋoŋe bahac moc wena bâfuapo i mutaniŋkeniŋ,
eme no niniŋkerâ dâŋŋeŋicte hazec râepemu.
25 Ŋic tiŋne moczi dâŋ mume manape fârine eocmu,
ŋoŋe ine mu tutuc enarepie manape fâri tâmiric ekac.
26 No maŋnane omaeha dâŋ mupe ŋoŋe manapie racne ekac,
ehame ine wemocte dâŋnanere okacne bârisieŋgopieŋ?
27 Ŋoŋe bekâ mâsiŋ juŋgopieŋ jaŋere ɋâsâi qahuc
tofa babazure behec‐jopaniŋmu,
ehuc âgo fuŋfuŋfâc‐ŋeŋic wâc
moneŋte erâ qikiŋ‐jopaniŋmu.
28 “Ʒi ine hone dendeŋnuniŋ,
no ŋoŋere maio burec moc mi epemu.
29 Ŋoŋe dâŋ kosa mumbieŋ i tarakac,
mocwâc ʒuhuckerâ mi muhasickeniŋ,
no dâŋ fârine muhape,
maŋgâŋ dâŋ mocwâc mi munareniŋ.
30 Ŋoŋe nore ʒiŋuc manaŋgopieŋ hâcne:
E burec ekac,
ehuc tiŋne â hehesic i sâcne mi mana râwiŋ‐jofakac.